Tokoni e Ngaahi Liliú ke Potupotutatau Hono Ako e Ongoongoleleí ʻi ʻApi mo e Siasí

Naʻe fanongonongo ʻe Palesiteni Russell M. Nelson ha ngaahi liliu ke tokoni ke potupotutatau mo fakafehokotaki e ngaahi founga makehe mo mahuʻinga ʻoku moīhū ai e kāingalotú ʻi hono ako mo moʻuiʻaki e ongoongolelei ʻa e Fakamoʻuí ʻi he siasí mo ʻapi, ko ha konga ia ʻo e ngaahi ngāue taʻetūkua ʻoku fai ke tokoniʻi e Kāingalotu ʻo e Siasí ke nau “ako e tokāteliné, fakamālohia e tuí mo fakatupulaki ha moihū fakatāutaha ʻoku lelei angé.”

Kuo fanongonongo ʻe he kau taki ʻo e Siasí e ngaahi liliu ki he taimitēpile ʻo e houalotu he Sāpaté ʻo kamata ʻi Sanuali 2019, ʻo fakafehokotaki ia mo hano tukuange mai ha nāunau fakalēsoni foʻou ʻoku poupouʻi ʻe he Siasí ka ʻoku fakatefito ʻi ʻapi. ʻOku fokotuʻu e ngaahi liliu ko ʻení mo ha ngaahi meʻa kehe, ʻi ha ngaahi polokalama kimuʻa ʻa e Siasí kuo fakahoko he ngaahi taʻu kimuʻá, ko e fakataumuʻa ke faitokonia e kāingalotú ke fakatefito kakato ange ʻenau moʻuí ʻi he Tamai Hēvaní mo Sīsū Kalaisi pea fakaloloto ange ʻenau tui kiate Kinauá. ʻOku kau he ngaahi polokalama ko ʻení ʻa hono ako ʻo e ongoongoleleí ʻi ʻapi ʻi ha founga fakaʻutumauku mo mahuʻingamālie ange, fakaʻapaʻapaʻi e ʻEikí ʻaki hono tauhi ʻo e Sāpaté ke māʻoniʻoni, pea fetauhiʻaki ʻo hangē ko ia ne mei fai ʻe he Fakamoʻuí mo fakahinohinoʻi ʻe he Laumālié.

Naʻe fakamatala ʻa ʻEletā Quentin L. Cook ʻo e Kōlomu ʻo e Kau ʻAposetolo ʻe Toko Hongofulu Mā Uá, naʻe fakataumuʻa e ngaahi liliú ni ke teuteuʻi e kakai ʻo e ʻEikí ki Heʻene toe hāʻele maí, pea mo fakaloloto ange ʻa e ului fakafoʻituituí, ʻi heʻene fakamatalaʻi e ngaahi liliú ʻi he fakataha pongipongi Tokonaki ʻo e konifelenisi lahí.

Naʻá ne pehē, “ʻOku tau ʻiloʻi e mālohi fakalaumālie mo e ului lahi mo tuʻuloa ʻe lava ke maʻu mei he ʻātakai ʻo ʻapí ….” “Ko ʻetau taumuʻá ke ʻai ke potupotutatau e ngaahi aʻusia ʻi he Siasí mo e ʻapí ʻi ha founga ke fakatupulaki lahi ai e tuí, mo e anga fakalaumālié pea fakaloloto e ului ki he Tamai Hēvaní pea mo e ʻEiki ko Sīsū Kalaisí.”

Ngaahi Liliu ʻi ʻApí

ʻOku fakaafeʻi atu ai ʻe he kau taki ʻo e Siasí ke toe lahi ange fakamamafá ʻi hono fai fakataautaha mo fakafāmili ʻo e ngaahi meʻa fakalotú ʻi ʻapi, kau ai ʻa hono ako ʻo e ongoongoleleí ʻi ʻapi ʻi he Sāpaté mo e lolotonga ʻo e uiké pea mo e ngaahi liliu ki he efiafi ʻi ʻapí.

ʻI he hoko ʻa ʻapi ko ha lokiaki mo e loki ke ʻahiʻahiʻi ai e moʻuí, ʻoku hoko foki ia ko ha senitā mahuʻinga ki hono ako mo moʻuiʻaki ʻo e ongoongoleleí. ʻOku ʻomi ʻe hono ako fakatāutaha mo fakafāmili ʻo e ongoongoleleí ʻi ʻapi he Sāpaté mo e toenga ʻo e uiké, ha ngaahi faingamālie ke maʻu ai ha fakaivia fakalaumālie fakaʻaho pea lava ke te feliliuaki ai e taimi ako fakatāutahá mo e fakahaá. ʻOku hanga ʻe he fakafalala ʻataʻatā pē ke toki ako e ongoongoleleí ʻi ʻapisiasi ʻi ha taimi fakangatangatá, ke ʻoua ʻe potupotutatau hono aʻusia e ului loloto mo tuʻuloa ʻoku fie maʻú.

