En̄jake Kajoor eo an Priesthood
Kōrā ro rej jipan̄ tōl Kabun̄ in kar kajjitōk ippāer kōn wāween an kajoor eo an priesthood jelōt mour ko aer. Erkein rej jet iaan ļōmņak ko aer rekar kwaļo̧k.
Kōmeļeļe ko jan Matisse Hales
“Em̧m̧aan im kōrā ro reoktak bōtaab eddo ko aer rej jon̄an wōt juon im aorōk ilo m̧weo im ilo Kabun̄ in. Kajoor an priesthood eo emaron̄ jipan̄ kajjojo armej kōm̧m̧ane eddo kein n̄an jeraam̧m̧an eo an aolep armej.
“Kōnke kajoor an priesthood eo an Anij ej pād ilo laļ in rainin, kōjeraam̧m̧an ko reļļap rej peļļo̧k n̄an aolep ro uwaan Kabun̄ in me rej mour erreo, men̄e rerūtto ak dik, m̧aan ak kōrā, ejjeļo̧k pāleer ak ro em̧ōj aer m̧are.”
—Būreejtōn Joy D. Jones, Būreejtōn eo Eutiej an Būraimere
“Jerbal n̄an ro jet ej kōļapļo̧k mour in jetōb ko ad, kōdepakpakļo̧k kōļmenļo̧kjeņ eo ad im kōtļo̧k bwe en ļapļo̧k ad bōk kajoor an Anij. Irooj E ejeļā menin, ak barāinwōt Setan. Ilo an kajjeon̄ ilo kijejeto im kajoor n̄an kattoļo̧k kōj jān kajoor eo an Anij, rinana eo emaron̄ kōm̧m̧an bwe jen m̧ōk ak kōm̧m̧an bwe jen en̄jake bwe ta eo jej aikuj leļo̧k n̄an Anij ejjab bwe.
“… Lale kwaar pere juon jerbal in meanwōd.
“Ilo ad lukkuun kōņaan kōm̧m̧an jerbal in jipan̄ ko n̄an ro jet bwen m̧ōttan mour ko ad, jenaaj lo kabwilōn̄lōn̄ ko an Anij. Jenaaj lo aenōm̧m̧an, lo kajoor, im bōk eļapļo̧k kajoor ilo ad jerbal n̄an ad Rilo̧mo̧o̧r, Jisōs Kraist.”
—Būreejtōn Bonnie H. Cordon, Būreejtōn eo Eutiej an Doulul eo an Jiron̄ ro.
“Ekkā an, kōrā ro keidi er make ippān ro jet. Ak ejjeļo̧k iaad jej en̄jake em̧m̧an n̄e jej keidi kōj make ippān ro jet. Kajjojo kōrā ewōr juon kobaik in maron̄ im taļōn ko rej make wōt kaki, im aolep men kein rej menin letok jān Anij. Kōn kwe im n̄a kōjro ejjab āinwōt juon—ak jabdewōt oran kōrā ro rejjab āinwōt juon—ejjab meļeļein edik ak eļap aer aorōk. Jej kappukot menin letok ko ad im kaddōkļo̧ki, keememej wōn eo ekar leļo̧k n̄an er, innem kōjerbali n̄an jibadbad ko An. Ilo ad kwaļo̧k menin letok ko ad n̄an kōjeraam̧m̧an ro jet, jej en̄jake kajoor in priesthood eo ilo mour ko ad.”
—Būreejtōn Jean B. Bingham, Būreejtōn eo Eutiej an Doulul eo an Kōrā ro
“En emakijkij am̧ kappukot iien ko rem̧m̧an n̄an kōļapļo̧k meļeļe eo am̧ kōn ‘katak eo kōn priesthood eo.’ Kajjojo iaad enaaj aikuj in kappukot n̄an meļeļe menin n̄an kōj make.
“Ekkatak jān jeje ko rekwojarjar im naan ko an rikanaan ro im rijilōk ro ilo raan kein enaaj letok juon pedped eo emourur n̄an jeļā in n̄an eddōkļo̧k. Em̧ool barāinwōt pokake kien ko an Anij im mour em̧ool kōn bujen ko em̧ōj ad kōm̧m̧ani kōn kain̄i ko an priesthood eo. Meļeļe ej letok n̄an kōj ilo ‘lain im bar lain, kain̄i im bar naan in kain̄i’ [2 Nipai 28:30]. Kōn revelesōn ko an juon make, ej ‘wōt-dikdiki’ jetōb ko ad ‘āinwōt m̧ōļawi jān lan̄’[Katak im Bujen Ko 121:45].”
—Sister Lisa L. Harkness, Rikakpilōklōk eo Kein Kajuon an Būreejtōnji eo Eutiej an Būraimere
“Kajjojo iaad jej pād ilo juon iaļ in jibadōk eo aitok im kam̧ōkm̧ōk. … Jej etal ilo iaļ in jibadōk eo aitok im ekam̧ōkm̧ōk kōn apan̄ ko ilo jemjerā, apan̄ ko ikkijeen jāān, im apan̄ an kōļmenļo̧kjeņ im ājmour. Jej pād ilo iaļ in jibadōk eo aitok im ekam̧ōkm̧ōk kōn kūr in jerbal ko reļļap im laajrak in men ko jej kōm̧m̧ani kajjojo raan. Kajjojo iaad bōlen ej pād ilo iaļ in jibadōk in aitok im ekam̧ōkm̧ōk kōn būrom̧ōj, ak em̧ool barāinwōt en̄jake in makeļo̧k iaan ak jab limo. Apan̄ ko ad reoktak, ak ewōr ippād aolep.
