Ko ha Fakahinohino Foʻou ki he Ngaahi Kalasi ʻa e Lakanga Taulaʻeiki Faka-Melekisētekí mo e Fineʻofá ʻi he Sāpaté
Naʻe fakakaukau ʻa Nancy Feragen, “Ko e hā te u lava ʻo fai kapau he ʻikai e tohi lēsoní?” ʻi heʻene fuofua vakai ki ha tatau ʻo e Haʻu ʻo Muimui ʻIate Au—Maʻá e Lakanga Taulaʻeiki Faka-Melekisētekí mo e Fineʻofá. Naʻá ne pehē, “Naʻá ku hohaʻa ʻi he kamataʻangá. Naʻe haʻu leva ha fakakaukau kiate au: ʻOku finangalo ʻa e ʻEikí ke tau fatongia ʻaki hono ako mo fakatupulaki hotau tuʻunga fakalaumālié, ʻi heʻetau nofo fakaekāinga ʻi he ongoongoleleí.”
Naʻe pehē ʻe Linda Harmon, ko ha palesiteni ʻo e Fineʻofá, “ʻOku fakatupu tailiili ke te falala ki he ʻEikí peá te haʻu mateuteu ke fakahoko ha fepōtalanoaʻaki ʻoku ʻikai lahi ai ha nāunau, ka ʻi heʻete fai iá—kapau kuó te mateuteu ʻi he faʻa lotu, ako, ʻalu ki he temipalé mo e hā pē ha meʻa ʻoku ueʻi kita ʻe he laumālié ke te fai—ʻoku fakaofo ia.”
Ko e Faiako ‘i he Founga ‘a e Fakamoʻuí
Naʻe pehē ʻe Pīsope Boyd Roberts, “Ko e palopalema ʻe taha ʻo e nāunau fakalēsoni foʻoú, ko hono feingaʻi e kakaí ke tuku ʻenau faiako ʻi he ‘founga motuʻá.’ Kuo taimi ke tuku ʻetau lau pē e ngaahi fakamatalá, kae ʻoange ha faingamālie ke faiako ai ʻa e Laumālié.”
Naʻe pehē ʻe Lisa Smith, ko ha palesiteni Fineʻofa, “Ko ha founga faiako foʻou ia ʻe ala faingataʻa ki ha niʻihi,” ko ʻene ʻuhingá ki he Faiako ʻi he Founga ʻa e Fakamoʻuí. Naʻá ne pehē, “Ko hono ʻuhinga ia ʻoku mahuʻinga ai ke tau fakatātaaʻi ha ngaahi founga fakafaiako ʻoku leleí mo poupouʻi e kau takí ke nau ʻalu maʻu pē ki he ngaahi fakataha alēlea ʻa e kau faiakó.”
Teuteú mo Hono Akoʻí
Naʻe pehē ʻe Davidi Mickelson, ko ha faiako ʻi he kulupu taulaʻeiki lahí, ʻoku ʻuhinga e kupuʻi lea “ke mou akoʻi faivelenga” ʻi he Tokāteline mo e Ngaahi Fuakavá 88:78 “ki he teuteu ʻoku tau fai kimuʻá mo ʻetau lava ke muimui lelei ki he Laumālié lolotonga ʻetau faiakó. Kapau te tau faiako faivelenga, ʻe nofoʻia kitautolu ʻe he ʻaloʻofa ʻa e Fakamoʻuí pea ʻe haohaoa ange hono akoʻi kitautolú. ʻOku ou tui ko e founga faiako haohaoa ia ʻa e ʻEikí. Kuo pau ke loto fiemālie ʻa e faiakó—ko e tokotaha ʻokú ne tataki ʻa e fealēleaʻakí—ke fakahinohinoʻi ia ʻe he Laumālié.”
Naʻe teuteu ʻe Adam Bushman, ko ha faiako ʻi he kōlomu kaumātuʻá, ke failēsoni, ʻaki ʻene toe fakamanatu e ngaahi lea ʻi he konifelenisi lahí, mo ne lotua pe ko e fē ngaahi fakakaukau ʻoku mahuʻinga taha ki he kōlomú. Naʻá ne pehē, “Ke tokoni ke maʻu ʻe he kau taulaʻeiki lahí ha taimi lahi ange ke nau fakalaulauloto ai, ʻoku ou ʻīmeili he lolotonga e uiké ʻo pehēange, ‘Ko e lea ʻeni te tau aleaʻí pea ʻoku mau fakaʻamu ke ke fakakaukau ki he ngaahi fehuʻi ko ʻení.’”
Ko e Fealēleaʻaki mo Ako Fakatahá
Naʻe pehē ʻe Booke Jensen, ko ha tokoni palesiteni fineʻofa, “ʻOku ʻikai toe hoko e Fineʻofá ia ʻi he ʻaho Sāpaté ko ha fatongia pē ʻo e kau takí. ʻOku ʻi ai ha fatongia ʻo e mēmipa kotoa pē.”
Naʻe pehē ʻe Brother Bushman naʻe ongo makehe ʻenau tangutu takatakaí. Naʻá ne pehē, “ʻOku ou saiʻia ai. ʻOkú ne liliu e natula ʻo e fepōtalanoaʻakí. ʻOkú ne liliu e ngaahi fakatetuʻa ʻa e kakaí. ʻOku lahi ange ai e kau maí. Makehe mei he tali pē ha kāingalotu ʻe toko ua pe tolú, ʻoku kau mo ha kakai foʻou he leá pe talí.”
