Kuo Fakahā Mai ʻe he ʻOtuá ke Tau Papitaiso

Naʻe tā ʻe Sīsū Kalaisi ha sīpinga ʻo e papitaiso ʻe ha tokotaha ʻokú ne maʻu ʻa e mafai ʻa e ʻOtuá.

Neongo ʻoku ʻikai ke tau maʻu ha fakamatala fakaikiiki ʻo e moʻui fakataautaha ʻa Sīsū Kalaisí, ka ʻoku tau ʻilo naʻe papitaiso Ia ʻi Hono taʻu 30 nai (vakai, Luke 3:23). Ko e ngaahi meʻa ʻeni ʻoku tau ako fekauʻaki mo e papitaisó mei Heʻene sīpingá.

Ki he Tokotaha Kotoa Pē

Kapau ʻoku tau motuʻa mo matuʻotuʻa feʻunga ke ʻilo ʻa e faikehekehe ʻo e totonú mo e halá, ʻoku finangalo ʻa e Tamai Hēvaní ke tau papitaiso (vakai, Tokāteline mo e Ngaahi Fuakava 18:42). Naʻe haohaoa ʻa Sīsū, ka naʻá Ne kei fili pē ke papitaiso ke muimui ʻi he ngaahi fekau ʻa e ʻOtuá (vakai, Mātiu 3:13–17; 2 Nīfai 31:7). Naʻa mo e niʻihi kuo ʻosi pekiá, ʻe lava ke nau tali ʻa e papitaisó. ʻOku tau ʻoatu ia kiate kinautolu ʻaki e papitaiso maʻanautolu ʻi he ngaahi temipalé. (Vakai, Tokāteline mo e Ngaahi Fuakava 128:15–18.)

Fakahoko ʻaki e Mafai

Naʻe ʻikai papitaiso ʻa Sīsū ʻe ha taha noaʻia pē. Naʻá Ne hāʻele hangatonu ki Hono tokoua ʻaki ko Sioné, ʻa ia naʻá ne maʻu ʻa e lakanga fakataulaʻeiki ʻa e ʻOtuá. Hili e pekia ʻa Sīsū pea tamateʻi mo ʻEne kau ākongá, naʻe mole ʻa e lakanga fakataulaʻeikí mei he māmaní. ʻI he taʻu 1829, naʻe hā ai ʻa Sione Papitaiso kia Siosefa Sāmita ʻo foaki kiate ia ʻa e mafai ke faipapitaiso ʻi he huafa ʻo e ʻOtuá. Koeʻuhí ko e fakafoki mai ko iá, ʻoku tau maʻu ai ʻa e faingamālie ke papitaiso ʻaki e mafaí ʻi he ʻahó ni.

Fepalōmesiʻaki

ʻOku kau ʻi he papitaisó ha fepalōmesiʻaki, pe fuakava, ʻi hotau vahaʻa mo e ʻOtuá. ʻOku tau palōmesi:

Ke toʻo kiate kitautolu ʻa e huafa ʻo Kalaisí.
Ke manatu maʻu ai pē kiate Ia.
Ke tauhi ʻEne ngaahi fekaú.

ʻOku talaʻofa mai leva ʻe he ʻOtuá ʻe ʻiate kitautolu maʻu ai pē ʻa Hono Laumālié. ʻOku fakamanatu mai ʻe he ngaahi lea ʻo e lotu tāpuakiʻi ʻo e sākalamēnití ʻa e fuakava ko ʻení ʻi he uike takitaha. (Vakai, Tokāteline mo e Ngaahi Fuakavá 20:77, 79.)

Ko e Laumālie Māʻoniʻoní Ko Ha Konga Mahuʻinga ʻo e Papitaisó

ʻOku talamai ʻe he folofolá ʻi he hili ko ia hono papitaiso ʻo Sīsuú, naʻe hā ʻa e Laumālie Māʻoniʻoní ʻi he tatau ʻo ha lupe (vakai, 2 Nīfai 31:8). ʻI he ʻahó ni, hili hano papitaiso ʻo ha tokotaha, ʻoku hilifakinima ia. ʻOku ʻuhinga ʻeni ʻoku nau maʻu ha tāpuaki makehe ʻa ia ʻoku fakaafeʻi ke nau maʻu ʻa e meʻafoaki faifakamaʻa fakalaumālie ʻo e Laumālie Māʻoniʻoní (vakai, 2 Nīfai 31:17). ʻE lava ʻe he Laumālie Māʻoniʻoní ʻo fakatokanga mai ha fakatuʻutāmakí, fakafiemālieʻi kitautolu, tataki kitautolu ke fai ha ngaahi fili lelei, pea tokoniʻi kitautolu ke ongoʻi ʻa e ʻofa ʻa e ʻOtuá (vakai, Tokāteline mo e Ngaahi Fuakava 39:6).

Te Tau Lava Maʻu Pē ʻo Fakatomala

Naʻe ʻafioʻi ʻe he ʻOtuá te tau fai ha ngaahi fehalaaki ʻi he ʻaho kotoa pē. Neongo ʻetau ngaahi feinga lelei tahá, ka te tau faiangahala mo tōnounou ʻi heʻetau tauhi ʻetau ngaahi fuakava ʻi he papitaisó. Ko ia, ʻokú Ne ʻomi kiate kitautolu takitaha ʻa e faingamālie ke fakatomala. (Vakai, Tokāteline mo e Ngaahi Fuakava 18:13.) Te tau lava ʻo fai hotau lelei tahá ʻi he ʻaho kotoa pē ke kole fakamolemole pea fakatonutonu ha ngaahi fehalaaki. Te tau lava ʻo lotu mo kole ʻa e fakamolemole ʻa e ʻOtuá. Hili iá, ʻi heʻetau toʻo ʻa e sākalamēnití ʻaki e loto fakatōkilaló, te tau lava ʻo maʻu ʻa e Laumālie Māʻoniʻoní (vakai, 3 Nīfai 18:11).

Ko e Hā ʻa e Fakamatala ʻa e Folofolá fekauʻaki mo e Papitaisó?

ʻOku totonu ke tokoniʻi ʻe he mātuʻá ʻenau fānau ke mateuteu ki he papitaisó (vakai, Tokāteline mo e Ngaahi Fuakava 68:25).

ʻOku ʻikai fiemaʻu ke papitaiso ʻa kinautolu ʻoku taʻu siʻi hifo ʻi he taʻu valú (vakai, Molonai 8).

ʻI hono papitaiso kitautolú, ʻoku tau tukupā ke “tangi fakataha mo kinautolu ʻoku tangí; … fakafiemālieʻi ʻa kinautolu ʻoku ʻaonga ki ai ʻa e fakafiemālié, pea tuʻu ko e kau fakamoʻoni ʻo e ʻOtuá ʻi he taimi kotoa pē pea ʻi he meʻa kotoa pē pea ʻi he feituʻu kotoa pē” (Mōsaia 18:9).

Kiate Kimoua ʻa Hoku Ongo Kaungā-tamaioʻeiki, tā fakatātā ʻa Michael Malm mo Linda Curley Christensen