O le a le mea e fausia ai se faavae malosi?

1–7 Mati

O Iosefa Samita na “musuia [e] le Agaga Paia e faataatia lona faavae” mo le Ekalesia toefuataiina a le Faaola (Mataupu Faavae ma Feagaiga 21:2). E ala mai ia te ia, na toefuatai mai ai aoaoga faavae sao ma le pule o le perisitua. Na fausia ai se faavae mautu mo le toe faatulagaga o le Ekalesia ia Aperila o le 1830.

O lenei lesona faatino o le a faaalia ai le taua o le i ai o se faavae malosi mo le Ekalesia.

Sauniuniga

O le a e manaomia:

Ia le itiiti ifo ma le ono ni iputi uga pe pepa
O se mea mafolafola (mo se faataitaiga, o se fasi pepa malo, pepa tao meaai, po o se laupapa)
Ni mea faitino mamafa se tele, e pei o tusi po o ni maa

I ipu taitasi, tusi ai se mataupu faavae na fesoasoani e fausia le faavae o le Ekalesia, e pei o le “perisitua” po o “tusitusiga paia.” E mafai ona e maua mataupu faavae i vaega 20–22 o le Mataupu Faavae ma Feagaiga.

Fausiaina o se Faavae

Amata i le fesili atu i lou aiga pe fia le mamafa latou te manatu e mafai ona tauaveina e se ipu se tasi. Ae a ni ipu se tele?

Tuu ia ipu e faasaga i lalo i luga o le eleele po o se laulau. Faatulaga i latou i ni laina se lua, e tolu ipu i laina taitasi. Tuu le pito mafolafola i luga o ipu ma amata ona tuu ni mea mamafa i luga. E fia e mafai ona tauaveina?

Illustrations by David Habben