Haʻu, ʻo Muimui ʻIate Au
Ko hai ʻa Tēvita Uitemā?
Tokāteline mo e Ngaahi Fuakava 14–17
15–21 Fepueli
Naʻe fili ʻe he ʻEikí ha Kau Fakamoʻoni ʻe Toko Tolu ke nau mamata ki he ʻū lauʻi peleti koula ʻo e Tohi ʻa Molomoná ke nau lava ʻo “fakamoʻoni ki hono moʻoni ʻo e tohí pea mo e ngaahi meʻa ʻoku ʻi aí” (2 Nifai 27:12). Ko e taha ʻo e kau fakamoʻoni ko ʻení ko Tēvita Uitemā.
Ko Ha Nima Fietokoni
Naʻe fanongo ʻa Tēvita kau ki he ʻū lauʻi peleti koulá ʻi he taimi naʻá ne ʻaʻahi ai kia ʻŌliva Kautelé, ʻa ia naʻe hoko ko ha tangata tohi lolotonga e liliu ʻa Siosefa Sāmitá. Kimui angé, naʻe tohi ʻa ʻŌliva kia Tēvita, ʻo kole ange pe ʻe lava ke na nofo mo Siosefa [ʻia Tēvita] ke fakaʻosi ʻa e liliú.
Naʻe fononga ʻa Tēvita ʻi ha maile ʻe 300 (483 km) ki Penisilivēnia ke ʻomi ʻa Siosefa mo ʻŌliva ki he ʻapi ʻo ʻene ongomātuʻá ʻi Niu ʻIoké. Naʻe fakalalahi e tokanga ʻa Tēvitá ʻi heʻene mamata ki hono liliu ʻe Siosefa ʻa e Tohi ʻa Molomoná.
Hoko Maʻu Pē ko ha Fakamoʻoni
Naʻe fakahā kia Tēvita fakataha mo ʻŌliva Kautele mo Māteni Hālisi ʻa e ʻū lauʻi peletí ʻe ha ʻāngelo pea ne nau fanongo ki he leʻo ʻo e ʻOtuá ʻoku fekauʻi kinautolu ke nau fakamoʻoni ki he meʻa ne nau mamata ki aí.
Ko e meʻapangó, he naʻe mavahe ʻa Tēvita mei he Siasí hili ha ngaahi taʻu siʻi mei ai pea ʻikai ke ne toe foki, ka naʻe ʻikai pē te ne teitei fakaʻikaiʻi ʻene fakamoʻoní. Naʻe tohi ʻe Tēvita ʻi he fakaʻosinga ʻo ʻene moʻuí ʻo pehē, “Kuo teʻeki ai ha taimi, kuó u fakaʻikaiʻi ʻa e fakamoʻoni ko iá pe ko hano konga, ʻa ia kuo fuoloa hono pulusi ʻi he [Tohi ʻa Molomoná], ʻi heʻeku hoko ko e taha ʻo e kau fakamoʻoni ʻe toko tolú. ʻOku ʻiloʻi ʻe kinautolu ʻoku nau ʻiloʻi lelei taha aú, kuó u tauhi totonu ki he fakamoʻoni ko iá. Pea ke ʻoua naʻa takihalaʻi pe veiveiua ha tangata ki heʻeku ngaahi fakakaukau lolotonga fekauʻaki mo e meʻá ni, ʻoku ou toe fakapapauʻi atu hono moʻoni ʻo ʻeku fakamatala kotoa pē, ʻa ia naʻe faí pea mo pulusí” (An Address to All Believers in Christ [1887], 8–9).
1829
Niu ʻIoke
Penisilivēnia
Feieti
Hāmoni