”Kōjparok bujen ko ad ejjab meļeļein bwe apan̄ kein renaaj joļo̧ki, bōtaab ej meļeļein bwe Irooj ej kallim̧ur n̄an pād ippād.”
—Sister Michelle D. Craig, Rikakpilōklōk eo Kein Kajuon ilo Doulul eo Eutiej an Jiron̄ ro
“Ij pijaikļo̧k kajoor eo an priesthood eo āinwōt juon tōreej eo emouj emakeļo̧k iaan, em̧m̧antata, emeeoeo me ej itok jān Anij im ej loklok lowa im tulik, lōn̄ļo̧k im tōrerein, āinwōt ilo laleļo̧k an make tōl e ilo mour ko ad. Ak ilo eļap iien juon ej waļo̧k juon jon̄o̧k eo aiboojoj im kar bōk iien kōm̧mane. Design in ej kōbare lokatok eo an Anij, jikin eo ekwojarjartata ijo jej liāp ioon laļ im liāp ilo lan̄. …
“Jabdewōt iien n̄aij lo juon m̧ōttan nuknuk an lokatok ilo tampeļ eo ekwojarjar, ij en̄jake juon iaan kōkaļļe ko rekwojarjar an tampeļ n̄an wāween an Irooj letok kajoor eo An n̄an ajri ro Nejin retiljek n̄an aer maron̄ aiin im liāp ippān doon ilo juon jon̄o̧k in nuknuk aiboojoj im ekwojarjar.”
—Sister Sharon Eubank, Rikakpilōklōk eo Kein Kajuon ilo Doulul eo Eutiej an Kōrā ro
“Ibwilōn̄ en̄jake ko aō ilo mour e aō make, ijeļā bwe kōjparok kien ko an Anij, wōr tōmak, lukkuun lōke E rej wāween ko jemaron̄ bōk kajoor an priesthood eo An. …
”… Ilo ad dāpdep ilo ad tiljek, jemaron̄ bōk kajoor ko an priesthood eo im kōjeram̧m̧an ko ilo aolepān jekjek ko ilo mour kein ad. Emaron̄ letok n̄an kōj kōjparok, kaeņōm̧m̧an, kajoor, im ineem̧m̧an, im kallim̧ur ko me rej tōparļo̧k mour indeeo. Kōn kajoor eo an priesthood eo, Jetōb Kwojarjar emaron̄ barāinwōt jipan̄ n̄a kemeemejļo̧k en̄jake ko ilo mour e aō me rej wōnm̧aanļo̧k im kalōk kam̧ool im tōmak eo aō ilo Anij.”
—Sister Cristina B. Franco, Rikakpilōklōk eo Kein Karuo Eutiej ilo Būreejtōnji eo Eutiej an Būraimere
“Elōn̄ iiō ko remootļo̧k jān ke ikar bōk kōjeram̧m̧an eo an petriak, ak elukkuun alikkar aō kemeemejļo̧k en̄jake eo…
”En̄jake eo ekar ļōme kāālet ko rellōn̄ ikar kōm̧m̧ani ilo aolepān mour e aō. Ikar jeļā bwe n̄an kile kōjeram̧m̧an ko ikōnaan, ij aikujin kōm̧m̧ane ijo koņaaō.
”Ij lo kiiō bwe ewōr eļapļo̧k me Jemed ekōņaan letok n̄an n̄a bwe in bōki, em̧ool eļapļo̧k jān kar ba ilo kōjeram̧m̧an eo an petriak eo aō.”
—Sister Becky Craven, Rikakpilōklōk eo Kein Karuo Eutiej an Doulul eo Eutiej an Jiron̄ Ro
“Ikar kobatok ilo Kabun̄ eo an Jisōs Kraist im Armej ro Rekwojarjar ilo Raan Ko Āliktata ke ej 26 aō iiō. Mekarta ekar wōr juon en̄jake eo ekaeņōm̧m̧an ilo buruō ke ikar ļoor kōņaan eo aō n̄an bōk jeram̧m̧an jān Irooj jān aō kōm̧m̧ane juon bujen kallim̧ur Ippān, ijeļā bwe meļeļe eo aō kōn bujen eo ekar āinļo̧k wōt juon ine edik ilo iien eo.
“Ilo an m̧ootļo̧k iiō ko im ilo aō kōm̧m̧ane kijejeto ko n̄an kōjparok im dāpij bujen kallim̧ur in peptaij eo aō im bujen ko jet ikar kōm̧m̧ani ippān Jemedwōj Ilan̄, ij en̄jake bwe E ekar kōjeraam̧m̧an eō kōn juon meļeļe eo em̧wilaļ kōn E, kōn aō Rilo̧mo̧o̧r, im kōn eddo eo aō āinwōt jiron̄ in bujen nejin Jined im Jemedwōj Ilan̄. .”
—Sister Reyna I. Aburto, Rikakpilōklōk eo Kein Karuo ilo Būreejtōnji eo Euteij ilo Doulul eo Eutiej an Kōrā ro