Kōttōbar Tarlep in Mour eo an Kraist
Jān Elder Jeffrey R. Holland
Jān Doulul eo an Rijilōk ro Jon̄oulruo
Jān juon multiregional young adult devotional address “The Measure of the Stature of the Fulness of Christ,” kar kōm̧m̧ane ilo Stanford, California, USA, ilo February 9, 2020.
Ijtō in, wōnm̧aanļo̧k ilo iaļ eo am̧ n̄an Jisōs Kraist im kappukot ainikien tōl in ainem̧m̧an An.
Be Not Afraid, jān Michael Malm
Imaron̄ ke lewaj jejjo ļōmņak ko kōn kappukot eo an juon make kajjojo iami enaaj kappukot n̄an “tōpare” inono in Kraist. (lale Epesōs 4:13). Ij kōjatdikdik renaaj jet men ko reaurōk n̄an eok ilo iien eddōkļo̧k in am̧ ilo mour eo am̧ im ilo jekjek ko kwoj iooni.
Jet iami rej pād ilo ijo rekar kōņaan pād ie, ak kwojeļā kiiō ia eo kwoj kōņaan ilo̧k ie ļok mour ko ami. Jet iaami ilo kalimjōkļo̧k em̧ōj ami bōk elōn̄ kōjeraam̧m̧an ko im kālet ko rem̧m̧an im̧aan. Ro jet kom̧ij en̄jake, ilo juon iien im kōn jabdewōt kain un, edik jeraam̧m̧an im eiet iaļ ko rekaitoktok limo repād im̧aan.
Ak jabdewōt ijo kwoj etal ie ļo̧k im jabdewōt wāween eo kwoj jerbale idajon̄jon̄ ko n̄an tōparļo̧k ijo, ij kajjitōk ippem n̄an itok n̄an Rilo̧mo̧o̧r, Jisōs Kraist, āinwōt an ļap an aorōk bun̄tōn eo m̧oktata ilo tōparļo̧k ijo am̧ make kwoj jibadōke, ilo kappukot m̧ōņōņō eo am̧ make im kajoor, im ilo tōpar indeeo eo am̧ im tōprak ilo kōttōbar (lale 1 Nipai 10:18; 2 Nipai 26:33; Omni 1:26; Katak im Bujen Ko 18:11).
Aolepān men ko remaron̄ am̧ eļan̄n̄e uwaak eo n̄an kajjitōk eo “Ia kwōj etal n̄an e?” (Moses 4:15) ej “Jekdo̧o̧n kwopād ia, Irooj?”
Mour in emaron̄ pen. Ewōr ad metak im ajļo̧k ko im būraabļōm̧ ko rem̧ool n̄an jelm̧aik. Ewōr ad inepata ko im būrom̧ōj, aolep jekjek ko in uteej im ettā. Bōtaab Irooj im rikanaan ro An rekar kōņaan eļap naan in rojan̄ kōn wāween ad jelm̧aik būraabļōm̧ ko n̄an kobrak juon jōnōļ.
“Aenōm̧m̧an Ij Lewōj n̄an Kom̧”
Jar eo an Rilo̧mo̧o̧r ioon rikaļoor ro An men̄e ilo An kar epaakeļo̧k metak im en̄taan ilo Gethsemene im Calvary ej juon jar eo me eļap an kōbōkkak kōn naan kein. Ilo bon̄ōn eo, bon̄ in en̄taan eo eļaptata me ej kab juon kattōn an bōk jikin ilo laļ in ak enaaj kar tōn bōk jikin, Rilo̧mo̧o̧r ekar ba: “Aenōṃṃan Ij likūt ṇa ippemi, Aō aenōṃṃan Ij lewōj n̄an koṃ. … En jab pok būruemi, im en jab lōļn̄o̧n̄” (Jon 14: 27).
Ej juon wāween kalimjōk mour eo ilo aiboojoj ilo awa ko rekaen̄tanaantata. Ekōjkan An maron̄ ba menin, ilo An jelm̧aik ta eo E ejeļā ke E ej jelm̧aik? Emaron̄ ba bwe kōnke Kabun̄ in ej An im gospeļ eo in jem̧ļo̧k ko relem̧ōņōņō! N̄an kōj, anjo̧ eo em̧ōj kadede wini. E ej laleļo̧k wōt ijo im̧aanļo̧k wōt aitok, E ej kwaļo̧k ippād pija in ekilep.
