Sau, Mulimuli Mai ia te A’u
Mataupu Faavae ma Feagaiga 20–22
O Le Ekalesia Faatuputupulaia
Saunia e Elder Benjamín De Hoyos
O Le Fitugafulu
Ua toefuatai mai le Ekalesia a le Faaola ma le aoaoga faavae moni, mana o le perisitua, ma sauniga paia.
Ata na pueina e James Iliff Jeffery
I tausaga ua mavae, i lo’u vaiaso muamua i le galue ai i le ofisa o le va i fafo a le Ekalesia i Mekisiko, sa matou maua ai se valaaulia mai se polokalama faatalatalanoa a le leitio. O le polokalama, lea na talanoaina ai tapuaiga faalelotu i le lalolagi, na ofoina mai mo i matou le 45 minute e talanoa ai e uiga i le Ekalesia.
“Oka se avanoa ina a maoae,” sa ou tau atu ai i le Peresitene o le Eria a o ou faasoa atu ni faamatalaga auiliili o le valaaulia. “O ai e tatau ona matou auina atu e fai ma sui o le Ekalesia?”
Na ia tali mai, “O oe.”
Sa ou fou i le ofisa ma talavou tele lava. Na faateia au na te le’i tofia se tasi o i ai se poto masani sili atu. Ae ui i lea, sa ou tatalo, saunia i le mea sili ou te mafaia, ma valaaulia se soa ma te o faatasi. E lei umi ae ma taunuu i le ofisa faasalalau.
“Ua matou i ai faatasi i lenei afiafi ma ni sui e toalua mai Le Ekalesia a Iesu Keriso o le Au Paia o Aso e Gata Ai,” na fai mai ai le faatonu o le polokalama a o ia faailoa atu i ma’ua. Ona ia fesili mai lea, “Aisea ua umi ai le igoa o le tou Ekalesia? Aisea tou te le faaaogaina ai se igoa puupuu po o se igoa faapisinisi?”
Sa ma fiafia ma lau soa e tali se fesili maoae lava. Sa ma faamalamalama atu e lei filifilia e se tagata le igoa o le Ekalesia. Ae, o le Faaola lava Ia na faaalia mai e ala i se perofeta o aso e gata ai (tagai i le Mataupu Faavae ma Feagaiga 115:4).
Sa tali mai ma le faaaloalo le faatonu o le polokalama, “Ia o le a tatou toe tauina le igoa atoa ma le fiafia tele.” Ma sa ia faia lava—i le tele o taimi.
Ou te manatua pea le lagona ootia na matou mauaina a o faamatalaina le tupuaga o le igoa o le Ekalesia ma le auala e faasino ai lena igoa i le Faaola ma tagata o Lana Ekalesia i aso nei. Na ma taliina ma la’u soa ni fesili se tele, o le tele o fesili e faaautu i le igoa o le Ekalesia. O le aafiaga sa avea ma se faamanuiaga mo le Ekalesia i la matou eria ma mo au foi.
I le 2018, na talosagaina ai e Peresitene Russell M. Nelson le Au Paia o Aso e Gata Ai “e toefuatai ai le igoa sa’o o le Ekalesia a le Alii.” Sa Ia folafola mai afai o le a tatou faia le mea sili tatou te mafaia e mulimuli ai i lena fautuaga a le Alii “o le a liligi mai e Ia o le e ana le Ekalesia Lona mana i lalo ma faamanuiaga i luga o ulu o le Au Paia o Aso e Gata Ai, i auala tatou te lei vaaia lava.”1 Na toe faafouina e Peresitene Nelson lena folafolaga i le taimi o le konafesi aoao ia Aperila 2020.2
I le vaitaimi puupuu talu ona talosagaina i tatou e Peresitene Nelson e faaaoga le igoa sa’o o le Ekalesia, ua amata ona faataunuuina lana folafolaga. Faatasi ai ma le faitau miliona o tagata o le ekalesia ua faasoaina atu nei le igoa talafeagai o le Ekalesia, ua toatele atu tagata ua latou iloa tatou te talitonu ma tapuai i le Alii o Iesu Keriso. O se taunuuga, ou te talitonu o loo fiafia le Ekalesia i se toe faatupulaia i le uunaia ma le faaaloalo. Ua matala faitotoa, ma ua agai i luma le Toefuataiga.
