Yavu ni Kosipeli

Na Tamada Vakalomalagi e Vinakata Me Da Bula Marau

Ni da nanuma deivaki na yavu ni bula marau ni Kalou, sa rawa ni da kune reki ena gauna mada ga e dredre kina na bula.

Ni bera na noda sucu e vuravura, eda a bula vata tu kei na Tamada Vakalomalagi vaka Luvena vakayalo. A vakaraitaka o Koya e dua na ituvatuva me vukei ira kina na Luvena me ra vuli ka tubu. Mai na Nona ituvatuva, sa rawa me da na vakataki Koya vakalevu cake ka kilikili kaya me da na marautaka na bula tawamudu. Sa rawa tu na ituvatuva oqo baleta ni a lako mai ki vuravura na Luve ni Kalou, o Jisu Karisito, me vakararawataki ena vuku ni noda ivalavala ca, na solibula e vakatokai na Veisorovaki.

Na ituvatuva ni Tamada Vakalomalagi sa vakatokai na yavu ni

bula marau (raica na Alama 42:8).
veivakabulai (raica na Mosese 6:62),
veivueti (raica na Jekope 6:8), se
loloma cecere (raica na Alama 42:15).

Me vaka e vakaraitaki toka ena vei wase kei na tikina oqo kei na ivolanikalou tale eso, sa vinakata na Tamada Vakalomalagi me da vakataki Koya, lesu ki Vua, ka marau vakaidina (raica na Mosese 1:39).

Eda sa Lako Mai ki Vuravura Me da Vuli ka Tubu

Sa talai keda mai ki vuravura na Kalou, me da mai taukena e dua na bula vakayago (raica na Ai Vakatekivu 1:26–27). Eda sa gadreva na yago me vukei keda me da vakila kina na bula e vuravura.

Sa kila tu na Kalou ni da na sega ni marau tikoga ena veigauna kece. Eda sotava na rarawa, na mosi, ka vakakina na mate. Ia ena veibolei ni bula, na Tamada Vakalomalagi sa dau veivuke meda vuli ka tubu.

Sa solia talega vei keda na Kalou na galala ni digidigi, me rawa ni da veidutaitaka na vinaka kei na ca. Sa vakatara o Koya me da digitaka vakai keda na ka me da vakasamataka ka vakayacora. Sa solia o Koya vei keda na ivolanikalou kei na parofita bula me ra vukei keda ena vulici ni kena digitaki na dina (raica na Eparama 3:25).

Tovolea mo Vakataki Jisu Karisito

A sega ni talai keda mai ki vuravura na Kalou ke sega tu ni vakarautaka mai e dua na ivakaraitaki me da muria (raica na Joni 13:15). A tala mai o Koya na Luvena, o Jisu Karisito, me mai vakaraitaka vei keda na sala. Me vulici na sala me da muri Koya kina, sa rawa ni da wilika na ivolanikalou me da vulica kina se o cei o Koya kei na veika a vakayacora ena Nona bula voli e vuravura. Sa rawa talega ni da caka vinaka sara me da vakataki Karisito ena noda talai rawarawa ki vua na Kalou kei na noda lomani ira na tani.

Ni da caka cala, eda kerea na veivosoti ka kukube ki na kaukauwa ni Veisorovaki i Jisu Karisito me vukei keda me da veisau. Sa rawa ni da bula marau ni da tovolea ena veisiga me da vakataki Koya vakalevu cake.

Na Mate e Sega ni iCavacava

Ni da sa mate, sa lako na yaloda ki na vuravura ni yalo. Eda tomana tikoga na vuli ekea ni da vakavakarau tu ki na Tucaketale.

Ena gauna ni Tucaketale, ena cokoti vata na yagoda kei na yaloda. Na yagoda sa na vinaka sara, ka da na sega tale ni sotava na mate se mate veitauvi. (Raica na Alama 11:44–45.) Me vaka ga ni a mate o Jisu Karisito ka bula tale mai, eda na bula kece tale.

Ni sa vakataulewa na Kalou, ena vakadikeva o Koya na noda ivalavala kei na noda gagadre. Kevaka eda sa tovolea tiko me da muria na ivunau kei na yalayala eso eda a cakava ki vua na Tamada Vakalomalagi, sa rawa ni da na qai bula vata tale kei Koya.

Na bula vata kei na Kalou kei na Noda Matavuvale mai Lomalagi

Ena matanitu vakasilesitieli, eda na bula vata kei na Kalou kei Jisu Karisito. Eda na rawa talega ni bula vata kei na noda matavuvale me tawamudu ke da sa vauci vei ira. Eda na kune vakacegu, marau, kei na sautu (raica na Mosaia 2:41).

Na noda bula e vuravura ena dredre beka ena so na gauna, ia ke da muri Jisu Karisito, sa rawa ni da kune reki ena bula oqo kei na marau tawamudu ena bula sa bera mai.

Na Cava e Tukuna na iVolanikalou me baleta na Yavu ni Bula Marau?

Sa ka bibi na ivakarau ni noda bulataka na noda bula. Ena lewai keda ka sausaumi vei keda na Kalou me vaka na lomada kei na noda ivalavala. (Raica na Alama 41:3)

Sa meca ni noda bula marau o Setani. Sa temaki keda o koya me da vakaveitaliataka na noda bula e vuravura ka caka cala. Sa vinakata me da rarawa sara me vakataki koya. (Raica na 2 Nifai 2:27).

Ni da vakabauta tu na ituvatuva ni Kalou me baleti keda, sa rawa ni da kune vakacegu se cava ga na veivakatovolei eda sotava. Sa rawa ni da vakanamata ki na bula tawayalani vata kei na Kalou. (Raica na Vunau kei na Veiyalayalati 59:23.)