Ij ļōmņak jet iaad, ijoke, emaron̄ wōr ippād pere āinwōt ro jān im̧weo im̧ōn Puritan ro me rej ba āinwōt ebōd n̄an bōk kainōm̧m̧an im jipan̄, bwe jej aikuj kar būrom̧ōj kōn jet men aolep iien. Ij leļo̧ke n̄an “ṃōṇōṇō” (Jon 16:33) ilo kōttōbar eo “n̄an jon̄an rūttoun an Kraist obrak” (Epesōs 4:13) emaron̄ kien eo me ej, em̧ool ilo bōro ko an Armej ro Rekwojarjar ilo Raan Kein Āliktata jet, m̧ōttan jidik rej jab pokake aolep men, im aet em̧ool ejjeļo̧k men eļapļo̧k im āinwōt in enaaj kabūrom̧ōjm̧ōj n̄an Irooj.
Āinwōt aō naaj kar inepata eļan̄n̄e inkar pād ilo mour ko aer, juon iaan ajri ro nejū ekar lukkuun ļap an inepata ak jab m̧ōņōņō ak jab pokake, mekarta enkar kanooj ļapļo̧k aō leln̄o̧n̄ eļan̄n̄e inkar en̄jake bwe ilo iien rōt in me juon ajri ejjab maron̄ lōke eō n̄an jipan̄ ak ļōmņak bwe kōņaan eo an ekar jab aorōk n̄an eō ak em̧m̧an ilo kōjparok eo aō.
Ilo ejja jetōb eo wōt, ij tōmak bwe ejjeļo̧k iaad emaron̄ kam̧oolol kōn eo jon̄an m̧wilaļ in an kakinejnej būruōn Anij Jemed ak Nejin, Rilo̧mo̧o̧r eo an laļ in, ke Rekar lo bwe armej ro rekar jab peran ilo kōjparok eo Aer ak inem̧m̧an ilo pā ko Peir ak lōke ilo kien ko Aer. Ro m̧ōtta, kōn un in make, ewōr ad eddo n̄an m̧ōņōņō!
An “Jouj Ebwe“
Bar juon m̧ōttan kapilōk kōn kappukot Kraist im jon̄an rūttoun an Kraist obrak bōk jikin ālikin an Jisōs kōm̧m̧ane kabwilōn̄lōn̄ eo in naajdik 5,000 ro jān ļalem pilawe im ruo ek (lale Matu 14:13–21). (Im barāinwōt, jab inepata kōn an Kraist maat an kabwilōn̄lōn̄ ko n̄an jipan̄ eok. An “Jouj Ebwe” [2 Korint 12:9]. Ej juon katak eo indeeo kōn kōjeraam̧m̧an in ilo jetōb. E ekanooj lōn̄ im lōn̄ an kōjeram̧m̧an ko n̄an ito itak kōn basket ko reobrak kōn bwe ko! Kom̧win tōmak im lem̧ōņōņō ilo menin letok in an kōn “bred in mour”! [Jon 6:35].)
Ālikin an kar Jisōs naajdik jarlepju eo, E ekar jilikinļo̧k Innem E ekar “make lōn̄ḷọk n̄an toḷ bwe En jar” (Matu 14:23).
Āinwōt an rikaļoor ro jerak ilo wa eo, ekar epaakeļo̧k jota, im bon̄ōn̄ eo ekar nana lan̄. Jon̄an ņe kōto ko rekar kanooj kaamijak jān jinoun. Kōn kōto ko, em̧m̧aan rein rekar bōlen jab maron̄ kotak wujļā ko ak kar jerbal wōt kōn kein auōņōōņ ko—im jerbal ko remaron̄ kōm̧m̧ani.
Jejeļā menin kōnke jān iien eo “kaemān ilo bon̄” (Matu 14:25)—ijoko ikōtaan 3:00 im 6:00 awa jibbon̄—rekar mootļo̧k wōt jejjo m̧aiļ ko (lale Joh 6:19). Ilo iien eo tim̧a eo ekar dipuk juon kōto eļap an kajoor.
Bōtaab, āinwōt aolep iien, Kraist ekar lale er. Loe aer apan̄, Irooj ekar pidodo an kepaak tim̧a eo waer, etetal ioon ņo ko n̄an jipan̄ er.
Finisher of Faith, jān J. Alan Barrett
“Kom̧win Jab Abwinmake”
Ilo iien aer ikkūjeļo̧k im m̧ōk, rikaļoor ro rekar reilo̧k im lo ilo marok eo menin ekabwilōn̄lōn̄ ilo juon nuknuk ej ejopelpel m̧aantak n̄an ippāer ilo kom̧laļ in lo̧jet. Rekar jan̄ ilo aer mijak men eo rej loe, kar ļōmņak bwe ekar juon tim̧ōņ ioon ņo ko. Innem, ibulōn̄ kōto ko reļlap im marokjilōn̄jilōn̄—ke lo̧jet ekar em̧m̧anļo̧k kalimjōke im tim̧a eo waer ekar dik kalimjōke—ekar itok juon ainikien kainem̧m̧an eo ealikkar jān Master eo aer: “Ña E; koṃwin jab abwinmake” (Matu 14:27).