Naʻe pehē ʻe Palesiteni Nalesoni, “ʻOku tau takitaha fatongiaʻaki pē ʻetau tupulaki fakalaumālie fakatāutahá.” “Pea ʻoku fakamahino mai ʻe he folofolá ko e tefitoʻi fatongia ia ʻo e mātuʻá ke akoʻi e tokāteliné ki heʻenau fānaú.”

ʻOku kau he ngaahi liliú ʻa hono fakafeʻiloaki mai ʻo ha maʻuʻanga tokoni foʻou ki hono ako ʻo e ongoongoleleí, maʻá e fakafoʻituituí mo e ngaahi fāmilí ʻi ʻapi. ʻE lava ʻe he fakafoʻituituí mo e ngaahi fāmilí ʻo fakaʻaongaʻi ʻa e tohi foʻou ko e Haʻu, ʻo Muimui ʻIate Aú—Maʻá e Fakafoʻituituí mo e Ngaahi Fāmilí, kapau ʻoku nau fie maʻu, ke tataki ʻenau ako ki he ongoongoleleí, ʻoku fai ʻi tuʻa mei he siasí. ʻOku ngāue ʻa e maʻuʻanga tokoni foʻoú fakataha mo ha ongo maʻuʻanga tokoni kehe maʻá e kau faiako Lautohi Faka-Sāpaté mo e Palaimelí, ke fakafenāpasi e ngaahi lēsoni he Sāpaté ki hono ako ʻo e folofolá ʻi ʻapí kae pehē ki ha ngaahi fokotuʻu ki he efiafi ʻi ʻapí.

Makehe mei hono poupouʻi e ako ʻo e ongoongoleleí, naʻe toe fakafoʻou foki ʻe he kau taki ʻo e Siasí ʻenau fakaafe ki he taha kotoa ke kau mai he ʻaho Sāpaté—mo e toenga ʻo e uiké kotoa—ki he ngaahi fakataha alēlea fakafāmilí, efiafi ʻi ʻapí, ngāue hisitōlia fakafāmilí mo e fakatemipalé, ngāue fakaetauhí, moihū fakatāutahá kae pehē ki he taimi fiefia mo e fāmilí.

ʻOku hanga ʻe he nāunau naʻe ʻoatu ki he kāingalotú mo e kau takí ʻo fakamatalaʻi hono poupouʻi ʻe he kau taki ʻo e Siasí ke fakahoko ʻe he kāingalotú ha efiafi ʻi ʻapi pea ako e ongoongoleleí he Sāpaté—pe ngaahi taimi kehe ʻe fili ʻe he fakafoʻituituí mo e ngaahi fāmilí. ʻE lava ke fakahoko ha pō ʻekitivitī fakafāmili he Mōnité pe ʻi ha taimi kehe. Pea ʻi he ʻuhinga ko ʻení, ʻoku totonu ke hokohoko atu hono fakaʻatāʻatā ʻe he kau takí e efiafi Mōnité mei he ngaahi fakataha mo ha ʻekitivitī ʻa e Siasí. Ka ko e taimi ko ia ʻoku fakaʻaongaʻi ki he ako ʻo e ongoongoleleí ʻi ʻapí mo e ngaahi ʻekitivitī maʻá e fāmilí mo e fakafoʻituituí, ʻoku fakataimi-tēpileʻi ia ʻo fakatatau mo e ngaahi tūkunga fakafoʻituituí.

ʻOku hoko ʻa e mōihū ki he ʻOtuá ʻi ʻapisiasí, kau atu ki he ngaahi ouau toputapu ʻoku fai aí mo fakataha kotoa mai ke feakoʻiʻaki, fefakamālohiaʻaki mo fetauhiʻakí, ko ha ngaahi ʻelemēniti mahuʻinga ia ki hono fakaloloto ʻo e tuí mo e ului fakatāutahá. He ʻikai ʻaonga hono holoki e taimi ʻoku tau ʻi ʻapisiasi ai he lotú, kae ʻoua ke lotoʻaki ʻe he fakafoʻituituí mo e ngaahi fāmilí ke fakamālohia honau ngaahi ʻapí.

Naʻe akoʻi mai ʻe Palesiteni Nalesoni, “ʻI heʻetau hoko ko ha Kāingalotú, kuo tau anga ʻaki e fakakaukau ko e ʻlotú pe siasí ko ha meʻa ia ʻoku toki fai pē ʻi hotau ngaahi ʻapisiasí, kae poupou ki ai e meʻa ʻoku hoko ʻi ʻapí. ʻOku fie maʻu ke tau liliu e sīpinga ko ʻení. Kuo hokosia e taimi ke ʻi ai ha Siasi ʻoku fakatefito ʻi ʻapi, kae poupou ki ai e meʻa ʻoku hoko ʻi hotau ngaahi ʻapisiasi fakakoló, fakauōtí, mo e fakasiteikí.”

