E Manaomia e le Lalolagi ni Tamaitai Faamaoni

Talu mai uluai aso o le Tina o Eva, ua i ai se matafaioi taua a tamaitai i le fesoasoani lea e faataunuuina le fuafuaga a le Atua mo Lana fanau. O le masina lenei, ua tatou maua ai le avanoa e aoao atili ai e uiga i nisi o tamaitai o e na avea ma paionia i uluai aso o le Toefuataiga o le talalelei. Mo se faataitaiga, i le itulau e 25 e mafai ona tatou faitau ai e uiga i le loto toa o Ema Samita. A o tatou suesue i le Mataupu Faavae ma Feagaiga 25, tatou te faitau ai i fetalaiga a le Alii ia te ia o fai atu ia te ia e fatu se tuufaatasiga o viiga paia.

Ua faaauau pea le Toefuataiga i o tatou aso, ma ua manaomia e le lalolagi ia saofaga taua a tamaitai faamaoni e sili atu nai lo se isi lava taimi. I le itulau e 12, e mafai ona e faitau ai i le auala na vaaia ai e i tatou o e ua avea ma Taitai Aoao i le Ekalesia le mana o le perisitua o galue i o tatou olaga. O lenei mana o le perisitua, o loo avanoa i alii ma tamaitai, ua mafai ai ona faaauau pea le galuega a le Atua i le lalolagi. E mafai foi ona e faitau i se savali mai ia Peresitene M. Russell Ballard i le itulau e 8 e uiga i tamaitai sa fesoasoani e mamanuina lona olaga.

Po o le a lava lo tatou itupa, tausaga, lanu, po o isi tulaga, o i tatou uma lava o ni fanau pele a le Atua faatasi ma tofi paia ma le gafatia.

Ma le faamaoni lava,

Peresitene Joy D. Jones

Peresitene Aoao o le Peraimeri