Bwebwenato in ilo jeje ko rekwojarjar ej kakkeememej kōj bwe ilo ad itok n̄an Kraist, kappukot jon̄an rūttoun an Kraist obrak, ak ilo itok eo An n̄an kōj n̄an boktok jon̄an rūttoun an n̄an kōj, būn̄tōn eo m̧oktata emaron̄ kobrak kōj kōn juon men eļap an āinwōt juon menin kamijak eļap. Ejjab aikujin, ak jet iien ej āinwōt. Juon iaan men ko reļļap ilo gospel eo ej bwe likkuun jikin bōk jipan̄ em̧ool im jojomar em̧ōj letok n̄an kōj ej men eo im jemaron̄, ilo ad pilo ilo mour in, im ko.
N̄an jekdoon un ta eo, em̧ōj elolo rikatak ro rej ko jān peptaij. Em̧ōj aō lo an elder ro ko jān kūr in mijen ko aer. Em̧ōj aō lo an riakwe ro ko jān m̧are. Em̧ōj aō lo an membōr ro ko jān kūr ko reppen. Im em̧ōj aō lo an armej ko jān bōnbōn in membōr eo aer ilo Kabun̄ in.
Emakijkij ad ko jān likkuun men ko me renaaj kanooj kōjparok kōj im kainem̧m̧an kōj. Emakijkij ad lo kallim̧ūr ko an gospel āinwōt jet men ko n̄an mijaki im ilo̧k jāni.
Elder James E. Talmage (1862–1933) ekar ba: “Ilo aolep mour in rūtto ko an armej ej itok iien ko jenaaj iooni āinwōt pataik kōtō ko reļļap rej joto jotak rijerakrōk ro kōn kōto ko reļļap im lo̧jet ko rekamijak; eiten aolep iien bon̄ in apan̄ im kauwōtata rej katoto m̧okta jān an jipan̄ itok; innem, emakijkij an jipan̄ in kōjparok ej bōd kile ke ej juon men eļap an kaamijak. [Ak,] ke ej itok n̄an ippān [rikaļoor rein] ilo ibūļōņ dren ko reļļap im reņoņo̧, kōn menin ej itok n̄an aolep ro eļap aer tōmak, ainikien Rikanemkwoj—‘Ña E; koṃwin jab abwinmake.’”1
Itok n̄an E
Men eo eļap an aiboojoj kōn menin ej kūr eo n̄an bōk Rilo̧mo̧o̧r, n̄an itok n̄an E im kappukot n̄an bōk jon̄an rūttoun an Kraist obrak, ej bwe aolep remaron̄ kōm̧m̧ane. Ejjab meļeļein bwe aolep ro kojeļā kajjeir renaaj kōņaan kōjparok kien ko, ak bwe aolep ro kwoj ioon er renaaj kōjparok kien ko. Bōtaab ej meļeļein bwe ej menin maron̄ n̄an kōjparok kien ko ilo an ejjeļok menin letok ko rejenolo̧k ak jem̧ļo̧k ko n̄an kōm̧m̧ane āindein.
Ij likkuun akweļap n̄an bōk tōmak eo me ej “romaak im ebbōl im erreo im ājmour,” n̄an Kraist n̄an “boktok kōj ilo aolep jon̄ak in wāween [ad] m̧our,”2 im ñan jon̄an rūttoun an Kraist obrak ilo mour ko ad (lale Epesōs 4:13).
Mour in enaaj māllijon̄ eok. Men ko im iien ko reppen renaaj itok. Rub bōro enaaj waļo̧k. Rein rejitōn bōro renaaj mej. Kōn menin, jabdewōt jikin kwoj ilo̧k ie ļo̧k, kōm̧m̧ane iaļ eo am̧ n̄an Jisōs Kraist m̧oktata. Keememej bwe en̄taan im Jerkakpeje eo An rekōm̧m̧an bwe jen anjo̧ ioon men ko reppen im mej. Kōm̧m̧an bujen ko am̧ Ippān im kōjparoki ilo am̧ wōnm̧aanļo̧k wōt.
Ilo aolepān aō m̧ōjņo̧, eo ij pojak ilo aō kile, Ij akweļap n̄an ad bōk “jon̄an rūttoun an Kraist obrak.” Ikōņaan etal n̄an Ippen. Ikōņaan E, eļan̄n̄e emaron̄, n̄an itok n̄an ippa. Im illikkuun kōņaan kōjeram̧m̧an ņe n̄an kom̧ aolep.