Mo Matua

Faamanatuga ma Musika

O le Talisuaga Mulimuli, saunia e Carl Heinrich Bloch; ata o se tamaitai talavou o loo tatalo na saunia e Angela Suitter; Tatalo i Ketesemane, saunia e Del Parson; Ina Ia Outou Manatua Pea Au, saunia e Gary L. Kapp, e le mafai ona kopiina

Matua Pele,

Ua faia mekasini a le Ekalesia ma le manatu tasi mo oe ma lou aiga. O le masina lenei, e taulai atu mekasini i autu e pei o le faamanatuga, musika musuia, matafaioi a tamaitai i le Toefuataiga, Eseta, ma sauniuniga mo le konafesi aoao. Tagai i lalo mo manatu i auala e mafai ona e faaaogaina ai le tele o mataupu o lenei masina e faamalosia ai le faatuatua o lou aiga ia Keriso faapea foi ma lou lava faatuatua.

Talanoaga o le Talalelei

O Le Fanaʼe Mai o le Ekalesia

Faitau le tusiga a Elder De Hoyos o loo i le itulau e 36 ma talanoa i faamanuiaga e te maua e ala i le avea ma se vaega o le Ekalesia a Keriso, e pei o le i ai o ni perofeta soifua, aoaoga faavae moni, ma sauniga o le perisitua.

O Le Taua o Musika

Aisea e taua ai i le Alii musika? Faalogologo i ai, pepese, pe taina le faatulagaga fou o le pese “He Sent His Son” i le itulau e 34; ona faasoa atu lea o ou manatu e uiga i le fati po o upu. Mo nisi faamatalaga e uiga i le taua ma faamanuiaga o musika, faitau le tusiga o loo i le itulau e 30.

O le Matafaioi a Tamaitai i le Toefuataiga

 I le itulau e 25 faitau e uiga i le auala na puipuia ai ma le filiga e Ema Samita le Tusi a Mamona. Ua faapefea ona faamanuiaina le Ekalesia ona o tamaitai, ma o faapefea ona latou faaauau pea? E mafai foi ona e faitauina le savali a Peresitene Ballard o loo i le itulau e 8, ma faafetai atu i tamaitai amiotonu i lou olaga i se tusi tusitusia po o se faatinoga agalelei.

Faia o le Famanatuga o se Mea Faapitoa

Faitau le tala i se aiga i Viatename i le itulau e 18 ma mafaufau pe faapefea ona faia e lou aiga ia sili atu le taua o le faamanatuga. O manatu e ono aofia ai le faalogologo pe usu viiga ao agai atu i le lotu, manatuaina o mau o loo faamatalaina ai uiga o Keriso a o e mafaufau ia te Ia i le taimi o le faamanatuga, po o le mafaufau loloto i upu o tatalo o le faamanatuga.

E mafai foi ona e faaaogaina le itulau e 6 e aoao ai lau fanau e uiga i le faamanatuga.

Lagolago mo le Sau, Mulimuli Mai ia te A’u

Tagai i le itulau e 26 mo se lesona faatino faigofiea a le aiga, filifili o mau, ma isi anomea e lagolago ai lau suesuega o le Sau, Mulimuli Mai ia te Au o vaiaso taitasi.

Fiafiaga i Suesuega Faaleaiga

Foafoaga Matagofie a le Atua

Mataupu Faavae ma Feagaiga 20:17–19

Faitau le Mataupu Faavae ma Feagaiga 20:17–19 e uiga i le ala na faia ai e le Atua le “lagi ma le lalolagi, ma mea uma o i ai i totonu ia te i latou.”

1. Faaalu sina taimi e tilotilo ai i fafo o se faamalama pe alu e savalivali.

2. Faasino atu foafoaga a le Atua ua e vaai i ai.

3. O le fuaiupu e 18 o loo tau mai ai o le Atua “na foafoaina le tagata, o le tane ma le fafine, e tusa ma lona lava faatusa ma i ona lava foliga, na foafoa ai e ia i laua.” O i tatou o nisi foi o foafoaga a le Atua! Faaalu sina taimi e faamemelo atu ai i mea uma e mafai ona fai e lou tino. O a au taleni?

4. I le fuaiupu e 19 ua poloaiina i tatou e “alolofa ma auauna atu ia te ia, le Atua soifua moni e toatasi.” E faapefea ona e faaaoga au taleni e auauna ai ia te Ia?

