Faivelenga ʻi he Fakaʻau ke Motuʻa Angé

Ngaahi Tāpuaki mo e Pole ʻo e Mali Taʻu Matuʻotuʻa Angé

Fai ʻe Christy Monson

ʻOku nofo ʻa e tokotaha naʻá ne faʻú ʻi ʻIutā, USA.

Ngaahi talanoa mo e tokoni ki hono fakamālohia ʻo e nofomalí ʻi ha faʻahinga taʻu motuʻa pē.

Tā fakatātā ʻa Malte Meuller; ʻata ʻo e mama malí mei he Getty Images

ʻE malava ke ʻi ai ha ngaahi liliu taʻe ʻamanekina ʻi he mali ʻi he konga kimui hoʻo moʻuí. Ka ʻi he fononga ha ongomeʻa mali ʻi he hala ko ʻení ʻi he tuí, te na lava ʻo maʻu ʻa e fiefia lahi pea fakatupulaki ha ngaahi ʻulungaanga faka-Kalaisi. Ko e ngaahi lēsoni ʻeni ʻe tolu ʻo e moʻuí mei ha niʻihi ʻoku nau feʻofaʻaki ʻi honau taʻu matuʻotuʻa angé, tānaki atu ki ai mo ha ngaahi tokoni ʻe tolu ki he ngaahi fāmili ʻoku fakatahaʻi koeʻuhí ko e femaliʻaki ʻenau mātuʻá. ʻOku ou fakatauange ʻe tokoni ʻa hono vahevahe ʻení ke ʻiloʻi ʻe he niʻihi matuʻotuʻa ʻoku nau mali foʻoú—pe ko kinautolu ʻoku kei fakatatali ke malí—ʻoku ʻikai ke nau tuenoa ʻi heʻenau fonongá. ʻE lava ke ʻomi ʻe he ngaahi tefitoʻi moʻoni nounou ko ʻení e ngaahi fakakaukau ki hono fakamālohia ha nofomali, ʻo tatau ai pē pe kuó mo fakataha ʻi ha taʻu ʻe 50 pe māhina ʻe 5.

Tauhi ha Tūkufua ʻOku Taʻengata

Naʻe ʻikai fakakaukau ʻa Mona (kuo liliu e hingoá) ʻe faifai pea maʻu hano hoa taʻengata hili ha mali ʻe ua ne ʻikai ola lelei. Naʻá ne hiki ki ha senitā ki he kau maʻu vāhenga mālōloó ʻo fetaulaki ai mo Popi. Naʻá na kaungāmeʻa, pea naʻe fakafeʻiloaki [ʻe Mona ʻa Popi] ki he ongoongoleleí. ʻI he taimi naʻá na fakamaʻu ai ke malí, naʻe puke ʻa Popi ʻi he kanisaá. Naʻá ne fehuʻi ange kia Mona pe ʻoku kei fie mali pē mo ia.

Naʻe pehē ange [ʻe Mona], “ʻIo. Ko ʻeku mali mo koé ki he taʻengatá, ʻoku ʻikai ko e moʻuí ni pē.”

Naʻe mali ʻa e ongomeʻá, pea naʻe papitaiso ʻa Popi. Naʻá na fakatou heka saliote teketeke ʻi hono silaʻi kinaua ʻi he temipalé. Naʻē pehē ʻe Mona naʻe hā meia Popi ha maama fakasilesitiale ʻi he ʻaho ko iá. Naʻá ne moʻui ʻi ha māhina ʻe ono, ʻo fiefia ʻi he ʻaho kotoa mo hono ʻofaʻangá. ʻOku ʻikai faʻa tatali ʻa Mona ki he taimi te na toe fakataha aí.

Akoako ʻa e Fetuʻutakí

ʻI he taimi naʻe ʻofa ai ʻa Keasi ʻia ʻAlipaté, naʻá ne manavasiʻi naʻa toe hangē ko e ngaahi sīpinga fetuʻutaki kovi naʻá ne fekuki mo ia ʻi heʻene fuofua nofomalí. Ko ia, naʻá na toʻo fakataha ai ha kalasi nofomali, ʻa ia naʻá na ako ai ke:

1. Akoako e taukei fakafanongó.

2. Vahevahe totonu e ngaahi ongó.

3. Fengāueʻaki fakataha, kae ʻikai ko e feʻauʻauhi.

4. Felotoi ʻoku ʻikai ke mo tui tatau ʻi hano fie maʻu.

5. Aleaʻi ʻa hono puleʻi ʻo e paʻangá.

Naʻe pehē ʻe Keasi, “ʻOku fie maʻu ʻa e akoakó ki hono langa ko ia ha nofomali ʻoku tuʻuloá, ka ʻoku feʻunga pē ʻema feʻofaʻakí ke ngāueʻi ia.”

