O se Faatelea’i i le Sauniga Faamanatuga
Sa ou faapea ua matou toe misia foi le faamanatuga.
Atapue mai le Getty Images
Ina ua matou siitia mai le Iunaite Setete i Viatename, sa ma naunau lava ma lo’u toalua ia aua lava nei misi se lotu. Ina ua mavae se tausaga, matou te lei misi lava se Aso Sa, ae sa masani ona matou tuai ma sa tele lava ina matou misia le faamanatuga. Na amataina le matou sauniga faamanatuga i le 8:30 i le taeao. Faatasi mai na se fanau laiti e toatolu, o le saunia mo le lotu i le taimi e tatau ai sa foliga mai e faigata.
I le avea ai o se aiga sa tonu ia i matou e tatau ona matou taunuu lava i le taimi mo le lotu ma tagofia le faamanatuga. Sa o se tauiviga, ae sa matou taunuu i le lotu i le taimi e tatau ai i le fa Aso Sa sosoo lava. Sa ou matauina le eseesega na faia e a matou taumafaiga. Sa tele atu o matou aafiaga faaleagaga i le aluga o le vaiaso.
Ae peitai, o le Aso Sa na sosoo ai, na tuai ai ona matou feala. Ua ta le 7:30 i le taeao. Sa ou fai atu i lou toalua sa leai se faamoemoe, ae sa ou mafaufau i le faamanuiaina o i matou pe ana ma faia le ma mea sili ina ia sauni pea. O lea na matou faatelea’i ai!
E oo ane i le taimi na matou o ai i le lotu, ua 20 minute ua matou tuai ai. Sa ou lagona ua matou toilalo. Sa matou faalogo i pesega ao matou savavali atu i totonu, ma ina ua ou tatalaina le faitotoa, sa alu atu se tagata i luga o le tulaga e fai le tatalo.
“Pe o le viiga amata ea lena?” Sa ou musumusu atu i le faifeautalai o loo tu i tafatafa o le faitotoa.
“Ioe!” o lana tala lea. “Ua tuai ona tatou amata i le asō.”
Na faateia au. Sa ou faapea ua matou toe toilalo foi, ae na matou taunuu i le lotu i le taimi sa’o! Sa maligi ou loimata a o ou lagonaina le alofa o le Tama Faalelagi mo au ma lou tamai aiga.
Mulimuli ane sa matou iloa ai ina ua taunuu atu faifeautalai i le lotu i lena Aso Sa, sa la iloa ai e leai se tasi na aumaia se falaoa mo le faamanatuga. E leai se faleoloa na lata ane, ma e faigata ona maua falaoa i Viatename. Ina ua mavae sina taimi o le popole, sa manatua e faifeautalai sa i ai le la falaoa i le fale.
I ni nai aso na muamua atu, na o mai ai faifeautalai i lo matou fale mo le taumafataga o le afiafi. I lena afiafi, sa ou saunia ai falaoa e fai i le fale mo i laua. Na tuai ona amata le lotu i le taeao o le Aso Sa ona sa tamomoe atu faifeautalai i le fale e aumai le falaoa sa ou taoina mo i laua!
E silasila mai le Atua i a tatou taumafaiga a o tatou taumafai e tausi Ana poloaiga. E ui lava tatou te le o atoatoa i nisi taimi, ae e alofa o Ia ia i tatou ma o le a saunia auala mo i tatou ina ia manuia ai—e tusa lava pe na o le taunuu atu i le lotu i le taimi e tatau ai.