Ngaahi Liliu ʻi he Siasí

ʻOku fakataumuʻa e ngaahi liliu ʻoku fai ki he aʻusia ʻi he Siasí, ke poupou ke lahi ange ʻa hono ako mo moʻuiʻaki ʻo e ongoongoleleí ʻi ʻapi. ʻOku kau he ngaahi liliu ko ʻení, ʻa hono liliu ʻo e taimitēpile fakauike ki he Sāpaté ke kau ai:

• Ha houalotu sākalamēniti miniti ʻe 60,

• Ha taimi vahevahe kalasi miniti ʻe 10,

• Ha kalasi miniti ʻe 50, ʻo hangē ko ia ʻoku fakamatalaʻi atu ʻi he sīpinga ʻi laló:

Taimitēpile ʻo e Sāpaté ʻo kamata ʻi Sānuali 2019
miniti ʻe 60	Houalotu sākalamēnití
miniti ʻe 10	Vahevahe kalasi
miniti ʻe 50	Kalasi ki he kakai lalahí; kalasi ki he toʻu tupú; Palaimelí

ʻE kau he kalasi miniti ʻe 50 ha Palaimeli fakauike maʻá e fānaú kae fetongitongi e toʻu tupú mo e kakai lalahí ʻo hangē ko ʻení:

• Sāpate ʻuluakí mo e tolú: Lautohi Faka-Sāpate.

• Sāpate uá mo e faá: Ngaahi kōlomu lakanga fakataulaʻeikí, Fineʻofá mo e Kau Finemuí.

• Sāpate nimá: fai e houalotu ʻa e toʻu tupú mo e kakai lalahí ʻo fakatatau mo e fakahinohino ʻa e pīsopé.

Kapau ʻoku tokolahi feʻunga ha Palaimeli ke vahevahe ki he Palaimeli tamaiki īkí mo e tamaiki lalahí, ʻoku totonu ke fulihi ʻe he kau takí ʻo ʻai e taimitēpilé ki he vahe ua ʻe taha ʻo e fānaú pea liliu mo e taimí ʻo ka fie maʻu.

Taimi-tēpile ʻo e Palaimelí ʻo kamata ʻi Sānuali 2019
miniti ʻe 25	Lotu, potu folofola pe tefito ʻo e tuí, kiʻi lea (miniti ʻe 5) Taimi hiva: hiva ʻoku poupou ki he ngaahi potu folofola naʻe ako ʻi he kalasí (miniti ‘e 20)
miniti ʻe 5	Vahevahe kalasi
miniti ʻe 20	Ngaahi kalasí: lēsoni mei he Haʻu, ʻo Muimui ʻIate Au—Maʻá e Palaimelí

Ngaahi Liliu ki he Nāunau Fakalēsoní

ʻOku fetākinima e ngaahi liliu ko ʻeni ki he taimi ʻo e ngaahi houalotú, pea mo e nāunau fakalēsoni foʻou taha ʻa e Siasí ko e Haʻu, ʻo Muimui ʻIate Au. ʻE kamata ʻi Sānuali, hono fakafenāpasi e nāunau fakalēsoni fakatefito ko ʻeni ʻi ʻapi kae poupou ki ai e Siasí, ki he meʻa ʻoku ako ʻe he kakai lalahí, toʻu tupú mo e fānaú ʻi he ngaahi kalasi Lautohi Faka-Sāpaté mo e Palaimelí, ʻo faingofua ai ke ako fakataha e ngaahi fāmilí ʻi ʻapi lolotonga ʻa e uiké.

ʻE lava ke maʻu e fakahinohinó, fokotuʻutuʻu ʻo e lēsoní mo e ngaahi maʻuʻanga tokoní ʻi he:

• Haʻu, ʻo Muimui ʻIate Au—Maʻá e Kōlomu Kaumātuʻá mo e Fineʻofá (maʻu ʻi he Ensign mo e Liahona ʻo Nōvema 2018)

• Haʻu, ʻo Muimui ʻIate Au—Maʻá e Ngaahi Kōlomu Lakanga Taulaʻeiki Faka-ʻĒloné

• Haʻu, ʻo Muimui ʻIate Au—Maʻá e Kau Finemuí

• Haʻu, ʻo Muimui ʻIate Au—Maʻá e Lautohi Faka-Sāpaté

• Haʻu, ʻo Muimui ʻIate Au—Maʻá e Palaimelí

Hū ki he comefollowme.lds.org ke maʻu ha fakamatala lahi ange.

