Rūm̧m̧an Ded ro
Erom̧ Rilale ro Rem̧m̧anļo̧k an Laļ in Anij Ekar Kōm̧anm̧ane n̄an Kōj
By Elder Marcus B. Nash
Jān Jiljilimjuonnoul eo
Jān juon ekōnono kar kwaļo̧k ilo 18th annual Stegner Center Symposium ilo University of Utah ilo Salt Lake City ilo Eprōļ 12, 2013.
Ilo an em̧m̧anļo̧k ad kōjparoke laļ in, enaaj em̧m̧anļo̧k an jipan̄, kōketak, kōkajoorļo̧k, kōmourur, im kam̧ōņōņōiki bōrō ko buruwōd im jetōb ko ad.
Men eo eitok limoin eō ie ej menin kōm̧anm̧an ko, emaron̄ hiking, skiing, sea kayaking, cycling, ak barāinwōt etal n̄an bukwin wōjke ko rettoļo̧k. Āinwōt juon ajri, ikar iakwe ped ilo wōjke ko im en̄jake an lūr, kam̧ool eo elikkuun alikkar bwe wōjke ko remaroro rej kwaļo̧k kōn Rikōm̧anm̧an eo. Ilo aō rūttoļo̧k im erom̧ juon rūtto, em̧ōj aō jeļā jān aō ekkatak im tōmak bwe eļan̄n̄e jenaaj meļeļe kōn wōn kōj, un eo unin mour in, im kōn un eo kar kōm̧anm̧an laļ in—im likūt men kein ilo ļōmņak kein ad—jenaaj kōm̧m̧an n̄an laļ in, im men otemjej ie, ilo juon wāween eo eutiejtata im aorōktata.
Unin an Anij Kōm̧anm̧an Laļ in
Irooj, kōn rikanaan ro An jim̧or ilo raan ko etto im raan kein, rekar kajjieon̄ jipan̄ kōj meļeļe im kam̧m̧oolol kōn menin letok in n̄an mour ilo laļ in aiboojoj. Ilo Kallim̧ur M̧okta, David ekar ļōmņak kōn kōm̧anm̧an ko an Irooj reaiboojoj im ļōmņak etke—ilubwilijin kabwilōn̄lōn̄ kein—Anij ej keememej armej (lale Sam Ko 8:4). David ekar kōjem̧ļo̧k naan ko an bwe mour āinwōt armej elukkuun aorōk, “jidik jān enjeḷ raṇ” (Sam Ko 8:5).
Moses ekar barāinwōt lo ilo visōn laļ ko ejjeļo̧k bōnbōnier1 im ekar kwaļo̧k, “Kiiō, kōn un in ijeļā bwe armej ejej tokjān, men eo me ijjamin kar kōtmāne” (Moses 1:10).
Ilo ettā bōro eo an Moses im̧aan menin kōm̧anm̧an ko rekabwiļōn̄lōn̄ an Anij, ekar jab maron̄ kōmeļeļeik juon m̧ool eļap. Kōn menin Irooj ekar kwaļo̧k n̄an e bar juon alen kōm̧anm̧an ko An ejjeļo̧k jem̧ļokier im jitōn̄ļo̧k im kwaļo̧k bwe E—Anij—ekar kōm̧anm̧an menin kōm̧anm̧an kein “n̄an kakūrm̧ool jab wabanban im mour indeeo an armej” (Moses 1:39). Laļ in—em̧ool aolep menin kōm̧anm̧an—kar kōm̧m̧ane n̄an jipan̄ kōj bōk mour in jab wabanban im mour indeeo!
