Na Tamada Vakalomalagi e Vinakati Keda Lesu

Mai vei Elder Ulisses Soares

Ena Kuoramu ni iApositolo Le Tinikarua

Ko sa na rairai toso voleka tiko yani ena salatu lesu ki vua na Tamada Vakalomalagi ka ko sega soti sara ni na vakila.

Rau dau tatadrataka tu na noqu itubutubu, o Aparecido kei Mercedes Soares, me rau na lako ikaulotu. Rau via sauma lesu vua na Turaga na veivakalougatataki e vuqa e basika ki na nodrau matavuvale ena gauna e rau a lewena kina na Lotu. A votu na nodrau madigi ena 1989 ena gauna rau a ciqoma kina e dua na veikacivi ni veiqaravi ena Valetabu e São Paulo Brazil.

Ia, ena vica toka ga na vula ni nodrau kaulotu, a sotava o tamaqu na mate ni uto ka takali yani. Ena gauna ni nona veibulu, au a mokoti tinaqu ni keirau duri donuya tu na kisi ni mate i tamaqu.

“Nau, na cava sa tarava kivei iko?” Au a taroga.

“Au a tatadrataka kei tamamu na ilesilesi oqo,” a sauma o koya. “Au sa veiqaravi tiko ena gauna oqo, ka‘u na tomana tiko na noqu veiqaravi—ena vukuna kei na vukuqu.”

E dua na peresitedi yalo vinaka ni valetabu e a lesia e dua tale na yada me veiqaravi vaka itokani kei tinaqu, ka tomana o tinaqu na nona kaulotu me sivia na 20 na vula. E a vakalougatataki koya na nona veiqaravi vakaulotu, ka sa vakalougatataka na noqu matavuvale kei au na nona vakabauta kei na ivakaraitaki.

Ena gauna ni nona kaulotu, a takali talega e rua na taciqu, ka yali vei keirau vakaveiwatini e rua na gone. Na imatai a sucu dole ka sega ni bula, ka yali vei keirau na kena ikarua ki na vakalutu. Ena gauna dredre o ya ni neitou matavuvale, a tiko ena valetabu o tinaqu e veisiga ka vakadeitaka tiko na nona vakabauta—ka vakaqaqacotaka tiko na neitou—ena yavu ni veivakabulai.

Na nona vakabauta ni na veisotari lagilagi vata kei tamaqu kei na yalayala ni bula tawamudu ena iserau ni Tamada Vakalomalagi e a tokoni koya tu ena 29 na yabaki vaka yada me yacova na icava ni nona veisiga, ni sa yabaki 94.

Na Yavu ni Bula Marau

Eda sa kalougata dina na Yalododonu Edaidai ni da kila ni sa vakalesui mai na kosipeli. Na yavu ni veivakabulai vakaidina sa ikoya “na yavu levu ni bula marau” (Alama 42:8). Kivua e dina ka vakabauta, e sa yalataki tu e dua na icovi tawamudu ena iserau ni Kalou.

Me vaka sa vakatakilai tu ena Vunau kei na Veiyalayalati, voleka ni o ira kece na luve ni Tamada Vakalomalagi era na curuma e dua na matanitu lagilagi. Mai na Veisorovaki ni iVakabula, o ira ka lako mai “ena nodra tucake tale na bula dodonu” (Vunau kei na Veiyalayalati 76:17) era na taucoko sara ka rawata na lagilagi vakasilesitieli.

E vuqa sara na lewe ni Lotu i Jisu Karisito ni Yalododonu Edaidai era ciqoma na ivunau oqo. E sevataki, ni so e rairai era sega ni vakabauta ni oqo e wili talega kina o ira. Era cakacala tu. Na nodra tubu vakayalo, dina ga ni dei tu, e berabera. Era vakasamataka tu se era na rawa ni bau yacova tu na matanitu vakasilesitieli.

Kevaka o tiko o iko ena ilawalawa o ya, nanuma na vosa ni Turaga ki na dua tale na ilawalawa vakabauta: “Laveta cake na ulumudou ka vakacegu, ni‘u sa kila tu na veiyalayalati dou a cakava vei au” (Mosaia 24:13).

Sa lomani keda na Kalou ka sa vinakati keda lesu taucoko ki na Nona iserau. Ko sa na rairai toso sara tiko yani ena salatu lesu ki Vua ka ko sega soti sara tu ni na vakila.