A o faasolo ina malamalama le fanau a le Atua o loo faaauau pea faaaliga i aso nei ma ua toefuatai mai le Ekalesia a le Faaola faatasi ma aoaoga faavae moni, mana o le perisitua, ma sauniga paia, o le a latou mananao e iloa atili e uiga i le Toefuataiga.
Perofeta Soifua
O le vaega e 20 o le Mataupu Faavae ma Feagaiga e amata i upu taua nei: “O le fana’e mai o le Ekalesia a Keriso i aso nei e gata ai” (fuaiupu 1; ua faaopoopoina le faamamafa). Talu mai le faatulagaina o le Ekalesia i le aso 6 o Aperila, 1830, ua faatonuina e le Alii lena fana’e mai e ala i taitai ua Ia valaauina.
O le Perofeta o Iosefa Samita na “musuia e le Agaga Paia e faataatia le faavae” o le Ekalesia toefuataiina. E faapena foi, i o tatou aso, e musuia ai e le Alii ia Peresitene Nelson e taitai le Ekalesia, “ati ae i luga,” ma “uunai le faamoemoe o Siona i le mana malosi tele mo le lelei,” (Mataupu Faavae ma Feagaiga 21:2, 7).
I le konafesi aoao ia Aperila 2020, na vaaia ai e le Au Paia o le Ekalesia le faamaoniga o le taitaiga faifai pea a le Alii ma faaauau ai pea ona faatuputupulaia Lana Ekalesia ina ua faitauina e Peresitene Nelson le “OLe Toefuataiga o le Atoatoaga o le Talalelei a Iesu Keriso: O se Folafolaga o le Faamanatuina o le Lua Seneturi i le Lalolagi”:
“Matou te ta’utino atu ma le fiafia e aga’i pea i luma le Toefuata’iga folafolaina e ala i faaaliga faifai pea,” na ia saunoa ai. “O le a le toe tutusa lava le lalolagi.”
Na faaopoopo mai Peresitene Nelson, “O loo matala le lagi. Matou te faamautū atu o loo faailoa mai e le Atua Lona finagalo mo Ōna atalii ma afafine pele.”3
Na folafola mai e le Alii e faamanuia tagata o le Ekalesia anamua o e na faalogo i Lona finagalo e pei ona faaalia mai e ala i le Perofeta o Iosefa Samita. O na folafolaga e faasafua mai ia i tatou ao tatou mulimuli i auauna filifilia a le Alii i aso nei: “O le a lē manumalo ai faitotoa o seoli ia te outou; ioe, ma o le a faamataa ese ai e le Alii le Atua mana o le pouliuli mai i o outou luma, ma faia ia luluina le lagi mo lo outou lelei, ma le mamalu o lona suafa.” (Mataupu Faavae ma Feagaiga 21:6).
Sa faafeiloai e Peresitene ma Sister Nelson ia tagata o le Ekalesia ina ua mavae lana faigalotu i le aso 16 o Me, 2019, i Kona, Hawaii.
Aoaoga Faavae Moni
O se tasi o mea na aoaoina e le taulealea o Iosefa Samita i le Vao Paia i le 200 tausaga ua mavae o polofesa faalelotu o ona aso sa aoao mai “mo mataupu faavae poloaiga a tagata, ua foliga ua faaleatua, a ua latou teena le mana o i ai” (Iosefa Samita—Talafaasolopito 1:19).
Na folafola mai talu ai nei e Elder Jeffrey R. Holland o le Korama a Aposetolo e Toasefululua e faapea o “vaivaiga faaleotu” i o tatou aso “o loo tuua ai pea e fia aai ma le faamoemoe o nisi e lei faataunuuina” ma o “o na gaulemalie eseese [mataupu faavae] ua taitai ese atu ai nisi mai faapotopotoga faaletolu masani.”4
O mea e manaomia e le lalolagi, ma mea ua ofo mai e le Alii, o aoaoga faavae suamalie ma faaolaina o loo maua i lo latou manino ma le atoatoa i le talalelei toefuataiina.