Bar ekōnono kōn unin laļ in, Irooj ekar ba, “Jenaaj kōm̧m̧an juon laļ ioon rein [meļeļein kōj] remaron̄ jokwe; n̄an lale eļan̄n̄e renaaj kōm̧m̧ani aolep men ko jabdewōt Irooj aer Anij enaaj jiron̄ er” (Ebream 3:24–25; bar lale eoon 26). Mour ilo laļ in, ekoba ippān menin letok in anemkwoj n̄an kālet, ej letok n̄an kōj juon iien eo em̧m̧an n̄an kālet n̄an kappukot im juon raan bōk aolepān men ko Anij ej letok.2
Ke kōm̧anm̧an eo an laļ in ekar dedeļo̧k, Anij ekar m̧ōņōņō kōnke E ekar lo bwe enaaj jerbal n̄an un eo An n̄an kōj, ajri ro Nejin.3 Ļaddik ro im leddik ro nejin Anij im baam̧le ko aer rej kwaļo̧ki rejjab ruwamājet ro ilo laļ in; ijjelo̧kin, rej ioļapļap n̄an jibadbad eo an laļ in.4
Jej n̄an Erom̧ Rilale ro Rem̧m̧an
Mour ilo laļ in ej jim̧or juon kōjeraam̧m̧an im juon eddo. Irooj ekar ba, “Bwe, lo, kidu ko in meļaaj ko im bao ko in mejatoto, im men eo ej itok jān laļ, ej mālim n̄an kōjerbale an armej n̄an m̧ōn̄ā im n̄an balle, im bwe en maron̄ wōr ilo kanooj ļap” (Katak im Bujen Ko 49:19). Ijoke, kōnke laļ in im aolep men ioon rej “jerbal ko [An] Pein.” (Katak im Bujen Ko 29:25), rej An.5 Āinwōt ro rej jokwe ie ejjab n̄an indeeo ilo laļ in, jej rilale ro—ejjab ad. Kōn menin, ej ad make eddo n̄an Irooj—eo ej An—n̄an ta eo jej kōm̧ane ippān kōm̧anm̧an ko An: “Bwe e ej mennin aikuj bwe N̄a, Irooj, in kōm̧m̧an bwe aolep armej en bōk eddo, āinwōt juon ribōk eddo ioon kōjeraam̧m̧an ko an laļ, ko me Iaar kōm̧m̧ani im kōpooji n̄an mennin mour ko Aō” (Katak im Bujen Ko 104:13).
Wāween ad kea kōn laļ in, wāween ad kawōr tokjen im ajeej e jeram̧m̧m̧an ko ie, im wāween ad kōm̧m̧an n̄an aolepān men ko me em̧ōj letok n̄an kōj ej m̧ōttan māllijon̄ eo ad ilo mour in. Jej n̄an m̧ōņōņō ilo ad kawōr tokjen men ko me Irooj em̧ōj an letok, jab kowaan mour im men ko ie, im kōjerbal jeram̧m̧an ko an laļ n̄an kea kōn ro rejarm̧ōl.6 Irooj em̧wilaļ an kea kōn aolep mour im eļaptata n̄an ajri ro Nejin, im enaaj men bwe jen bōk eddo make kōn ta eo jej kālet n̄an kōm̧m̧an (im jab kōm̧m̧ane) ippān jeram̧m̧an ko an menin kōm̧anm̧an ko An.
Irooj ej kallim̧uri kōj bwe eļan̄n̄e jenaaj ļoor E im jim̧we ad kōjerbal kein jipan̄ an laļ in kōn kam̧m̧oolol im kautiej, “dipiio in jeban an laļ ej [ad], kidu ko reawiia in meļaaj im bao ko imejatoto. … Im ej kam̧ōņōņō Anij bwe E ar litok aolep men kein n̄an armej; n̄an jem̧ļo̧k in kar kōm̧anm̧ani n̄an kōjerbali, kōn ekajet, jaab n̄an kanooj tōr, ak ilo kwoadon̄.” (Katak im Bujen Ko 59:16, 20).
Jej n̄an kōjerbal kein jipan̄ kein ippān ekajet ejim̧we im kam̧m̧oolol, ippān bōro eo n̄an jipan̄ ro jet—epepen ko kiiō, etto, im ilju im jekļaj—bōk kōjeram̧m̧an ko me Jemedwōj Ilan̄ ej ikdeelel n̄an leļo̧k n̄an ajri ro Nejin.
Lo ilōn̄inļo̧k Kōj Make
Būrom̧ōj, rainin jej mour ilo juon laļ eo ijo kajjojo armej ro remaron̄ kālet n̄an kaarmejete Anij im jab kautiej menin kōm̧anm̧an ko An. N̄e menin ej waļo̧k, Anij im menin kōm̧anm̧an ko an rej metak.
Inōk ekar rekoot bwe Anij ekar jan̄ kōn bwebwenato kāālet ko rejjab em̧m̧an im aer jab ļōmņak kōn ro jet.7 Moronai ekar kanaan bwe ilo raan ko ālikata enaaj wōr “kijeek ko, im lan̄ ko, im tab in baat … [im] mennin kattoon ko ioon mejān laļ,” im jekjek kein renaaj koba ippān “mennin jōjō otemjeļo̧k; n̄e enaaj wōr elōn̄ ro renaaj ba, Kwōn kōm̧m̧an men in, ak kōm̧m̧an men en, im e jab wōr tokjān” (Mormon 8:29, 31). N̄e armej rej ko̧kkure laļ in ilo jetōb im kanniōk jim̧or, ejjab Anij wōt ej metak ak bar menin kōm̧anm̧an ko!8
Aorōktata, kōjeram̧m̧an ko im kajoor rej pād ilo Kabun̄ eo an Irooj em̧ōj an jepļaaktok im gospel eo ewōr kajoor eo ie n̄an kōdepakpakļo̧k im ukōt jetōb eo an armej jān am̧ make, n̄an im̧we iakwe eo an Anij im menin kōm̧anm̧an ko An, im n̄an jipan̄ kōj ļōmņak kōn aikuj ko an ro jet im ļōmņak kōn aikuj ko an epepen ko ilju im jekļaj.
