Katak ko Repidodo an Gospel eo
Jisōs Kraist ej Lo̧mo̧o̧ren Kōj jān Jerawiwi im Mej
Kōn en̄taan eo An, jemaron̄ aolep bar wōr juon ad bar iien kappukot aeņōm̧m̧an im lan̄lōn̄ eo ejjeļo̧k jem̧ļo̧kin.
Kraist Ej Kōm̧am̧an Laļ in, jān Robert T. Barrett; O Jema, jān Simon Dewey; Kallūb eo an Christ, jān Carl Heinrich Bloch; Kraist Ej Kūr Pita im Andrew, jān James Taylor Harwood
Jej ņae etan Jisōs Kraist āinwōt ad Rilo̧mo̧o̧r. Unin ej kōnke E ekar kōļļaik wōņāān jerawiwi ko ad im anjo̧ ioon kajoor an mej. E ekar lo̧mo̧o̧ren kōj! En̄taan eo An n̄an kōj, ņae etan Pinmuur eo, ej iien eo eļap an aorōktata me em̧ōj an bōk jikin. Kōn E, mej ejjab jem̧ļo̧k eo. Kōn E, maron̄ jeorļo̧k jerawiwi ko ad, erom̧ erreo bar juon alen, im em̧m̧anļo̧k ilo ad eddōkļo̧k kajjojo raan.
Jisōs Kraist Ekar M̧aanje eo
M̧okta jān ad itok n̄an laļ in, jaar mour ippān Jined im Jemed Ilan̄. Āinwōt juon M̧aanje, Jisōs Kraist ekar jipan̄ kōm̧anm̧an laļ in aiboojoj. Kar kālet E bwe en ad Rilo̧mo̧o̧r im kar errā bwe en ļotak ilo laļ in bwe E en maron̄ kōm̧m̧an waanjon̄ak em̧m̧an, katakin gospel eo An, im kadedeļo̧k Pinmuur eo n̄an kōj.
Jisōs Kraist eaar Kōļļāik Jerawiwi ko Ad
Ke Jisōs ekar jeļā bwe E m̧ōttan jidik enaaj mej, E ekar etal n̄an juon jikin kallib ņae etan Gethesemene n̄an jar. Ilo iien jar eo, E ekar jino kōļļā wōņāān jerawiwi ko ad. Ekar kōtļo̧k bwe en en̄taan bwe jen jab aikuj en̄taan, eļan̄n̄e jenaaj ukweļo̧k. Ilo ad eļļo̧k jān jerawiwi ko ad im ļoor Rilo̧mo̧o̧r eo, jemaron̄ bōk jeorļo̧k bōd im kōmour. Ilo juon wāween jejjab lukkuun meļeļe kake, Jisōs elukkuun meļeļe kōn wāween mour ko ad. Eaar en̄jake aolep ad būrom̧ōj, nan̄inmej, im metak. En̄in ej m̧ōttan eo m̧oktata ilo Pinmuur eo.
Jisōs Kraist Ekar Anjo̧ Ioon Mej
Kraist Ej Kōm̧am̧an Laļ in, jān Robert T. Barrett; O Jema, jān Simon Dewey; Kallūb eo an Christ, jān Carl Heinrich Bloch; Kraist Ej Kūr Pita im Andrew, jān James Taylor Harwood
Ālkin jar eo An ilo Gethsemane, kar liaakeļo̧k Jisōs, kalbuuji, im kaje n̄an mej im debwāāl. Men̄e ekar ļap An kajoor, Jisōs ekar kōtļo̧k An make mej ioon debwāāl. Ro rikaļooraņ rekar likūt Ānbwinin ilo juon lōb. Rekar jab kile bwe men̄e Ānbwinin ekar mej, jetōb eo An ekar mour wōt ilo laļ eo an jetōb. Jilu raan tokālik, Jisōs ekar bar mour im loļo̧k er, kam̧oole bwe E emaron̄ anjo̧ ioon mej. kōnke Jisōs ekar bar jerkakpeje, kajjojo iaad jenaaj bar mour juon alen ālkin ad mej. Menin ej kadedeikļo̧k Pinmuur eo.
Jon̄an Aorōk in Kūrijm̧ōj im Ijtō
Eiten aolepān laļ in ej keememe holiday kein ruo me rej jipan̄ kōj kakeememej Pinmuur eo an Jisōs Kraist. Ilo iien Kūrijm̧ōj, jej keememej ippān kam̧m̧oolol bwe Jisōs ekar kōņaan kōm̧m̧ane mijen eo n̄an itok n̄an laļ in, men̄e menin ekar kobaik en̄taan im mej n̄an kōj. Ijtō ej keememe anjo̧ eo an Rilo̧mo̧o̧r ioon jerawiwi im mej, eo ej letok n̄an kōj kōjatdikdik n̄an juon ilju im jekļaj in lan̄lōn̄ ejjeļo̧k jem̧ļo̧kin.
Ta eo Jeje ko Rekwojarjar rej Ba kōn Pinmuur eo an Rilo̧mo̧o̧r?
Kōnke Jisōs ejeļā kōn kōj ilo ejjeļo̧k kalijōkļo̧k, E emaron̄ “jipan̄,” ak jipan̄, kōj (lale Alma 7:11–12).
Rikanaan ro etto rekar kam̧ool bwe Rilo̧mo̧o̧r enaaj meļeļe kōn būrom̧ōj ko im liāājļo̧ļ ko ad (lale Aiseia 53:2–5).
Anij ekar jilikintok Jisōs n̄an lo̧mo̧o̧ren kōj kōnke Anij ej iakwe kōj kajjojo (lale Jon 3:16–17).
Jisōs ekar jar kōn ro Rikaļooran, ekoba kōj, n̄an kōjparok kōj jān men ko renana im n̄an juon wōt Ippān im Jemedwōj Ilan̄ (lale Jon 17).
Rilo̧mo̧o̧r eo ad ej karuwaineneik kōj n̄an ļoor E im jepļaak n̄an Ippān (lale Katak im Bujen Ko 19:16–19, 23–24; 132:23).