ITUKUTUKU NI VEILIUTAKI NI IWASEWASE
A Cava na iValavala sa Kilikili Kei Kemudou na Tagane se Yalewa Mo Dou Vakataka? Io me Vakataki Jisu ga!
“Na lalawa sa tukuna tiko na gagadre ni yaloda kei na noda rai ni veika meda na rawata. Mai na lalawa kei na ituvatuva, sa vukici na noda inuinui meda cakacakataka. Na vakarautaki ni lalawa kei na tuvatuva era sa cakacaka ni vakabauta”.1
E dua na taro sa yavu tikoga ni noqu lalawa tudei kei na gugumatua, a cava na ivalavala sa kilikili kei au meu vakataka?
Ena Tabana ni Kaulotu e Niu Siladi Okaladi ‘NZAM’ (2011-2014), oi au kei watiqu, o Becky keirau sa cavuqaqataka vata kei ira na daukaulotu tudei na ka keimami vakatoka, Nanuma! Ena loma ni cavuqaqa oqo e tiko kina na ivolanikalou oqo:
“Ia a cava na ivalavala sa kilikili kei kemudou (na tagane se yalewa)? Au sa kaya vakaidina vei kemudou, mo dou vakataki au” (3 Nifai 27:27).
Ni da vakananuma na tikina oqo ena veiyabaki veitaravi, e votu ki na noqu vakasama e rua na taro:
1. Na cava na vuna sa vakaroti keda kina o Jisu Karisito me da vakataki Koya kina?
Au vakabauta ni sa baleta tiko vakalevu ki na Nona nanuma baleti keda. E lomani keda sara vakalevu ka vinakati keda meda bula sotava na reki. Na reki vata kei na noda vuvale, ena noda sasaga ni bula oqo, ni da veiqaravi tiko ena Matanitu ni sa yaco meda kilai Koya. Na voleka ga ni noda lomavata kei Koya, ena rawa vakalevu cake meda bula sotava na reki a vakamacalataka o Liai ena nona sa kania na ‘vuanikau’ (se dautukuni tu me veivakalougatataki ni Veisorovaki i Jisu Karisito). A kaya o Liai ni gauna au sa “kania tiko na vuanikau koya, sa vakasinaita na yaloqu ena marau levu sara”.2 A kaya o Jisu, “Au sa vosataka na veika oqo vei kemudou, meu sa marau tikoga ena vukumudou, ka me sinai na nomudou marau”.3
2. Ena sala cava vei keda na (tagane kei na yalewa e vuravura) meda na vakataki Jisu Karisito?
E veivuke o Tui Penijamini ena kena saumi na taro oqo ena kena tarogi e dua tale na taro: “Me na kila vakaevei na tamata na turaga ka sega ni bau qarava, ka sega ni kilai koya, ka yawa sara mai na vakanananu kei na gagadre ni lomana?”4
Dua na sala eda rawa ni vakataki Jisu Karisito kina o ya meda cakava ka cavuta na veika ena cakava ka kaya o Koya. “E dina, e dina, au sa kaya vei kemudou, oqo na noqu kosipeli; dou sa kila na ka sa dodonu mo ni kitaka ena noqu lotu; ia na ka kecega dou sa raica niu sa kitaka, mo dou kitaka talega; ia mo dou kitaka na ka kecega dou sa raica niu sa kitaka”.5
Me yaco meda vakataki Jisu Karisito, sa sureti keda o Koya meda ‘Lako Mai Vua’ ka cakava na ka sa cakava o Koya. Na cava a cakava o Koya?