Talanoaga: E mafai faapefea ona tatou tapuai i le Atua?

Manatu na auina mai e Brenda Slade ma Lisa Thomas

A o Le’i ma le I le Mavae Ai

Mataupu Faavae ma Feagaiga 20:11, 21–29 (Fepuari)

I le Mataupu Faavae ma Feagaiga 20, tatou te faitau ai i le auala na musuia ai e le Atua ia Iosefa Samita e faatulaga le Ekalesia a Iesu Keriso i le lalolagi. I leMataupu Faavae ma Feagaiga 20:11 o loo tau mai ai ia i tatou e faapea “e musuia e le Atua tagata ma valaaulia i latou i lana galuega paia i ona po nei ma lenei tupulaga, e pei lava o tupulaga anamua.”

1. Faaali atu se ata o Keriso.

2. Vaevae le aiga i ni vaega “a o lei” ma “i le mavae ai”.

3. O le a maua e tagata o le aiga i vaega taitasi ia upu a perofeta o e na molimau mai ia Keriso a o lei oo i Lona soifuaga i le lalolagi poo le mavae ai (o Lona soifuaga i le lalolagi).

4. Feauauai i le faasoaina atu o mea ua outou mauaina taitasi. O isi o le a mateina mai pe o upu e fitoitonu i le vaega o le “a o lei” po o le “i le mavae ai”.

5. A uma ona faasoa mai, o tagata i le vaega o le “a o lei” o le a tutu i le itu agavale o le ata o Keriso. O tagata o le “i le mavae ai” o le a tutu i le itu taumatau.

6. Faamalamalama atu e taua vaega uma e lua.

Talanoaga. Faitau le Mataupu Faavae ma Feagaiga 20:21–29. E faapefea ona fesoasoani lenei molimau faaonapo nei ia Keriso tatou te lagona ai le latalata atili ia te Ia? O a nisi molimau ia Keriso e mafai ona maua i vaega e 20–29 o le Mataupu Faavae ma Feagaiga?

Manatu na auina mai e Mitzi Schoneman

I le Mekasini o le Mo le Malosi o le Autalavou i le Masina Lenei

O le Fatu o le Eseta—O Le Iesu Keriso Soifua

Talanoa ma lau autalavou e uiga i lenei savali mai ia Elder Gerrit W. Gong i le faamanatuina ai o le auala o loo soifua ai Keriso mo i tatou uma.

Tusigāmanatu o le Konafesi

O se auala sili lea e saunia ai ma tusitusi ni faamatalaga i le taimi o le konefesi aoao!

E pei o se Faamalama i lou Agaga

Faasoa atu lenei tala e uiga i le auala na ootia ai olaga e se aufaipese o tagata mai talitonuga eseese i Florida, ISA.

Le Auala e Maua ai Pea le Agaga

Ua faasoa mai e Elder Pieper ni motugaafa sili i le auala e valaaulia ai le Agaga e faatasi ma i tatou i aso taitasi.

I le Mekasini o le Uo o Lenei Masina

Lagolago i le Saogalemu o Ala o Faasalalauga

Faitau e uiga i se teineitiiti na aoao e uiga i le faaaoga ma le atamai o tekinolosi. Ia saili foi se itulau faaopoopo faatasi ai ma ni motugaafa ma ni manatu e fesoasoani ai i lau fanau e faaaoga ala o faasalalauga i auala saogalemu, ma lelei.

Malamalama i le Mataupu Faavae ma Feagaiga

Faaaoga se itulau o gaoioiga e fesoasoani ai i lau fanau ia iloa po o le a le Mataupu Faavae ma Feagaiga ma le mea na sau ai.

Eseta i Rusia

Faitau e uiga i le auala e faamanatu ai e se tasi o aiga le Toetu o le Faaola i le taimi o le Eseta.

Taimi Fiafia o Tusitusiga Paia

Saili ni gaoioiga faalevaiaso e fesoasoani ai i suesuega faaleaiga o le Sau, Mulimuli Mai ia te A’u, e aofia ai se vaega e i ai manatu e faapitoa mo tamaiti laiti.

Faamoemoe ia Keriso

Faitau se savali o le Eseta mai ia Peresitene Henry B. Eyring ma fai se gaoioiga o loo faamatala mai ai le tala o le Eseta.