Fakahoko ʻa e Ngaahi Liliú ʻi he ʻOfa

Naʻe fakakaukau lahi ʻa ʻAmanitā ki hono tāpuaki fakapēteliaké. Naʻe pehē te ne hoko ko ha takiekina maʻongoʻonga ki heʻene fānaú mo e makapuná, ka kuó ne fakalaka mei he taʻu motuʻa ke maʻu ai ha fānaú pea kuo teʻeki ai ke ne mali. Naʻá ne fetaulaki leva mo Petuliki, ko ha pailate. Naʻá na fiefia ʻi he fanongo fakataha ki he mūsiká mo e vaʻinga tā-pulú. Hili ha kiʻi taimi, naʻá na mali.

Naʻe tomuʻa mālōlō ʻa e ʻuluaki uaifi ʻo Petulikí, ʻa ia naʻe ʻi ai haʻana fānau fefine ʻe toko tolu. Neongo naʻa nau mamahi ʻi he mole ʻenau faʻeé, ka naʻe faifai pē pea nau tali ʻa e ʻofa ʻa ʻAmanitaá. Ne ʻosi mei ai ha ngaahi taʻu.

ʻI he ʻaho ʻe taha ne puna vakapuna ʻa Petuliki pea ʻikai ke ne toe foki mai. Hili ha ngaahi uike ʻo e fekumí, naʻe maʻu ʻa e vakapuná ʻi ha anovai ofi mai pē. Naʻe fakatokangaʻi ʻe ʻAmanitā ko ia pē ʻa e mātuʻa ʻoku kei moʻui ki he fānau fefine ʻa Petulikí. Naʻá ne feinga lahi ange ke poupou mo fetuʻutaki mo kinautolu, tautautefito ki he lolotonga ʻenau mamahí.

ʻOkú ne vāofi ʻaupito mo ʻene fānau fefine hono uá he taimí ni. ʻOku nau telefoni kiate ia ke maʻu ha faleʻi pea kumi tokoni kiate ia hili ha ʻaho fakamafasia. ʻI he loto-fakatōkilalo mo e loto-houngaʻia, ʻoku fakatokangaʻi ʻe ʻAmanitā ʻoku lolotonga fakakakato ʻa hono tāpuaki fakapēteliaké.

Ngaahi Tokoni ʻe Tolu maʻá e Ngaahi Fāmili ʻOku Fakatahaʻi ʻi he Femaliʻaki ʻa e Mātuʻá

1. Vaʻinga fakataha. Ko e mali hono ua ʻeni ʻa Teli mo Lusinitaá fakatouʻosi. ʻOku saiʻia ʻa e foha-hono-ua ʻo Telí ʻi he tā-pulú, ko ia ʻokú na palani ha ʻaho tā-pulu fakataha ʻi he uike takitaha. ʻOku fokotuʻutuʻu ʻe Lusinitā ha ʻēlia makehe ʻoku ʻi ai ʻa e ʻū tohi, keimi, mo e pāsolo maʻá e ngaahi makapuná ʻi heʻenau ʻaʻahi maí.

2. Faʻa kātaki. Hili e mali ʻa Keasi mo ʻAlipaté, naʻe ʻikai fie ʻaʻahi mai ʻa e fānau ʻa Keasí ʻi he Kilisimasí. Naʻe fakakaukau ʻa e ongomeʻa malí ke na tufa ha ʻū meʻaʻofa, fāʻofua ki he ngaahi makapuná, pea fakahoko ki he tokotaha kotoa ʻoku talitali lelei kinautolu ʻi ha taimi pē. Naʻe ʻikai ke fuoloa kuo fakaʻau ke ʻofa ʻa e fāmilí kotoa ʻia ʻAlipate pea kamata ke nau kau fakataha mai ʻi he ngaahi ʻaho mālōloó.

3. Feinga mālohi ange ke fai ha fehokotaki. ʻOku laukonga ʻa ʻAmanitā ki hono ngaahi makapuna foʻoú ʻi he komipiutá pea aʻu pē ki heʻene teuteu ha ngaahi lēsoni faingofua fakasaienisi maʻanautolu. ʻOku fakalele ʻe ha faʻē ʻe taha ha fepōtalanoaʻaki tuʻo taha he māhina mo e kau mēmipa ʻo e fāmilí ʻoku nau movete ʻi he funga ʻo e fonuá.

Mahalo he ʻikai faingofua ke ʻofa ʻi he niʻihi ʻoku nau omi ki heʻetau moʻuí—hangē ko e hoa mali mo e fānau foʻoú—ka ʻe lava ʻe he nofomalí mo e ngaahi fāmili foʻoú ʻo fetongi ʻa e tuenoá ʻaki ʻa e fiefia. ʻI heʻetau kole ki he Tamai Hēvaní ke tāpuekina kitautolu ʻaki ʻa e ʻofa faka-Kalaisí, te tau lava ʻi ha faʻahinga taʻu motuʻa pē ke taau ange ke feʻiloaki mo hotau Fakamoʻuí.