Mauaina o lona Ala e ala i le Lotofaafetai ma le Faatuatua

Saunia e Lillian Arp

Mo le silia ma le 30 tausaga, sa moemiti ai Afulua Tuivaiti, o le Uarota a Pesega 6 i le Siteki o Apia Samoa, ia i ai se aso e toe foi ai i le a’oga maualuga, e faamae’a le a’oa’oina lea sa ia misia . . . ma atonu ia faaauau ai i le iunivesite. Sa ia le iloa pe faapefea.

I le i ai o se aiga e tausi i le taimi nei, e le tele se tupe maua ma le mau tiutetauave i le lotu ma le nuu. Sa amata ona lagona e Afulua e peiseai ua tuai tele mo ia, ma atonu e le mafai ona toe faaauau le a’otauina. Peitai i lena taimi, sa ta’u atu ai ia te ia e se ulugalii matutua faamisiona i lana uarota, e uiga i le polokalama o le PathwayConnect a Le Ekalesia a Iesu Keriso o le Au Paia o Aso e Gata Ai.

O le PathwayConnect e taugofie, o se semesa e 4-kosi e saunia ai le au aooga e amata se tikeri faaiunivesite, lea e mafai i lena taimi ona faia i luga o le initoneti i le Iunivesite o Polika Iaga (BYU). E maua i le lalolagi atoa le polokalama ma o loo faalauiloa e ala mai i le Ekalesia faatasi ai ma vasega mo le ola tutoatasi.

Ina ua logotala ia Afulua e uiga i le PathwayConnect, sa oo ina i ai lona faamoemoe, ma taumanatunatu ai pe mata o le a tino moni mai lana miti o le toe a’oga, ona i ai foi lea o se isi ulugalii faamisiona matutua sa aofia ai. Sa faafeiloai atu a’u e “Elder ma Sister Abbot i le Pathways,” ma fai mai Afulua, “sa ofo mai se isi ulugalii faamisiona matutua agalelei e totogi lo’u [pili]. O se faamanuiaga ina uiga ese!

“O le ala [na] tali mai ai le Tama Faalelagi i a’u tatalo, o se vavega lava.”

Na lesitala loa lava Afulua ma e lei pine ae auai i lana uluai vasega, lea sa fai lava si matamuli ai.

“O la’u semesa muamua, sa ou nē ma fefe ona e le lelei la’u tautala faaPeretania,” o lana tala lea, ae o le taimi nei i lana semesa lona tolu, ua le o toe i ai lena faafitauli. “Ua faaleleia atili [la’u gagana Peretania] ma ua ou le toe fefe. E le gata i lea, sa lei tuulafoaiina lava au. Sa ou maua le faamalosiauga mai ou taitai faalelotu, faiaoga, ma la’u vasega,” o le tala lea a Afulua.

E sili lona lotofaafetai ia Sister Ho Ching, le faletua o le peresitene o le misiona a Apia Samoa, ma faifeautalai i le ofisa o le siteki o e sa fesoasoani ia te ia, aemaise ai o ona manaoga faatekinolosi, ma i lona epikopo, o Lautua Fa’aofo ma lona faletua o Apu, o loo faaauau pea ona lagolagoina o ia i le ala.

“E le gata i lea, a ua atili ona ou latalata i le Alii,” na ia fai mai ai. “[O lenei aafiaga] ua matuai malosi ai lava la’u molimau.”

O se molimau na faaosofia ai pea o ia ma siitia i le aluga o lana malaga, lea e lei faigofie i taimi uma. O loo tausia e Afulua lona tinamatua ua 85-tausaga, ma le tama a lana tama e 5-masina, ia o loo faaopoopo atu i isi o ana feau i le fale – e matuai pisi ai lava i aso uma. “E na o le po e mafai ona ou suesue ai,” o lana tala lea, ma e tele ina fai seia iu ai lava ina moe.

Ae o loo faaauau pea.

Toe tasi lava le semesa i le PathwayConnect, ae o loo naunau Afulua e faaauau pea i le polokalama a le BYU mo se tikeri ma o loo taulimaina foi ni nai filifiliga mo le isi lea laasaga.

“Ou te matuai fiafia lava i le Pulega o le Talimalo ma Turisi,” fai mai o ia, “ou te talitonu e mafai ona avea ma pisinisi lelei tele mo au i se aso.” O le mea moni, ua amata ona teuese e Afulua se tupe mo se pisinisi i le lumanai, “ae o loo ou mafaufau foi e a’oga ma suesue i le Soifua Maloloina Faatino.”

O loo lava pea sona taimi e filifili ai se mataupu e faa’autu i ai, ae e tasi le mea ua manino lelei ia Afulua, “Ou te faatuatua i le Alii o Iesu Keriso. E tali mai o Ia i a’u tatalo ma ta’ita’i a’u i le ala sa’o.”

O le faatuatua o Afulua i le Atua, ma lona ta’utino atu i ana sini, na musuia ai foi le faatuatua ia te ia lava. “O le a i ai pea lava maagao i le ala,” na ia fai mai ai, “ae o le a ou taumafai pea lava e faatoilaloina ma uunaia a’u lava e tuu i ai nisi mau taumafaiga ina ia mafai ai ona ou ausia la’u fuafuaga.”