Kōrā ro ilo Raan ko M̧oktata ilo Jepļaaktok eo
Jane ej Lan̄lōn̄ ilo Iaļ in Jibadōk in
Jej ke, āinwōt Jane Manning James, kar kāālet n̄an kadedeikļo̧k iaļ in jibadōk in kōn tōmak?
Kōmeļeļe ko jān Toni Oka
Jane Manning James ekar m̧ōk in etetal, ak ekar jab kōtļo̧k bwe en bōjrak.
Ļaddik eo nejin erūttotata, Sylvester, ekar bwe an rūtto n̄an etetal laļļo̧k itūrin wagon eo. Ak nin̄nin̄ Silas, eo ekar ļōtak ilo iaļ eo aer, ekar aikuj wōt bwe ren ineek e. Ekar ilo 1847, im baam̧le eo an James m̧ōttan jidik renaaj m̧ōttan painieer ro m̧oktata n̄an tōpare jikin eo ilo Great Salt Lake.
Jane ekar jab juon ruwamāijet n̄an iaļ in jibadōk ko raitok.
Emān iiō m̧oktaļo̧k, baam̧le eo an ekar em̧m̧akūt jān m̧weo im̧weer ilo turear in jikin eo n̄an kobaļo̧k ippān Armej ro Rekwojarjar ilo Nauvoo, ilo bōran tūrilikin frontier eo. Tūreep eo ekar aikuj bōk jikin jejjo raan m̧okta ilo reba. Ak kōn an lōn̄ rikilimeej ro rekar pād ilo kōm̧akoko ilo Amedka ilo iien eo, baam̧le eo an Jane ekutkut aer kwaļo̧k peba ko in kam̧ool ke rejjab pād ilo kōm̧akoko. Im jet jikin ewōr kakien ko aer reppen rej bōbrae armej ro eoktak kōļar in kūlier jān em̧akūtkūt ilo eria ko—ekoba jaaj lōn̄ļo̧k n̄an $500 juon armej.
Bōlen kōn jon̄an wōnāān in eļap ak bōlen kōnke kōn bōd in ekajet ko jet, ro rej kattōre wa ko ilo reba ko rekar jab kōtļo̧k an Jane im ro uwaan baam̧le eo an etal wōt. Jekdoon ta, rekar likūt aolepān men ko m̧weier itulikim etetal laļļo̧k ilo aer jintōb im ineek jabdewōt men ko ippāer.
Baam̧le eo an Jane rekar etetal laļļo̧k elōn̄ļo̧k jān 800 m̧ail ko (1,287 km). Rekar etetal ilo raan ko rebwil im bon̄ōn ko remarok jilōn̄lōn̄. Juon iien rekar etetal laļļo̧k ilo aer lukkuun m̧ōk ilo bukwin wōjke ko, kiki ilo an ejjeļo̧k aer bo̧rowaj. Ke rekar rūj, nuknuk ko aer rekar mouj kōn aij.
“Kōm ekar etetal m̧ae iien juuj ko amim rekar maat kabier, im neemim ekar jino metak im peļļo̧k im bōtōktōkļo̧k,” Jane ekar kemeemej. “… Kōm ekar kajjitōk ippān Anij Jemed Indeeo n̄an kōmour ne ko neemim im jar ko amim rekar uwaaki.”1
Ilo amim kar kate kōm ilo iaļ in kōttōpar in epen, Jane ekar al al in jar ko ippān jinen im jemān im ro jein im jatin, nebar Anij. Āliktata, ālkin ekepaak jilu allōn̄ ko in etetal, rekar tōprakļo̧k Nauvoo. Iiō ko tokālik, ke Rikwojarjar ro retiljek rekar kijoon jikin ko, Jane ekar m̧ōttan paineer ro m̧oktata rekar etetal laļļo̧k ilo iaļ in kōttōpar eo.