“Dodonu ka Dina”

Ena Vunau kei na Veiyalayalati wase 76, sa vakatakila na Turaga na sala era rawa ni taukena kina na Luvena na matanitu vakasilesitieli. Kevaka o sa lewe ni Lotu ka tiko na nomu ivakadinadina, o sa tekivu oti tu ena nomu salatu, me vaka e vakamacalataki ena Vunau kei na Veiyalayalati:

Sa dodonu me da ciqoma “na ivakadinadina kei Jisu” ka vakadinata “na yacana” (tikina e 51).
Sa dodonu me da papitaiso tabadromuci (raica na tikina e 51).
Sa dodonu me da “ciqoma na Yalo Tabu ena veitabaki ni liga” mai na dua ka tu vua na dodonu ni lewa ni matabete (tikina e 52).

Ia, na veikalawa tale eso, e na taura na bula taucoko ni sasaga, ka so na lewenilotu era na yalolailai ni ra yaco koso. Eda sa cakacakataka tiko na veika e gadrevi oqo. Sa vakavinavinakataki na Veisorovaki i Jisu Karisito, sa vakavuna me da na rawati ira kece:

Muria na ivunau ka “savai ka vakasavasavataki mai na [noda] ivalavala ca taucoko” (tikina e 52).
“Vakadrukai ena vakabauta” (tikina e 53).
Mo “vauci ena Yalo Tabu ni yalayala” (tikina e 53), sa ikoya na Yalo Tabu, ka vakadinadinataka “vua na Tamada ni [noda] cakacaka vakalotu ni veivakabulai e sa qaravi vakadodonu ka sa maroroi tu na veiyalayalati e salavata kaya.”¹ Sa yalataka tu na Tamada na veivauci oqo kivei “ira kecega sa dina ka dodonu” (tikina e 53).

A cauraka o Peresitedi Ezra Taft Benson (1899–1994), na “dodonu kei na dina,” e sa “dua na ivakaraitaki momona me baleti ira na gugumatua ena ivakadinadina i Jisu. Era sa yaloqaqa ena taqomaki ni dina kei na valavala dodonu. Oqo o ira na lewe ni Lotu ka ra vakarabailevutaka na nodra veikacivi ena Lotu (raica na V&V 84:33), solia na nodra ikatini kei na isolisoli eso, tutaka na bula savasava, tokona na nodra iliuliu ni Lotu ena vosa kei na cakacaka, rokova na siga ni Vakacecegu, ka talairawarawa ki na ivakaro kecega ni Kalou. “²

Na rawati ni ivakatagedegede cecere duadua ni matanitu vakasilesitieli, ka dau vakatokai tu me bula vakacerecerei, e dua tiko na iotioti ni kena gagadre. Sa dodonu me da curu ki na “veiyalayalati vou ka tawamudu ni vakamau” (Vunau kei na Veiyalayalati 131:2), e vakayacori ena valetabu ena dodonu ni lewa maqosa ni matabete. Mai na ituvatuva loloma cecere ni Tamada, eda kila ni na vakarautaki tu na veivakalougatataki vakasilesitieli ena bula ka tarava kivei ira ka sega tu na nodra madigi ena cakacaka vakalotu ni veivauci ni valetabu ena bula oqo ia era yalodina tikoga me yacova na ivakataotioti.

Eda vulica ena iVola i Momani ni o ira kece na luve ni Kalou ka muria na Nona ivunau ka yalodina tu, se cava ga na ituvaki ni bula, era na vakalougatataki ka “curu ki lomalagi, me ra tiko marau kina vata kei na Kalou me tawamudu” (Mosaia 2:41). Sa dau tu ga na inuinui vei keda ena yavu cecere ka lomani ni veivakabulai ni Tamada Vakalomalagi.

