ʻEletā Juan A. Uceda

Kau Palesitenisī ʻo e Kau Fitungofulú

Lolotonga ha lue lalo ʻa ʻEletā Juan A. Uceda ki he ngaahi kolo liʻaki ʻo Masu Pisu ʻi Peluú, naʻá ne hekea ai mei he hala fasiʻi naʻe ʻi aí. Naʻá ne piki maʻu ki ha vaʻakau ʻo tautau ʻi ha fute ʻe 2,000 (610m) ʻi ʻolunga ʻi ha vaitafe, mo lotua fakamātoato ha tokoni. Naʻá ne pehē, naʻa ne lotu leʻolahi he konga kimuʻa ʻo e ʻaho ko iá, ka “ʻi he ʻamanaki ke u maté, naʻa ku lotu mei hoku lotó.” Kae kimuʻa ke ne toó, naʻe fusi hake ia ʻe ha faifekau kehe ʻo ne hao ai.

Naʻá ne pehē ko e taha ʻo e ngaahi lēsoni naʻá ne ako ʻi he ʻaho ko iá ke “lotu maʻu ai pē ‘ʻi he loto fakamātoato, mo e loto moʻoni, ʻo [fakaʻaongaʻi] e tui kia Kalaisí’ (Molonai 10:4).”

Naʻe hikinimaʻi ʻa ʻEletā ʻIuseta ko ha Fitungofulu Taki Māʻolunga ʻi he ʻaho 3 ʻo ʻEpeleli 2010. Naʻá ne hoko ko ha Tokoni Talēkita Pule ʻi he Potungaue Ngāue Fakafaifekaú, mo ha Tokoni Fakaʻēlia ʻi he ʻĒlia ʻAmelika Noate Tonga-hahaké ʻi he taimi naʻe ui ai ia ki he Kau Palesitenisī ʻo e Kau Fitungofulú ʻi he ʻaho 1 ʻo ʻAokosi, 2017.

Mei he 2010 ki he 2013, naʻá ne hoko ko ha tokoni ʻi he kau Palesitenisī ‘o e ʻĒlia Saute ʻAmelika Tokelau-hihifó, pea naʻá ne hoko ko e Palesiteni ʻo e ʻĒlia Saute ʻAmelika Tokelau-Hihifó mei he 2013 ki he 2016.

Naʻe ako ʻa ʻEletā ʻIuseta ʻi Pelū. Naʻá ne ako ʻi he ʻInisititiuti Jose Carlos Mariátegui ʻi Limá, ʻa ia naʻá ne ako ai ki he tauhi-tohí mo e ngaahi vā-fetuʻutaki mo e kakaí. Naʻá ne ako foki ki he fakalele pisinisí ʻi he ʻInisititiuti Centro Andino de G.E. Kuo lavaʻi ʻene ako ʻi he ʻUnivesiti San Luis Gonzaga, ʻa ia naʻá ne maʻu ai ha mataʻitohi BA ʻi he vā-fetuʻutaki mo e kakaí.

Naʻe hoko ʻa ʻEletā ʻIuseta ko ha talēkita ʻi he Potungāue Ako ʻa e Siasí ʻi he ʻēlia ʻo Pelū mo Poliviá. Naʻá ne mavahe mei Pelū ʻi he 2003 ki Niu Sēsī, USA, ke tokoni ki heʻene tamaí ʻi heʻenau pisinisi faka-fāmilí.

Talu e kau ʻa ʻEletā ʻIuseta ki he Siasí ʻi he 1972, mo ʻene ngāue ʻi ha ngaahi uiuiʻi kehekehe, kau ai ʻene hoko ko ha faifekau taimi kakato ʻi he Misiona Lima Peru, kau he kau palesitenisī Lautohi Faka-Sapate ʻi he siteikí, pīsope, aleaʻanga māʻolunga, tokoni palesiteni siteiki, palesiteni fakasiteiki, Palesiteni ʻo e Misiona Lima Peru North (1992–95), mo ha Fitungofulu Fakaʻēlia.

Naʻá ne mali mo Maria Isabel Bendezu, ʻi Maʻasi ʻo e 1979. Ko e mātuʻa kinaua ki ha fānau ʻe toko nima.