O le aoaoga faavae moni o loo maua i le Tusi a Mamona, lea o loo i ai “le atoatoaga o le talalelei a Iesu Keriso i Nuuese ma i Iutaia foi” (Mataupu Faavae ma Feagaiga 20:9). O loo a’oa’o mai ai le faamoemoega o le olaga ma faamalamalama mai ai le aoaoga faavae a Keriso, lea e faatotonugalemū i ai lena faamoemoega. … Ua molimau mai le Tusi a Mamona o tagata uma o ni atalii ma ni afafine a se Tamā i le Lagi alofa, ua i ai ia te Ia se fuafuaga pa’ia mo ō tatou olaga, ma o Lona Alo, o Iesu Keriso, o loo fetalai mai i aso nei e pei fo’i ona sa i ai i aso anamua.”5
O le aoaoga faavae moni o loo maua i le Mataupu Faavae ma Feagaiga, lea na valaauina ai se perofeta “le sootaga malosi lea i le va o le Tusi a Mamona ma le galuega faifaipea o le Toefuataiga e ala mai i le Perofeta o Iosefa Samita ma i latou o le a suitulaga ia te ia.”6
O le aoaoga faavae o loo maua foi i aoaoga a perofeta ma aposetolo o aso nei ua valaauina e le Alii i o tatou aso e puipuia i tatou mai le faaseseina. Ua tatou iloa o mea latou te tautatala mai ai i le uunaiga a le Agaga Paia, o le loto, mafaufau, upu, ma le siufofoga o le Alii (tagai i le Mataupu Faavae ma Feagaiga 68:4).
O le aoaoga faavae moni e musuia ai, faamalosia, ma faamafanafana ai aua na te valaaulia le Agaga Paia, e faaali mai ai le fuafuaga o le faaolataga, ma molimau mai e uiga ia Iesu Keriso ma Lana Togiola.
Perisitua ma Sauniga
Ua valaaulia i tatou uma e le Alii e o mai ia te Ia ma Lana Ekalesia ma ia maua sauniga o le faaolataga.7 O sauniga e taua tele i le Ekalesia moni a le Alii, e pei o le pule o le perisitua e taitai ai i latou.
Faatasi ai ma isi mea, o i latou e saili mo le Ekalesia moni a Iesu Keriso e tatau ona faamoemoe ua faatulagaina e le Alii le ala sa’o o le papatisoga (tagai i le Mataupu Faavae ma Feagaiga 20:37, 71–74) ma o le tiutetauave a tagata pe a maea ona papatisoina i latou (tagai i le Mataupu Faavae ma Feagaiga 20:68–70). E tatau ona latou faamoemoeina aoaoga e le faapolofesa ma tiutetauave o na tagata aoao e le faapolofesa. Ma e tatau ona latou faamoemoeina avanoa e auauna atu ai e pei ona sa auauna mai ai le Faaola. (Tagai i le Mataupu Faavae ma Feagaiga 20:38–67; tagai foi i le Mosaea 18:8–10; Moronae 6:4.)
O auaunaga i le Ekalesia e tulaga ese ai i tatou. O auaunaga faaleperisitua o lona uiga o le auauna atu i tagata uma, e aofia ai i latou e le auai i la tatou faatuatuaga. O auaunaga e faamanuiaina ai i latou na auauna atu i ai ma i latou o e auauna atu.
I le iuga, o i latou e saili mo le Ekalesia moni a le Alii e tatau ona faamoemoe e maua le pule ma sauniga o le perisitua lea e mafai ona fusia ai aiga mo le faavavau.
“O le a le uiga ia te oe o le toefuataiina mai o le talalelei a Iesu Keriso i le lalolagi?” na fesili ai Peresitene Nelson i le konafesi aoao ia Aperila 2020. “O lona uiga ua mafai ona faamauina faatasi oe ma lou aiga e faavavau! O lona uiga ona ua papatisoina oe e se tasi ua i ai le pule mai ia Iesu Keriso ma ua faamauina o se tagata o Lana Ekalesia, ua mafai ona e olioli i le mafutaga tumau a le Agaga Paia. … O lona uiga e mafai e le mana o le perisitua ona faamanuiaina oe a o e mauaina sauniga taua ma osia feagaiga ma le Atua ma tausi i ai.”8
O se faamanuiaga le avea ai ma tagata o se Ekalesia ua faatuputupulaia ma o loo taitaia e perofeta ma aposetolo soifua! E faamoemoe o le a tatou le manatu mama i le taitaiga faalelagi a le Alii, Lana Ekalesia toefuataiina, le mana o le perisitua, ma sauniga ua faamanuiaina ai i tatou i le taimi nei ma i le faavavau.