Na Veivakalougatataki ni Veivutuni

Na noda parofita lomani, o Peresitedi Russell M. Nelson, sa vakavulica: “e sega ni namaka na Turaga me da taucoko sara ena gauna oqo ena noda itosotoso ki na bula tawamudu. Ia sa namaka tu o Koya me da na bula savasava cake tikoga. Na veivutuni e veisiga sa salatu ki na bula savasava, ka sa vakavure kaukauwa na bula savasava.”³

A kaya talega o Peresitedi Nelson ni “kena caka kei na sasaga me da vinaka cake vakalailai tiko ena veisiga” e kauta mai vei keda na “kaukauwa veivakaqaqacotaki.”⁴ Ni da vakayagataka na kaukauwa veivakaqaqacotaki meda saqata kina na turaga se marama vakavuravura (raica na Mosaia 3:19), eda sa na toso tiko yani ki liu ena salatu lesu ki vua na Tamada.

Baleta ni sega na ka tawasavasava sa tiko rawa ena mata ni Kalou (raica na Mosese 6:57), eda sa cakacaka e veisiga ena veisaututaki dina vakayalo—ena noda vakasama, noda gagadre, kei na noda itovo. Ena vosa ni iApositolo o Paula, eda qara me da vaka na tamata buli vou ena vukui Karisito, ka sosomitaka tiko vakamalua na noda bula makawa ena dua na bula vou (raica na 2 Korinica 5:17). E yaco na veisau oqo laini vaka laini ni da saga tiko me da vinaka cake vakalailai ena veisiga.

Ni muri tiko na iVakabula ena noda saga tiko me da vakataki Koya e sa dua na ivakarau ni noda cakitaka na lomada, ka sa vakamatatataka o Koya ena tauri cake ni noda kauveilatai (raica na Maciu 16:24–26). Eda taura cake na noda kauveilatai ni da:

Yadrava na noda gagadre, lomada, kei na vakanananu.
“Ciqoma na veika kece sa raica na Turaga ni dodonu [meda] sotava” ena yalomalua (Mosaia 3:19).
Vakuwai [keda] mai na veika kecega sa sega ni vakalou (raica na Moronai 10:32).
Wasea na yaloda ki vua na Tamada, me vaka e a vakayacora na iVakabula.

Ia na cava me da na vakayacora ni da sa tacaqe? Eda gole ki vua na Tamada ka kerei Koya me “vakayagataka na dra ni veisorovaki i Karisito me [da] vosoti kina ena [noda] ivalavala ca” (Mosaia 4:2). Eda segata tale me da ulabaleta na malumalumu eso ka vakanadakuya na ivalavala ca. Eda masuta na loloma soliwale, na “kaukauwa veivukei kei na veivakabulai vakayalo” i Jisu Karisito.⁵ Eda taura cake na noda kauveilatai ka tomana na noda ilakolako, se cava ga na kena balavu se dredre, ki na vanua yalataki ni Kedrau iserau.

Nuitaka na Nona Yalayala

Na noda tawamate rawa kei na bula tawamudu esa Nona cakacaka kei na lagilagi ni Kalou (raica na Mosese 1:39). Na noda cakacaka me da rawata na lagilagi o ya sa oka kina na noda gumatuataka tu na noda ivakadinadina ni da tiko e vuravura.

Ena raivotu, a raica na Parofita o Josefa Simici ni o ira na yalodina “era na ra-wa na ka kecega” (Vunau kei na Veiyalayalati 76:60). E muri, a cauraka o koya, “Ena vakatakilai mai vei ira sa gumatua ni muria na kosipeli i Jisu Karisito na itikotiko vakaturaga, na veimatanitu, na matanitu vakatui, ko ira na turaga sa liu, kei ira na turaga kaukauwa.” (Vunau kei na Veiyalayalati 121:29).

Ni da nuitaka tu na veiyalayala oqo, eda na sega ni guce, o ira na noda daulomani, se na luve ni Kalou tale eso. Eda na saga me da na vakayacora na noda vinaka taucoko ka vukei ira na tani me ra cakava vakakina. Vakai keda ga, e sega ni dua vei keda ena taucoko sara ka me na vakabulai ena matanitu vakasilesitieli, ia “ena cakacaka dodonu, kei na loloma cecere, kei na loloma soli wale ni Mesaia Tabu” (2 Nifai 2:8), sa rawa ni rawati na veivakalougatataki o ya.

Ni da yalodina tikoga, au vakadinadinataka ni da na taukena na “marau tawayalani” ena iserau ni Tamada kei na Luvena. “Io, mo ni nanuma, mo ni nanuma, ni ra sa dina na veika oqo; ni sa kaya na Turaga na Kalou” (Mosaia 2:41).