ʻI he fuofua fanongo ʻa e fineʻofa ko Rebecca Siebach he fokotuʻutuʻu foʻoú ʻi he ngaahi fakataha alēleá, naʻá ne fakakaukau leva ki hano ngaahi kaungāmeʻa māmālohi ʻi he Siasí. Naʻá ne pehē, “naʻá ku ʻilo e ngaahi meʻa ne nau tokanga ki aí. Kuo nau vahevahe tauʻatāina mai ʻenau ongoʻi taʻepauʻia mo e faingataʻaʻia he haʻu ki he lotú, pea naʻá ku fakakaukau, ko ha faingamālie lelei ʻeni ke u fetuʻutaki ai mo kinautolu ʻo pehē ange, ‘ʻOku mau fie maʻu kimoutolu ʻi heʻetau fakataha alēleá! Mou omi muʻa ke tau feʻinasiʻaki!’”
Naʻe pehē ʻe LonaMarie Cook, ko ha tokoni palesiteni Fineʻofa, “ʻI he taimi naʻe faifai peá u lea ai ʻi ha fakataha alēlea, naʻe fakaʻofoʻofa hono poupouʻi ʻe he kakaí ʻeku fakakaukaú pea mo kau atu ki he feohiʻanga ko iá.”
Ko Hono Maʻu mo e Ngāue Fakatatau ki he Ueʻi ʻa e Laumālié
Naʻe pehē ʻe Pīsope Lōpeti, “ʻOku tau fokotuʻu ha ʻātakai ʻe faiako ai e Laumālié pea lava ke tau fakafanongo ai mo ongoʻi. ʻOku hoko leva e Laumālié ko e faiakó, ʻo fakahinohinoʻi kitautolu ʻi he meʻa ʻoku fie maʻu ke tau fai ʻi heʻetau moʻui fakatāutahá, fakafāmilí mo e ngaahi uiuiʻí. Ko e ola ʻo e meʻa ʻoku tau fai ki he ngaahi ueʻi fakalaumālie ko iá, ko e meʻa ia ʻokú ne fakatupu e ului moʻoní mo e ngāue tokoní.”
Naʻe pehē ʻe Susan Farr, ko ha palesiteni Fineʻofa, “ʻOku teke kitautolu ʻe he founga ko ʻení ke tau tuʻu hake ʻo ngāue, kae ʻoua ʻe ʻosi pē lēsoní kuo tau pehē ‘naʻe fakalaumālie,’ pea ngalo leva ia ʻiate kitautolu. ʻOku tokoniʻi kitautolu ʻe he fealēleaʻaki fakatahá ke tau ʻilo ʻoku ʻatautolu kotoa ʻa e akó mo e ngāué—kae ʻikai ko e faiakó pē.”
Naʻe pehē ʻe Susana Mitchell, ko ha tokoni palesiteni Fineʻofa, “ʻI heʻetau lekooti e ngaahi ongo ʻoku tau maʻú pea ngāue fakatatau ki aí, ʻoku liliu ai hotau lotó pea tau hoko ko ha kau ngāue tokoni lelei ange ʻa e ʻEikí.”
Naʻe pehē ʻe Sisitā Sāmita, “ʻI hoʻo ʻilo ʻokú ke haʻisia ki ha meʻa pea ʻe ʻeke atu ʻe ha taha e meʻa ʻokú ke ongoʻí, ʻokú ne ʻai ai koe ke ke kau longomoʻui atu ʻi hono tanumaki hoʻo fakamoʻoní.”
Naʻe pehē ʻe Landen Roundy, ko ha kulupulita ʻi he taulaʻeiki lahí, ko e taimi ʻokú te ʻīmeili ai e ngaahi fakamatala naʻe aleaʻi mo palaní, “ʻoku tokoni ia ke fakatokangaʻi ʻe he kau mēmipá e ngaahi aʻusia ʻoku nau maʻu lolotonga e uiké, ʻa ia te nau fie vahevahe he Sāpate ka hoko maí.”
Naʻe tānaki atu ki ai ʻa Pīsope Lōpeti, “Kuó u vakai ki he hokohoko atu e laumālie ʻo e feʻinasiʻakí mo e akó ʻi he lolotonga e uiké ʻi hono aleaʻi ʻe he houʻeiki tangatá ʻi he ʻīmeilí ha ngaahi fakakaukau mo ha ngaahi ongo lahi ange, ke fakamālohia ʻenau kōlomú.”
Naʻe fakaʻosi ʻaki ʻe Sisitā Siebach, “ʻOku finangalo e ʻEikí ke tau fepoupouʻaki pea ʻe lava ia ʻi he taimi ʻoku tau fakataha ai mo ha taumuʻá. ʻOku tokoniʻi kitautolu ʻe he fokotuʻutuʻu foʻou ko ʻení ke tau ʻilo e ngaahi tefito ʻe ʻaongá, fokotuʻu ha ngaahi taumuʻa, ʻilo e ngaahi maʻuʻanga tali totonú, maʻu ha fakahā fakatautaha, pea felangakihakeʻaki ʻi heʻetau fakafanongo ki he kau palōfita moʻuí ke maʻu e ngaahi tali ʻoku tau fie maʻu ʻi hotau kuongá.”