Matutua ma le Faamaoni
“E le o Au o se Pepe, Tamamatua”
O le faaaluina o le taimi ma le tama laitiiti a lo’u afafine na manino ai le matagofie o le taimi nei ma toe to manatu ai i mea na tutupu i le taimi ua tuanai.
Ata na tusia e Carolyn Vibbert
Faatoa atoa le fa tausaga o le tama a lo’u afafine o Lili, ae ou te valaau lava ia te ia i lona igoa tauvalaau ao pepe: “Pepe Lils.” Pe a ou faia, na te faamanatu mai ia te au, “E le o au o se pepe, Tamamatua.”
Atonu e sao o ia, ae ou te faamoemoe e leai. Sa tonu ia te au afai ou te valaauina o ia i a Pepe Lils, atonu o le a le vave ona tuputupu ae o ia. Ma o le a ou valaau pea o ia i a Pepe Lils, seia aulia le tausaga e amata ai ona ave taavale.
Ioe, ou te iloa e le mafai ona ou taofia le televave o aso, masina, ma tausaga. Sa ou faataitaia mea na i la’u lau lava fanau … ma i lei manuia. “Sa [solo mavae atu foi o matou olaga],” e pei ona fai mai ai Iakopo, “e pei o se miti” (Iakopo 7:26). I le aluga o taimi, o le a avea lo ma atalii laitiiti ma se faifeautalai, ma tuua ai maua ma lou toalua ma se fale e tumu i potumoe gaogao ma ni siuleo o le olaga faatamaitiiti.
Sa ou faalogo talu ai nei i se tagata i le ata tifaga o faapea mai, “O le matua na te faalolotoina lagona uma.” Ou te iloa e moni lena mea. Pe a mavae lou soifua ai i se afa seneturi pe sili atu, ua e tofo i le tele o le olioli ma faanoanoaga o le olaga. E tuputupu ae le alofa i le toesea, ma ua e iloa o le fiafia e faavavau e oo mai i le olaga a sau, ae le o le olaga nei.
A o ou vaavaai atu i foliga o Lili, ou te fia iloa po o a faigata o le a ia sopoia, o a ni avega o le a ia tauaveina, ma po o a ni laau talatala o le a mafatia ai o ia (tagai 2 Korinito 12:7). Ou te tatalo ia puipuia o ia e le Alii, mo ni nai tausaga ia le itiiti ifo, mai na lesona faaletino ia e taua mo lo tatou tuputupu ae faaleagaga ma faalelagona. Ou te tatalo ina ia faamalosia o ia pe a oo mai na tofotofoga, pe a oo mai ia i tatou mea uma.
Ae peitai, mo lenei taimi, ou te tuuese na manatu. Ou te taumafai e aua nei manatu mamafa i le lumanai. Ou te le manao e misi le matagofie o le taimi nei.
“Sau e avatu a’u, Tamamatua,” o le tala lea a Lili a o ia sola ese.
Sa ou tuli o ia mai le tasi potu i le isi. O lana ata matagofie o se musika, ma o ona foliga fiafia o se la e susulu. Mo sina taimi, o le 25 tausaga ua mou ese atu. Ua ou toe tomanatu nei i le taimi ua tuanai, faatasi ai ma le tina o Lili, o lo’u afafine. Ua toe fa foi ona tausaga. Ma e pei o Lili, sa ia ata a o ou tuli faataamilo o ia i le fale.
Ona oo mai lea o se isi manatuaga. O le 1974, ma a’u ma o’u uso o loo matou asiasi atu i le Tama o lo matou tamamatua o Curtis Ellsworth. O le taimi mulimuli lea o le a ou vaaia ai o ia i lenei olaga. O le a maliu o ia i se taimi puupuu mulimuli ane, i le 90 o ona tausaga, a o ou auauna atu i se misiona i Kuatemala.
I le taimi lenei mai le taimi ua tuanai, sa ou mafaufau: “O le a se manatu o Tamamatua Ellsworth a o ia vaavaai mai ia i matou, o lana fanau? Pe na te manatuaina le taimi ao laiti lana fanau? Mata e popole o ia i o tatou lumanai? Pe matou te faamanatu atu ia te ia e vave lava le alu o le olaga?”
A o matou faamavae atu i lena taimi ua leva, ou te manatua le tagi o Tamamatua Ellsworth. Mo le tele o tausaga sa ou mafaufau ai pe aisea. O lea la ou te manatu ua ou iloa.