ʻOku kau e ngaahi meʻá ni he ngaahi liliu mahuʻingá:

• ʻE fakahoko fakakuata kae ʻikai fakamāhina e fakataha alēlea ʻa e kau faiakó.

• He ʻikai toe kau he taimitēpile ʻo e lēsoni ʻa e kōlomu kaumātuʻá mo e Fineʻofá, ha fakataha alēlea he Sāpate ʻulukí pe ko ha tefito makehe ʻi he Sāpate faá. ʻE fakatefito pē lēsoní ʻi he ngaahi pōpoaki ʻo e konifelenisi lahi fakamuimuitahá.

• ʻE hanga ʻe he taimi hivá ʻo fetongi e taimi feʻinasiʻakí. He ʻikai ke toe ʻi ai ha Fokotuʻutuʻu ki he Taimi Feʻinasiʻakí.

• He ʻikai ke toe fai e kalasi Ngaahi Tefitoʻi Moʻoni ʻo e Ongoongoleleí. ʻE fakaafeʻi e kāingalotu mo e kaungāmeʻa kotoa pē ʻoku mahuʻingaʻia aí, ke nau takitaha ō ki heʻenau kalasi Lautohi Faka-Sāpate ʻa e kakai lalahí pe toʻu tupú.

• Ko e ngaahi kalasi kehe ne ala fakahokó — hangē ko hono fakamālohia ʻo e nofomalí mo e fāmilí, teuteu ki he temipalé, teuteu ngāue fakafaifekaú mo e hisitōlia fakafāmilí, he ʻikai ke toe fai ia he taimi kalasi ʻo e Sāpaté. ʻE lava ke ke akoʻi e ngaahi kalasí ni ʻi ha ngaahi taimi kehe maʻá e fakafoʻituituí, ngaahi fāmilí pe kulupú, ʻo fakatatau mo e ngaahi fie maʻu fakalotofonuá pea fakatatau mo e fakahinohino ʻa e pīsopé.

Taumuʻa ʻo e Ngaahi Liliú Ni

ʻOku feinga e kau taki ʻo e Siasí ke potutatau mo fakafehokotaki lelei ange ʻa e ngaahi aʻusia fakaivia makehe ʻi ʻapi mo e Siasí, ʻo fakakaukauʻi ha ngaahi taumuʻa tukupau.

Naʻe pehē ʻe ʻEletā Kuki, “ʻOku ʻi ai ha meʻa mahuʻinga ange ki he liliu ko ʻení mei hono fakanounouʻi pē ʻo e taimitēpile ki ʻapisiasi he Sāpaté.” “ʻOku kau e ngaahi meʻá ni ʻi he ngaahi taumuʻa mo e tāpuaki ʻoku fekauʻaki mo e liliu ko ʻení pea mo ha ngaahi liliu kehe kimui ní:

• “Ko ha ului ʻoku loloto ange ki he Tamai Hēvaní pea mo e ʻEiki ko Sīsū Kalaisí mo fakamālohia e tui kiate Kinauá.

• “Fakamālohia e fakafoʻituituí mo e fāmilí ʻi he nāunau fakalēsoni ʻoku fakatefito ʻi ʻapi kae poupouʻi ʻe he Siasí, ʻa ia ʻoku tokoni ki hono moʻui fiefia ʻaki ʻo e ongoongoleleí.

• “Fakaʻapaʻapaʻi e ʻaho Sāpaté, ʻo tokanga taha ki he ouau ʻo e sākalamēnití.

• “Tokoniʻi e fānau kotoa ʻa e Tamai Hēvaní he ongo tafaʻaki ʻo e veilí ʻi he ngāue fakafaifekaú mo hono maʻu e ngaahi ouau mo e ngaahi fuakava pea mo e ngaahi tāpuaki ʻo e temipalé.”

Ki hono fanongonongo ʻo e ngaahi liliú ni, vakai ki he “Lea Fakafeʻiloaki” ʻa Russell M. Nelson, ʻi he peesi 6 ʻo e makasini ko ʻení; Quentin L. Cook, “Ko ha Ului Moʻoni mo Tuʻuloa ki he Tamai Hēvaní mo e ʻEiki ko Sīsū Kalaisí,” ʻi he peesi 8. Ki ha fakamatala lahi ange fekauʻaki mo e ngaahi liliú ni, vakai ki he sabbath.lds.org ke maʻu e tohi mei he Kau Palesitenisī ʻUluakí, ngaahi tali ki he ngaahi fehuʻi ʻoku lahi hono ʻeké, mo ha ngaahi maʻuʻanga tokoni kehe ʻe ala tokoni ki he fakafoʻituituí mo e ngaahi fāmilí ke fakaʻapaʻapaʻi e Sāpaté.