Ko e Hoko ko ha Kāingalotu Faʻifaʻitakiʻangá
Fai ʻe Palesiteni Russell M. Nelson
ʻOku ʻoatu hoku ʻofa mo ʻeku tāpuakí kiate kimoutolu, ke mou keinanga ʻi he folofola ʻa e ʻEikí pea fakahoko ʻEne ngaahi akonakí ʻi hoʻomou moʻui fakatāutahá.
Kuo hoko ʻeni ko ha konifelenisi fakalotomāfana mo fakahisitōlia. ʻOku tau hanganaki loto vēkeveke atu ki he kahaʻú. Kuo fakalotoa kitautolu ke tau toe ngāue ke lelei ange pea hoko ʻo lelei ange. Kuo fakaʻeiʻeiki e ngaahi pōpoaki fakaofo kuo ʻoatu mei he tuʻunga malangá ni ʻe hotau Kau Taki Māʻolungá mo e Kau ʻŌfisa Māʻolungá kae pehē ki he hivá! ʻOku ou tapou atu ke mou ako e ngaahi pōpoakí ni, ʻo kamata he uiké ni.1 ʻOku nau fakahaaʻi atu e fakakaukau mo e finangalo ʻo e ʻEikí maʻa Hono kakaí he ʻahó ni.
ʻE malava ʻe he nāunau fakalēsoni foʻou ʻoku fakatefito ʻi ʻapi kae poupouʻi ʻe he Siasí, ʻo tukuange mai e mālohi ʻo e ngaahi fāmilí, ʻi he muimui faivelenga ki ai ʻa e fāmili takitaha mo liliu honau ʻapí ke hoko ko ha ungaʻanga ʻo e tuí. ʻOku ou palōmesi atu ʻi hoʻomou ngāue mālohi ke fakafoʻou homou ʻapí ke hoko ko ha senitā ki hono ako ʻo e ongoongoleleí, ʻe ʻalu pē taimí mo e hoko moʻoni homou ʻaho Sāpaté ko ha meʻa fakafiefia. ʻE fiefia hoʻo fānaú ke ako pea moʻuiʻaki e ngaahi akonaki ʻa e Fakamoʻuí, kae hōloa e ivi takiekina ʻo e filí ʻi hoʻo moʻuí mo ho ʻapí. ʻE hoko ha ngaahi liliu lahi mo tuʻuloa ʻi homou fāmilí.
Kuo fakamālohia ʻetau tukupā he konifelenisí ni ke tau feinga mālohi ke fakaʻapaʻapa ki he ʻEiki ko Sīsū Kalaisí ʻi he taimi kotoa pē ʻoku tau lea ai ki Hono Siasí. ʻOku ou palōmesi atu ko ʻetau tokanga faivelenga ko ia ke fakaʻaongaʻi totonu e hingoa ʻo e Siasi ʻo e Fakamoʻuí mo hono kāingalotú, ʻe tupulaki ai e tuí mo e malava ko ia ke maʻu ha mālohi fakalaumālie lahi ange ʻe he kāingalotu ʻo Hono Siasí.
Tau hoko atu ki he kaveinga ʻo e ngaahi temipalé. ʻOku tau ʻiloʻi ʻoku mahuʻinga hotau taimi ʻi he temipalé ki hotau fakamoʻuí mo e hakeakiʻí, kae pehē ki hotau fāmilí.
Hili ʻetau maʻu hotau ngaahi ouau fakatemipalé mo fai ha ngaahi fuakava toputapu mo e ʻOtuá, ʻoku tau takitaha fie maʻu ke hokohoko atu e fakaivia mo e akoʻi fakalaumālie ko ia ʻoku toki malava pē ke maʻu ʻi he fale ʻo e ʻEikí. Pea ʻoku fie maʻu ʻe heʻetau ngaahi kuí ke tau fakafofongaʻi kinautolu.
