Maʻá e Mātuʻá
ʻOkú Ke Mahuʻinga Lahi
Haʻu ʻo Mamata, tā ʻa Del Parson
Siʻi Ngaahi Mātuʻa,
ʻOku ʻofaʻi mo fakamahuʻingaʻi kitautolu ʻe he ʻOtuá ʻo laka ange ʻi he meʻa te tau lava ʻo makupusí. ʻOku ʻoatu ʻe he ngaahi makasini ʻa e Siasí ʻi he māhina ní ha ngaahi fakamatala mo e ʻekitivitī kehekehe ʻe lava ke tokoniʻi koe ke akoʻi hoʻo fānaú fekauʻaki mo e fakatomalá, papitaisó, fakafoki mai ʻo e lakanga fakataulaʻeikí, pea ʻoku mahuʻinga lahi honau laumālié kiate koe pea ki heʻenau Tamai Hēvaní fakatouʻosi.
Fealēleaʻaki ʻi he Ongoongoleleí
Fanongo Kiate Ia Pea ʻIloʻi Hoto Mahuʻingá
Fakaʻaliʻali ʻa e fakatātā mo e kupuʻi lea mei he Fakamoʻuí ʻi he peesi 2. ʻI hoʻomou hoko ko e fāmilí, fakakaukau ki he ngaahi sīpinga mei he folofolá ʻo ha taimi naʻe mamata ai ʻa e Fakamoʻuí ki he mahuʻinga ʻo e laumālie ʻo ha taha. ʻE lava ke ke maʻu ʻi he peesi 32 mo e 35 ha ngaahi sīpinga fakaeonopooni ʻo e anga e ongoʻi ʻa e ʻEikí ʻo kau kiate kinautolu ʻoku pehē ʻe he sosaietí ʻoku siʻi ange honau mahuʻingá. Vahevahe ʻa e founga kuo tokoniʻi ai koe ʻe he Fakamoʻuí ke ke ʻiloʻi ho mahuʻingá pe ko e mahuʻinga ʻo ha tokotaha kehe.
Ko Hono Fakahaaʻi ki he Niʻihi Kehé ʻOkú Ke Mahuʻingaʻia ʻIate Kinautolú
Ko e founga ʻe taha ke tokoniʻi ai ʻa e niʻihi kehé ke nau ongoʻi ʻoku fakamahuʻingaʻi kinautolú ko hono tokoniʻi kinautolu. Ako ʻa e fakamatala ʻa Sani E. Niumani ʻi he peesi 16 pea fekumi ki heʻene ngaahi fakaafe kiate koé. Aleaʻi fakafāmili ʻi he faʻa lotu pe ko hai ʻoku ueʻi fakalaumālie koe ke tokoniʻí. Faʻu ha ngaahi palani ki he founga mo e taimi te ke tokoni ai ʻi he ʻofa ki he tokotahá ni.
Pe ko e hili ʻa e laukonga fekauʻaki mo e nofo pilīsone ʻi he peesi 32 pea talanoa fekauʻaki mo e founga te ke ala fakaʻaongaʻi ai ʻa e ngaahi fakakaukau ʻi he fakamatalá ke tokoniʻi kinautolu ʻoku nofo pilīsoné pe ko e founga te ke lava ai ʻo poupouʻi, ʻofaʻi mo fakakaungāmeʻa ki honau ngaahi fāmilí.
Ko Hono Teuteuʻi ʻo e Fānaú ki he Papitaisó
Te ke lava ʻo fakaʻaongaʻi ʻa e makasini ko ʻení ke tokoni ki hono teuteuʻi hoʻo fānaú ki honau papitaisó. ʻOku ʻoatu ʻe he “Ko Hono Tokoniʻi ʻo e Fānaú ke Teuteu ki he Papitaisó” ʻi he peesi 22 ha ngaahi fakakaukau maʻá e mātuʻá. Te ke lava ʻo maʻu ʻa e tali ki he ngaahi fehuʻi angamaheni fekauʻaki mo e papitaisó ʻi he “Ngaahi Tefitoʻi Meʻa Mahuʻinga ʻo e Ongoongoleleí” ʻi he peesi 6. Te ke maʻu ha ngaahi fakakaukau lahi ange ʻi he makasini Ko e Kaumeʻa ʻo e māhina ní.
Tokoni ki he Haʻu, ʻo Muimui ʻIate Au
Vakai ki he peesi 26 ki he naunau tokoni ki hoʻo ako fakauike ʻa e Haʻu, ʻo Muimui ʻIate Aú.
Fakafiefia e Ako Fakafāmilí
Siakale ʻo e Mahuʻingá
Tokāteline mo e Ngaahi Fuakava 10–19
Naʻe faleʻi ʻa ʻŌliva Kautele mo Tēvita Uitemā ke manatuʻi “ʻoku mahuʻinga lahi ʻa e ngaahi laumālié ʻi he ʻao ʻo e ʻOtuá” (Tokāteline mo e Ngaahi Fuakava 18:10). ʻI heʻetau tokoniʻi ʻa e niʻihi kehé ke nau ʻilo honau mahuʻingá, ʻoku tau ʻomi ai kinautolu ke ofi ange kia Kalaisi pea ʻi he taimi tatau ʻoku tau ofi ange ai kiate Ia.
-
Fakaafeʻi ʻa e kau mēmipa ʻo e fāmilí ke tangutu takatakai ʻi ha siakale.
-
ʻE taufetongi ʻa e tokotaha kotoa ʻi he tuʻu ʻi he lotomālie ʻo e siakalé.
-
ʻE talaange ʻe he tokotaha kotoa ʻoku tangutu ʻi he siakalé ki he tokotaha ʻi lotomālié, “ʻOkú ke mahuʻinga kiate au koeʻuhí ___________,” pea vahevahe ha ngaahi fakaiikiiki pau ʻo e ʻuhinga ʻoku mahuʻinga ai ʻa e tokotaha ko iá kiate kinautolú.
-
ʻE fili leva ʻe he tokotaha ʻi lotomālié ʻa ʻene fakamatala fakataautaha ki hono mahuʻinga fakatāutahá: “ʻOku ou mahuʻinga ki he ʻOtuá pea kiate au koeʻuhí ___________.”
Fealeaʻaki: Ko e hā ʻoku mahuʻinga ai ke manatuʻi hotau mahuʻingá kae pehē ki he mahuʻinga ʻo kinautolu ʻoku tau feohí? Kapau naʻe ʻi he siakalé ʻa Kalaisi, ko e hā naʻá Ne mei folofola fekauʻaki mo kitautolú? Lau ʻa e Tokāteline mo e Ngaahi Fuakava 18:10–13 pea aleaʻi ʻa e meʻa ne foua ʻe Kalaisi koeʻuhí ko ʻEne mahuʻingaʻia ʻiate kitautolú.