Loloma kei na Loloma Uasivi—E vakavotuya vei keda o Joni ni “sa sega na nona loloma e dua na tamata”6 me uasivia na ka sa cakava vei keda o Jisu Karisito ni a solia na Nona bula me rawa ni da bula tale. Na Nona ivakaraitaki cecere sa ramase sara kivei keda nikua ni sa sureti keda tiko meda dodoliga yani ki na veivuvale kei na itokani ena sala sa vakavulica vei keda. “E dua na vunau vou kau sa solia vei kemudou, Mo dou veilomani; me vaka kau sa lomani kemudou, mo dou veilomani talega vakakina. A ka oqo era na kila kina na tamata kecega ni dou sa noqu tisaipeli, kevaka dou sa veilomani”.7
Vosota—A vakavulica vei keda o Jisu baleta na vosota ena ivakarau ni Nona bulataka na Nona bula. A vakalialiai, kasiviti, lawakitaki ka vakamatei e kauveilatai, “a sega na vosa tani a lako mai gusuna” io “me kakua ni yaco na noqu lewa, me yaco ga na nomuni lewa”.8 “Na bula sa sinai tu kina na veika dredre, eso era ka lalai ka so era sa ka bibi sara. Sa vaka me sega ni tarovi rawa na yaco tikoga mai ni ibolebole ki na tamata yadua kecega. Na noda leqa o ya ni da dau namaka me wali vakatotolo na ibolebole vakaoqo, ka guilecava ni sa gadrevi ena veigauna na dodonu vakalomalagi ni vosota”.9
Yalomalumalumu—Ena ivakaraitaki, mai na nona sucu (vosota na veika torosobu kece) ki na mate (na nona lauvako vakaloloma e kauveilatai e Kalivari ena kedrau maliwa e rua na daubutako) E vakavulica o Jisu na yalomalumalumu. Eda na caka vinaka meda nanuma tiko ka “vakananuma tiko ga na cecere ni Kalou, kei na nomuni sa ka wale sara, kei na nona vinaka kei na nona vosoti kemuni vakadede, oi kemuni na tamata tawayaga, ka mo ni vakayalomalumalumutaki kemuni ena yalomalumalumu sa titobu sara, ka dau kaciva na yaca ni Turaga e veisiga”.10
Gugumatua—“Na gugumatua e sasaga tudei, vakaivakarau, dina, ka kaukauwa ena kena vakayacori na cakacaka ni Turaga. Sa namaka tiko na Turaga vei iko [kei au] me daru cakacaka vagumatua—vakaivakarau kei na sasaga kei na kauwai cecere”.11
“Ia sa kilikili ki na tamata yadua me vulica na nona itavi, io me vakayacora ena yalodina na itavi ni itutu sa lesi kina”.12
Talairawarawa—“Na bula vakaivakarau e tiko ena talairawarawa e veisiga kei na bula savasava kei na bula sa taucoko ena bulia e dua na iyaragi e wavoliti iko ni veitaqomaki kei na veimaroroi mai na veitemaki e dau vakaleqai iko ni ko lako voli ena bula e vuravura”.13
“Koi au, na Turaga, au sa vauci ni dou muria na noqu vosa; ia ni dou sa sega ni muria na noqu vosa, sa sega na ka e yalataki vei kemudou”.14
Eda sa vakayagataka e dua na iwalewale rawarawa vata kei ira na daukaulotu ena NZAM au vakabauta ni se yaco tikoga ki na noqu bula nikua.
Cakacaka Vakaukauwa + Talairawarawa = Bula Marau (raica na Mosaia 2:41)
(Gugumatua)
Sa noqu inuinui kei na masu kivei keda yadua ni da tekivu tiko ena yabaki 2021, o ya meda na bula sotava (se bula sotava tikoga) na veisau levu ki yaloda e gadrevi me vinakati kina meda vakataki Jisu Karisito cake. Me nanumi tiko ni oqo sa sasaga ni bula taucoko—e veitaucici balavu sega ni veitau leleka. Na veivakalougatataki yalataki ni oi keda talega eda sa rawa ni bula sotava na reki a vakamacalataka o Liai ena gauna sa kila vinaka kina na bula kei na ilesilesi vakalotu i Jisu Karisito, oka kina na Nona Veisorovaki tawamudu.
Ni da sa ciqomi Jisu Karisito vakataucoko kei na Nona veivakavulici, eda sa lako vei Karisito, ka vakataucokotaki ki vua. Sa qai tukuni kina vei keda kevaka eda sa biuta tani vei keda na itovo sa tawakilikili kecega ka lomana na Kalou ena noda igu kecega, vakasama,kei na kaukauwa, sa qai rauti keda vinaka vakayadudua na nona loloma soliwale, ia “na nona loloma soliwale dou sa vakataucokotaki kina ena vukui Karisito; ka kevaka dou sa vakataucokotaki ena loloma soliwale ni Kalou ena vukui Karisito, dou na sega sara ni rawa ni cakitaka na kaukauwa ni Kalou”.15
Au kila ni ko Jisu Karisito na iVakabula ka Dauveivueti kei vuravura. Ni a mate ena vukuda, sa bula o Koya ena vukuda ka sa lomani keda o Koya. Au kila ni na tomana tikoga o Koya me dusimaka na noda ilakolako me rawa ni da kunea na reki ena bula oqo kei na bula e tarava. Sa noqu masu meda sa qai raicamatua tiko na noda sasaga kei na lalawa ni 2021 meda sa qai vakataka cake vakalevu na noda iVakabula, o Jisu Karisito.