Fakakaukau angé ki he mohu ʻaloʻofa mo e anga totonu ʻa e ʻOtuá, ʻa ia naʻá Ne ʻomi ha founga ke foaki mai ai e ngaahi tāpuaki ʻo e temipalé kiate kinautolu ne pekia teʻeki ke nau ʻilo e ongoongoleleí, kimuʻa pea ʻai e tuʻunga ʻo e māmaní. Ko e ngaahi ouau fakatemipale toputapu ko ʻení ko e tukuʻau mai ia mei he kuonga muʻá. ʻOku fakafiefia ʻene fakakuongamuʻá pea ko ha fakamoʻoni ia ʻe taha ʻo ʻene moʻoní.2
Siʻi kāinga ʻofeina, ʻoku fakautuutu pē ʻoho ʻa e filí, pea fakalalahi hono mālohí mo kehekehe.3 ʻOku toe fakautuutu ange ʻa e fie maʻu ke tau ʻalu maʻu pē ki he temipalé. ʻOku ou kole atu ke mou tuku ha taimi ke mou vakai fakalelei ai ki he anga hono fakaʻaongaʻi ho taimí. Fakaʻaongaʻi lelei ho taimí koeʻuhí ko ho kahaʻú mo ho fāmilí. Kapau ʻokú ke lava ʻo ʻalu ki he temipalé, ʻoku ou tapou atu ke ke feinga ke ke fetuʻutaki maʻu pē mo e ʻEikí—ʻo ʻalu ki Hono fale māʻoniʻoní—pea tauhi pau maʻu pē taimi ko iá ʻi he fiefia. ʻOku ou palōmesi atu ʻe ʻomi ʻe he ʻEikí ha ngaahi mana ʻokú Ne ʻafioʻi ʻokú ke fie maʻu ʻi hoʻo feilaulau ke tokoni mo moihū ʻi Hono temipalé.
ʻOku ʻi ai hatau temipale ʻe 159 kuo fakatapui. ʻOku mahuʻinga ʻaupito kiate kimautolu ʻa e tokangaʻi fakalelei mo e tauhi ʻo e ngaahi temipale ko iá. ʻI he fakalau ʻa e taimí, ʻoku fie maʻu e ngaahi temipalé ke fakaleleiʻi mo fakafoʻou. ʻI he ʻuhinga ko iá, ʻoku fai ha ngaahi palani he taimí ni ke fakaleleiʻi mo fakafoʻou e Temipale Salt Lake pea mo e ngaahi temipale paionia kehé. ʻE vahevahe atu e fakaikiiki ʻi he ngaahi ngāué ni ʻi hono fakahokó.
ʻOku mau fiefia he ʻahó ni ke fanongonongo atu ha palani ke langa ha temipale ʻe 12. ʻE langa e ngaahi temipale ko iá ʻi he ngaahi feituʻu ko ʻení: Menitosa, ʻĀsenitina; Salavatoa, Palāsila; ʻIupa Siti, Kalefōnia; Penomi Peni, Kemipoutia; Palaia, Keipi Veti; ʻAiko, Kuami; Puepilā, Mekisikou; ʻOkalani, Nuʻu Sila Lākosi, Naisīlia; Tavao, Filipaini; Seni Huani, Pueto Liko; mo e Vahefonua Uāsingatoní, ʻIutā.
Mahalo he ʻikai hanga ʻe hono langa ʻo e ngaahi temipale ko ʻení ʻo liliu hoʻo moʻuí, ka kuo pau ke liliu ai ho taimi ʻi he loto temipalé. Kiate kinautolu kuo fuoloa ʻenau mavahe mei he temipalé, ʻoku ou tapou atu ke mou teuteu pea foki leva ki ai he vave tahá. Pea ʻoku ou fakaafeʻi kimoutolu ke mou mōihū ʻi he temipalé mo lotua ke ongoʻi e ʻofa taʻefakangatangata ʻa e Fakamoʻuí maʻaú, ke mou maʻu haʻamou fakamoʻoni ʻokú Ne tataki ʻEne ngāue toputapu mo tuʻuloa ko ʻení.4
Siʻi kāinga ʻofeina, ʻoku ou fakamālō atu ʻi hoʻomou tuí mo e poupoú. ʻOku ʻoatu hoku ʻofa mo ʻeku tāpuakí kiate kimoutolu, ke mou keinanga ʻi he folofola ʻa e ʻEikí pea fakahoko ʻEne ngaahi akonakí ʻi hoʻomou moʻui fakatāutahá. ʻOku ou fakapapauʻi atu ʻoku hokohoko atu e maʻu fakahaá ʻi he Siasí pea ʻe hokohoko atu ia kae ʻoua ke “fakahoko e ngaahi taumuʻa ʻa e ʻOtuá pea folofola ʻa Sihova Māfimafi kuo lava ʻa e ngāué.”5
ʻOku ou tāpuekina kimoutolu ʻaki he tui lahi ange kiate Ia mo ʻEne ngāue māʻoniʻoní, pea ʻaki e tui mo e kātaki lahi ke matuʻuaki e ngaahi faingataʻa ʻi he moʻuí. ʻOku ou tāpuekina kimoutolu ke mou hoko ko ha Kāingalotu moʻui faʻifaʻitakiʻanga. Ko e tāpuakí ia mo ʻeku fakamoʻoni ʻoku moʻui ʻa e ʻOtuá! Ko e Kalaisí ʻa Sīsū! Ko Hono Siasí ‘eni. Ko Hono kakai kitautolu, ʻi he huafa ʻo Sīsū Kalaisi, ʻēmeni.