Toʻo Kongakonga Lalahi mei he Konifelenisi Lahi Fakavaeuataʻu Hono 187
[ʻOtua tāpuakiʻi siʻomau palōfita ʻofeiná;
Ke ne maʻu ha moʻui lelei mo ha fiefia
Ki hono loto fakaʻeiʻeikí.
Pea hanga ʻe heʻene ngaahi leá ʻo ueʻi
ʻA e ngaahi lotó ke ke faitāpuekina
Ke nau fili ki he anga-māʻoniʻoní
ʻA ē ʻoku lelei angé].
(“ʻOtua Tāpuakiʻi Siʻomau Palōfita ʻOfeiná,” Ngaahi Himí, fika 11, naʻe hivaʻi he fakataha ʻo e pongipongi Tokonakí)
Kuo laka hake he taʻu ʻe 50 e kau he konifelenisi lahí e ngaahi fakamatala fakatāutaha mo e fakamoʻoni ongo moʻoni ʻa Palesiteni Thomas S. Monson. Ka koeʻuhí ko e hōloa siʻene moʻui leleí, naʻe ʻilonga e mamaʻo ʻa Palesiteni Monisoni mo ʻEletā Robert D. Hales ʻo e Kōlomu ʻo e Kau ʻAposetolo ʻe Toko Hongofulu Mā Uá, mei he konifelenisí.
Liʻaki, kae ʻIkai Ngalo.
Neongo naʻe meʻa mai pē ʻa Palesiteni Monisoni mei hono ʻapí pea hiki atu ʻa ʻEletā Hales ʻi he fiemālie, kimuʻa ʻi he fakatahaʻanga fakaʻosí, ka ne na ʻi heʻetau ngaahi fakakaukaú mo tau hūfaki kinaua, pea naʻe hāsino hona ivi takiekiná ʻi he ngaahi lea kotoa naʻe faí.
Naʻe tokolahi fau e kau lea ne nau toe fakaongo mai e ngaahi lea naʻe fai ʻe Palesiteni Monisoní, kau ai ʻa Palesiteni Russell M. Nelson (vakai ki he peesi 60), ʻi heʻene lea tonu ʻo kau ki he fakaafe naʻe fai ʻe Palesiteni Monisoni he konifelenisi fakamuimuitahá “ke tau ako mo fakalaulauloto ʻi he faʻa lotu ki he Tohi ʻa Molomoná he ʻaho kotoa pē.”1
ʻI hono fai ʻe ʻEletā Neil L. Andersen e lea fakaʻosí, (vakai ki he peesi 122), naʻá ne vahevahe ai ha ngaahi lea naʻe fai ʻe ʻEletā Heili ʻi heʻene teuteu ki he konifelenisí, ka naʻe ʻikai siʻi lava ke fai ʻene leá: Naʻe tohi ʻe ʻEletā Heili ʻo pehē, “ʻI heʻetau fili ke maʻu ʻa e tuí, ʻoku tau mateuteu ai ke tuʻu ʻi he ʻao ʻo e ʻOtuá.” Ko e moʻoni, naʻe fili ʻe ʻEletā Heili ʻa e tuí.
Neongo naʻe ʻikai ke ʻi ai tonu ʻa Palesiteni Monisoni mo ʻEletā Heili ke na meʻa mei he tuʻunga malangá, ka ne na kau ki ha konga mahuʻinga ʻi hono ʻai ke toe mahuʻingamālie ange ʻa e konifelenisí.
[ʻOku mau lotua maʻu ai pē koe, ko homau palōfita ʻofeiná,
Ke tāpuekina mo fakanongá;
ʻI hoʻo fonongá ke tuʻuloá,
Hā mai hoʻo maama fakanongá,
Pea kei ulo lahi pē hoʻo māmá ʻo hangē ko e lolotongá].
(“ʻOku Mau Lotua ʻa e Palōfitá,” Ngaahi Himí, fika 9, hivaʻi lolotonga e fakataha lakanga fakataulaʻeikí)