Senitā Akoʻanga Fakafaifekaú

Ko hono fakahaaʻi ʻe ha akoʻanga fakafaifekau foʻou ʻi ʻAkalā, Kana, mo ha senitā akoʻanga fakafaifekau ʻi Polovo, ʻIutā, USA naʻe toe fakalahi, ʻa e hokohoko atu ko ia e mahuʻinga ʻo e ngāue fakafaifekaú.

ʻE lava ke hū ha kau faifekau ʻe toko 320 ki he MTC naʻe toki ʻosi hono langa ʻi Kaná, ʻi he tafaʻaki ʻo e Temipale ʻAkalā Kaná, pea kei ʻatā pē ke fakatokolahi. ʻOku ʻi ai ha feituʻu lahi ange ʻokú ne tali e kau faifekau meí he hihifo mo e fakatonga hahake ʻo ʻĀfiliká, pea pehē ki he kau faifekau mei he funga ʻo e māmaní kuo ui ke ngāue ʻi ʻĀfiliká. ʻOku fakafaingofuaʻi ʻe he ngaahi fale foʻoú hono ako ʻe he kau faifekaú ʻenau lea fakafonuá—faka-Pilitaniá pe Falaniseé—pea ako e lea mo e anga fakafonua ʻo e feituʻu kuo vahe kinautolu ke ngāue ki aí.

Kuo hanga ʻe hono fakalahi ʻo e MTC ʻi Filipainí, ʻo liunga ua e tokolahi ʻo e kau faifekaú ki he toko 280. ʻOku ʻi ai ha fale lalahi foʻou ʻe ua ʻi ha feituʻu kuo ʻosi tuʻu ai ha ngaahi fale lalahi ʻe nima, ʻoku tuʻu he tafaʻaki ʻo e ngaahi ʻŌfisi Fakaʻēlia ʻo Filipainí, pea hanga atu mei he kauhala ʻe tahá ki he Temipale Manila Filipainí. Talu mei hono fakaava ʻo e MTC Filipainí ʻi he 1983, kuó ne tokoniʻi ha kau faifekau ʻoku omi pe ō ki ha ngaahi fonua kehekehe ʻe 60.

‘Oku kau ʻi hono fakalahi e MTC Polovó, ha fale fungavaka ʻe ono mo ha ngaahi loki ako foʻou ʻe 200, ngaahi loki akoako faiako ʻe 100 tupu, mo ha loki komipiuta ʻe 13 ʻe lava ke fakahoko ai ha ngaahi ako ki he kau faifekaú kimuʻa pea toki tufa kinautolu ki he ngaahi ʻēlia kuo vahe kinautolu ki ai ʻi he funga māmaní. ʻE lava ke akoʻi ʻi he MTC Polovó ha kau talavou, kau finemui, mo ha kau faifekau matuʻotuʻa ʻe toko 3,700 ʻi he taimi pē ʻe taha.

ʻOku maʻu ʻe he Siasí ha ngaahi senitā akoʻanga fakafaifekau ʻe 15 ʻi ha ngaahi feituʻu kehekehe ʻi he māmaní.