Ngaahi Liliu Foʻou ‘o e Folofolá

Kuo fakangofua ʻi he ngaahi taʻu kuo hilí ha ngaahi liliu foʻou ʻo e folofolá, ʻo kau ai ʻa e Tohi ʻa Molomoná ʻi he lea faka-Burmese, Efik, Goergian, Navajó, Pohnpeian, Sesotho, mo e Tshiluba, pea mo e folofola ʻe tolu kuo fakatahaʻí ʻi he Talanoa Fakaʻilonga Nima Faka-ʻAmeliká, Afrikaans, Amharic, Arabic, Bislama, Greek, Hiligaynon, Hindi, Hmong, Lao, Lingala, Malay, Persian, Polish, Serbian, Setswana, Sinhala, Slovak, Slovenian, Tahitian, Tamil, Telugu, Tok Pisin, Turkish, Twi, Urdu, mo e Yoruba.

ʻI ha tohi naʻe fakaʻaho ki he 9 ʻOkatopa 2017, naʻe lisi ai ʻe he Kau Palesitenisī ʻUluakí e ngaahi poloseki ko ʻení mo ha founga foʻou ʻe lava ai ʻe he fakafoʻituituí ʻo ako e ngaahi konga fakaangaanga kuo liliú, kimuʻa pea toki pulusi e liliu aofangatukú.

ʻOku pehē ʻe he tohí, “ʻI he kei hokohoko atu ʻa e liliú, ʻe lava ke tukuange hokohoko atu ha fanga kiʻi konga kuo kakató, ʻi ha ngaahi taimi kehekehe.” “ʻE maʻu atu e fanga kiʻi konga ko iá ʻi hono hokohokó, kae ʻoua kuo kakato ʻa e ngāue liliu leá, pea tuku atu ʻi he LDS.org mo e polokalama Laipeli ʻo e Ongoongoleleí.” ʻE kamata ʻi he ʻaho 30 ʻo Nōvema 2017, hono fuofua tuku atú ʻi ha ngaahi lea fakafonua ʻe niʻihi kuo filifili. ʻI he kakato ʻa e ngāue liliu leá, mo e ngaahi reviews mo e fakangofua ʻe fie maʻú, ʻe toki fetongi leva e fanga kiʻi liliu ne muʻaki tuku atú, ʻaki e tatau aofangatukú, pea hoko atu ai ki hono pākí.

ʻOku taʻu lahi e ngaahi ngāue fakaliliu-leá he ʻoku fie maʻu ke matuʻaki tokanga ʻi hono liliu ʻo e folofolá. Ko ia ʻoku ʻi ha tuʻunga kehekehe e ngaahi polosekí. ʻE kau ʻi hono tukuange atu ʻo e ʻuluaki konga naʻe fuofua fakangofua ke liliú, ha ngaahi meʻa kuo ʻosi liliu pea vakaiʻi ʻe he kau taki fakalotofonuá. ʻE hokohoko atu hono tuku fakakongokonga atu ʻo e ngaahi konga kuo liliú, ʻi ha ngaahi taimi kehekehe. He ʻikai paaki e ngaahi liliu fakaangaanga ʻo e ngaahi konga kuo mei kakató.

Kuo kole mai ‘e he kau Palesitenisī ʻUluakí, lolotonga hono liliu pe fakatatali ki he ngaahi ngāue fakaliliu-leá, ke “hokohoko atu hono fakaʻaongaʻi” ʻe he kau takí mo e kaingalotú “e ngaahi liliu lolotonga ʻo e Ngaahi Tefito ʻo e Tuí, ongo lotu sakalamenití mo e lotu ʻo e papitaisó, kae ʻoua kuo kakato ʻa e ngaahi liliu foʻoú.”

Kuo liliu pea lava ke maʻu e tatau ʻo e ngaahi folofola ʻa e Siasí ʻi he ngaahi lea fakafonua ko ʻení: Tohi Tapú, 3; fie maʻu ha ngaahi tatau ʻo e Tohi Tapu ʻoku ʻikai ʻa e Siasí, 95; Tohi ʻa Molomoná, 90; Ngaahi meʻa naʻe filifili mei he Tohi ʻa Molomoná, 21; mo e Tokateline mo e Ngaahi Fuakava mo e Mataʻitofe Mahuʻingá, 58.