Sau, Mulimuli Mai ia te A’u

O le a le uiga o le “finagalo autasi” i le Ekalesia?

8–14 Mati

Ua poloaiina e le Alii e faapea “o mea uma lava i le ekalesia ia faia i le finagalo autasi” (Mataupu Faavae ma Feagaiga 26:2). O le finagalo autasi e mafai ai e tagata o le Ekalesia ona “lagolagoina i latou ua valaauina e auauna i le Ekalesia, faapea ma isi faaiuga a le Ekalesia e manaomia ai la latou lagolago, e masani lava ona faaalia i le sii o le lima taumatau” (Taiala i Tusitusiga Paia, “Finagalo Autasi,” scriptures.ChurchofJesusChrist.org).

Pe tatou te “palota” pe a tatou lagolagoina tagata o le Ekalesia?

“E leai se perofeta po o soo se taitai i lenei Ekalesia, i lena tulaga, na ia valaauina o ia lava. E leai ma se perofeta ua filifilia faapalota. Na faamanino mai e le Alii lena mea ina ua Ia fetalai mai, ‘Ua le filifilia a’u e outou, a ua filifili outou e a’u, ma faauuina outou’ [Ioane 15:16]. Tatou te le ‘palotaina’ ia taitai o le Ekalesia i soo se tulaga lava. Ae tatou te maua le avanoa e lagolagoina ai i latou” —Peresitene Russell M. Nelson, “Lagolagoina o Perofeta,” Liahona, Nov. 2014, 74–75.

E moni foi lena mea mo valaauga uma. O le lagolagoina o se avanoa lea e faaali ai ma tuuina atu la tatou lagolago ma faailoa atu ai le finagalo o le Atua.

Pe o le siiina o tatou lima e lagolagoina tagata o le ekalesia ua na o se faiga aloaia faigofie?

“E ala i la tatou palota lagolago, tatou te faia ai ni folafolaga faamaoni. Tatou te folafola atu e tatalo mo auauna a le Alii ma o le a Ia taitai ma faamalosia i latou [tagai i le Mataupu Faavae ma Feagaiga 93:51]. Tatou te tautino atu o le a tatou vaavaai ma faamoemoe e lagona musumusuga mai le Atua i a latou fautuaga ma soo se taimi e faatino ai a latou valaauga.” —Peresitene Henry B. Eyring, “Valaauina e le Atua ae Lagolagoina e Tagata,” Liahona, Iuni 2012, 4.

O le lagolagoina o tagata o le ekalesia i o latou valaauga e tatau ona faaauau pe a latou umia ma le agavaa le valaauga.

Ae faapefea pe afai e le mafai ona ou lagolagoina se tasi?

I tulaga e le masani ai, e mafai ona iloa e se tagata se mafuaaga aoga i le pogai e le tatau ai i se tagata ona umia se valaauga. I tulaga faapea, e mafai e le tagata na tetee ona feiloai na o ia ma le epikopo po o le peresitene o le siteki e talanoaina o latou popolega.