Toʻo Kongokonga Lalahi mei he Konifelenisi Lahi Fakavaeuataʻu Hono 188
Naʻe ʻi ai ha ngaahi liliu lalahi naʻe fanongonongo foki ʻi he konifelenisi lahí. Neongo naʻe kehe ʻa e fanongonongó heni, ka naʻe kei tatau pē ʻa e ngaahi taumuʻa ki aí: ʻOku ongoʻi ʻe he Palōfita ʻa e ʻOtuá ʻa e fuʻu fie maʻu vivili ke tau teuteu ki he Hāʻele ʻAngaua Mai ʻa e ʻEikí pea ʻokú ne fakaafeʻi kitautolu ke fakamālohia ʻetau tui ki he Tamai Hēvaní mo Hono ʻAlo ko Sīsū Kalaisí.
Ko ha niʻihi pē ʻeni ʻo e ngaahi fakaafe mahuʻinga mo e talaʻofa naʻe fakamamafaʻi ʻe Palesiteni Russell M. Nelson ʻi he konifelenisí.
Ngaohi ʻa ʻApi ke Toe Māʻoniʻoni Ange
ʻI he lea fakafeʻiloaki ʻa Palesiteni Nalesoní, naʻá ne fakafeʻiloaki ai e fie maʻu ke fai ha ngaahi liliu ʻi heʻetau moʻuí ʻe hoko ai ʻa hotau ngaahi ʻapí ko e senitā ki hono ako ʻo e ongoongoleleí. “Kuo hokosia e taimi ke ʻi ai ha Siasi ʻoku fakatefito ʻi ʻapi, kae poupou ki ai e meʻa ʻoku hoko ʻi hotau ngaahi ʻapisiasi fakakoló, fakauōtí, mo e fakasiteikí.”
-
Lau ʻo fekauʻaki mo e ngaahi liliu naʻe fokotuʻu mai ki ʻapí pea mo e ngaahi liliu ki he lotú ʻoku poupou ki aí (vakai, peesi 8).
-
Kumi ha fakamatala lahi ange ʻi he “Tokoni e Ngaahi Liliú ke Potupotutatau e Ako ʻo e Ongoongoleleí ʻi ʻApi mo e Siasí” (peesi 117).
“Tuku Kimui e Māmaní”
Naʻe fakaafeʻi ʻe Palesiteni Nalesoni ʻa e houʻeiki fafiné ʻi he fakataha lahi ʻa e kakai fefiné ke nau kau mai ki he “ngāue maʻongoʻonga taha … ʻi he māmaní he ʻahó ni.” Naʻá ne palōmesi ange, “Te tau lava fakataha ʻo fai e meʻa kotoa ʻoku finangalo e Tamai Hēvaní ke tau faí ke teuteuʻi ai e māmaní ki he Hāʻeleʻanga Ua mai [ʻa Sīsū Kalaisí].
-
Lau e fakaafe ʻe fā naʻe fai ʻe Palesiteni Nalesoni ki he kakai fefiné (vakai ki he peesi 68).
“Toe Fakafoki Mai e Hingoa Totonu ʻo e Siasi ʻo e ʻEikí”
Naʻe ui ʻa Palesiteni Nalesoni ki he kāingalotú ke nau ui e hingoa ʻo e Siasi ʻo e Fakamoʻuí ʻo hangē ko ia naʻe foaki ʻe he Fakamoʻuí. “ʻOku ou palōmesi atu kapau ʻe fai hotau lelei tahá ke fakafoki e hingoa totonu ʻo e Siasi ʻo e ʻEikí, ʻe hanga ʻe Ia ʻoku ʻOʻona e Siasi ko ʻení ʻo lilingi hifo Hono mālohí mo e ngaahi tāpuakí ki he ʻulu ʻo e Kau Māʻoniʻoni ʻi he Ngaahi ʻAho Kimui Ní,17 kuo teʻeki ai ke tau mātaʻia hano tatau.”
-
Lau e fakahinohino naʻe fai ʻe Palesiteni Nalesoni ʻo kau ki he hingoa ʻo e Siasí (vakai ki he peesi 87).
“ʻI Hono Fale Māʻoniʻoní”
Naʻe fakaʻosi ʻe Palesiteni Nalesoni ʻa e konifelenisí ʻaki hano fanongonongo ʻo ha temipale foʻou ʻe 12 mo ha fakaafe ke “ʻalu maʻu pē ki Hono fale māʻoniʻoní.” Naʻá ne pehē, “ʻOku ou palōmesi atu ʻe ʻomi ʻe he ʻEikí ha ngaahi mana ʻokú Ne ʻafioʻi ʻokú ke fie maʻu, ʻi hoʻo feilaulau ke tokoni mo mōihū ʻi Hono temipalé.
-
Vakai ki he feituʻu ʻe tuʻu ai e ngaahi temipale naʻe fanongonongó (vakai, peesi 113, 116).