Ngaahi Fakataha he Sāpate Faá (ʻOkatopa—Tīsema 2018)
Ako Fakataautaha mo Fakafāmili ʻo e Folofolá
ʻI he ngaahi Sāpate fā ʻo e 2018, ʻe aleaʻi ai ʻe he kōlomu ʻo e kaumātuʻá mo e Fineʻofá ʻa hono ako fakataautaha mo fakafāmili ʻo e folofolá. ʻE lava ke fili ʻe he kau takí pe kau faiakó ke fakahoko e ngaahi fealēleaʻakí ʻi ha taha ʻo e ngaahi tefitoʻi moʻoni ko ʻení.
Ako Folofola Fakatāutahá
Ke tokoni ke ueʻi e kau mēmipá ke nau ako maʻu pē e folofolá, fakakaukau ke fakaafeʻi e mēmipa takitaha ke ne fili ke lau ha taha ʻo e ngaahi potufolofola ko ʻení: Sosiua 1:8; 2 Tīmote 3:15–17; 1 Nīfai 15:23–25; 2 Nīfai 32:3; Tokāteline mo e Ngaahi Fuakava 11:22–23; 33:16–18. Hili ʻenau maʻu ha taimi feʻunga ke lau mo fakalaulauloto aí, ʻe lava ke nau vahevahe mo ha taha kehe ʻi he lokí ʻa e meʻa naʻe akoʻi ange heʻenau potufolofolá fekauʻaki mo e ako folofolá.
ʻE lava foki ke ke fakaafeʻi e kau mēmipá ke nau vahevahe ʻenau fakamoʻoni ki he ngaahi tāpuaki ʻoku nau maʻu ʻi heʻenau ako e folofolá. ʻE lava foki ke ʻaonga ki he kau mēmipá ke nau fanongo ki heʻenau fevahevaheʻaki ʻa e meʻa ʻoku nau fai ke ʻuhingamālie ange ai hono ako fakataautaha e folofolá (vakai ki ha ngaahi sīpinga ʻi he “Ngaahi Fakakaukau ki hono Fakatupulaki Hoʻo Ako Fakataautaha ʻa e Folofolá” ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí). ʻE lava foki ke ke vahevahe mo e kau mēmipá ʻa e meʻa naʻe akoʻi ʻe ʻEletā Quentin L. Cook fekauʻaki mo e “ngaahi taumuʻa mo e tāpuaki ʻoku fekauʻaki mo e liliu ko ʻení mo e ngaahi liliu kehe kimui ní” (vakai, “Ului Moʻoni mo Tuʻuloa ki he Tamai Hēvaní pea mo e ʻEiki ko Sīsū Kalaisí,” Liahona, Nōv. 2018). ʻE lava ke aleaʻi ʻe he kau mēmipá ʻa e founga ʻe tokoni ai ʻetau feinga ke fakatupulaki ʻetau ako folofolá ki hono aʻusia e ngaahi taumuʻa ko ʻení. ʻE lava foki ke ueʻi fakalaumālie ʻa e kau mēmipá ʻe he ngaahi vitiō ko ʻeni he LDS.org: “Words with Friends,” “Ko e Ngaahi Tāpuaki ʻo e Folofolá,” “Meʻakai Fakaʻahó: Sīpingá,” mo e “What Scriptures Mean to Me.”
Ko Hono Ako Maʻu Pē e Ongoongoleleí
Naʻe fakafehoanaki ʻe ʻEletā David A. Bednar e ako folofola maʻu peé mo e ngaahi tōʻonga māʻoniʻoni kehé, ki ha tā valivali ʻaki mataʻipolosi iiki ke maʻu ha fakatātā fakaʻofoʻofa. Ke tokoni ke mahino ki he kau mēmipá ʻa e meʻa naʻe akoʻi ʻe ʻEletā Petinaá, ʻe lava ke ke fakaʻaliʻali ha fakatātā ʻoku ʻasi ai e mataʻipolosi ʻo e tokotaha tā fakatātaá. ʻE lava leva ke lau ʻe he kau mēmipá ʻa e fakamatala ʻa ʻEletā Petinā ʻoku maʻu ʻi he “Faivelenga mo Tokanga ʻo Lahi Ange ʻi ʻApi” (Liahona, Nōvema 2009, 19–20), pea aleaʻi e founga ʻoku faitatau ai e mataʻipolosi ʻi he fakatātaá mo e ako folofolá. Ko e hā kuó ne tokoniʻi kitautolu ke tau ikunaʻi e ngaahi meʻa ʻokú ne fakafeʻātungiaʻi ʻetau ako folofola maʻu peé, neongo pe ʻoku tau ako fakafoʻituitui pe fakafāmili ʻa e folofolá? Ko e hā naʻe palōmesi ʻe Palesiteni Russell M. Nelson kiate kinautolu ʻoku nau “ngāue mālohi ke fakafoʻou [honau ngaahi ʻapí] ke hoko ko ha senitā ki hono ako ʻo e ongoongoleleí”? (vakai, “Ko e hoko ko ha Kāingalotu Faʻifaʻitakiʻangá,” Liahona, Nōv. 2018). Tuku ange ha taimi maʻá e kau mēmipá ke nau fakalaulauloto mo vahevahe ʻa e meʻa ʻoku ueʻi kinautolu ke nau fai koeʻuhí ko e meʻa ne nau ako he ʻaho ní.
Fealēleaʻaki ki he Ongoongoleleí ʻi ʻApi pea mo e Siasí
Ko ha founga ʻe taha ke tokoni ai ke mahino ki he kau mēmipá ʻa e mahuʻinga ke aleaʻi e ongoongoleleí ʻi ʻapi pea ʻi he lotú, ko hano fakaafeʻi ha taha e fānaú pe ko ha mātuʻa ke nau hivaʻi ʻa e “Akoʻi Au ke U ʻEva he Māmá” (Ngaahi Himi, fika 196). Ko e hā ʻoku akoʻi mai ʻe he fakalea ki he feohi ʻa e fānau mo e mātuʻá ʻi he foʻi hiva ko ʻení, ʻo fekauʻaki mo hono ako e ongoongoleleí? Mahalo ʻe loto fiemālie ha kau mēmipa ʻe niʻihi ke vahevahe ʻenau fakakaukau ki he founga ke hoko ai hono aleaʻi ʻo e ongoongoleleí ko ha konga angamaheni ʻo e moʻui fakafāmilí. ʻE lava ke ʻoatu ʻe he ngaahi folofola ko ʻení ha fakakaukau: Teutalōnome 11:18–20; 1 Pita 3:15; Mōsaia 18:9; Molonai 6:4–5, 9; Tokāteline mo e Ngaahi Fuakava 88:122. Ko e hā ha founga ʻoku hanga ai ʻe heʻetau ngaahi fealēleaʻaki ʻi ʻapi pea ʻi he lotú, ʻo ʻai ke tau toe ofi ange ki he Tamai Hēvaní mo Sīsū Kalaisí?