Menin Kōm̧anm̧an ko rej Kepaakļo̧k Kōj n̄an Anij
Laļ in im aolep mour ko ie eļap unier jān aitōm̧ ko wōt n̄an bōki im/ak kōjparoki; jet m̧ōttan ko rej n̄an barāinwōt dāpij kōjparoki. Kōm̧anm̧an ko rejjan̄in jibwi im “Men otemjeļo̧k rej itok jān alaļ … rekar kōm̧m̧an n̄an em̧m̧an im kōjerbal … an armej … jim̧or n̄an kam̧ōņōņō māj im kalan̄lōn̄ bōro … n̄an kōkajoorļo̧k ānbwin im n̄an kōmour jetōb” (Katak im Bujen ko 59:18–19).
Menin kōm̧anm̧an ko ilo lukkuun nememeir ej kepaakļo̧k kōj n̄an Anij, karreoik kōļmenļo̧kjeņ eo ad im buruōd jān ainikien ko im men ko an laļ in, ej kotak kōj n̄an juon jikin eutieejļo̧k, juon mejatoto eo eļapļo̧k an ekwojarjar, im ej jipan̄ kōj em̧m̧anļo̧k ad jeļā kōn Anij eo ad: “Laļ ej jabwilļo̧k ioon pein bao ko pein, im aal ej leļo̧k an meram ilo raan, im allōn̄ ej leļo̧k an meram ilo bon̄, im iju ko barāinwōt rej leļo̧k meram ko aer. … Jabdewōt [armej] eo em̧ōj an lo jabdewōt ak eo ediktata iaan kein em̧ōj an lo an Anij em̧m̧akūtkūt ilo an utiej im kajoor” (Katak im Bujen Ko 88:45, 47).
Ej em̧m̧an wōt ippa tallōn̄i tōļ ko routiej ko rej m̧ōttanļo̧k drekā ko rerabōlbōl im lōn̄tata in tōļ ko. Men̄e ejjeļo̧k ainikier, rej ekōnono kōn kajoor im utiej an Irooj—im kōn jeļā eo An ejjeļo̧k āinwōt kōn aiboojoj. Āinwōt an Alma kar kam̧ool, “Men otemjeļo̧k rej kam̧ool ewōr juon Anij; aaet, em̧ool laļ in, im aolep men otemjeļo̧k ioon mejān, … rej kam̧ool bwe ewōr juon Rikōm̧anm̧an Ekajoor Bōtata” (Alma 30:44).
Ilukkuun iakwe kalimjōkļo̧k lan̄ ilo bon̄, kajjeon jepooļe kōļmenļo̧kjeņ eo aō kōn indeeo im lan̄ kōn an ļo̧kjeņ aō. Ij ļo̧kjen aō kōn jeļāļo̧kjeņ in ej itok jān iien ko relūr me, jekdoon ļap in jon̄an laļin, Irooj in aolepān laļin in ejeļā kōn n̄a eo ilukkuun wūnnin̄. Im E ejeļā kajjeed aolep. Kōm̧anm̧an eo ej kam̧ool kōn Rikōm̧anm̧an eo, im eļan̄n̄e jenaaj kōjparok jikin kein, reaorōk im rejjan̄in jibwi, renaaj lukkuun ļap im alikkar ilo aer kam̧ool kōn Anij eo ad im naaj im̧we kōj m̧aanļo̧k wōt.
N̄e em̧m̧anļo̧k ad kōjparoke laļ in, enaaj em̧m̧anļo̧k an jipan̄, kōketak, kōkajoorļo̧k, kōmourur, im kam̧ōņōņōiki bōrō ko buruwōd im jetōb ko ad—im kōpooj kōj n̄an mour im jokwe ippān Jemedwōj Ilan̄ ippān baam̧le ko ad ilo juon mejatoto eo aiboojoj indeeo, eo enaaj ilo laļ in im jej jutak ioon rainin, ak enaaj ilo juon jekjek eo ekwojarjar.9
Jemaron̄ ke kōjparoke laļ in ilo kam̧m̧oolol—m̧weo im̧ōd kiiō im emaron̄ naaj bar ilo ilju im jekļaj.