Lako Mai, Mo Muri Au
Ravuti ni Veisaqasaqa
Vunau kei na Veiyalayalati 71–75
28 ni June–4 ni Julai
Droini mai vei Dan Burr
Na ivakatakila ena Vunau kei na Veiyalayalati 71 e tukuna vei rau o Josefa Simici kei Sidini Rikitoni me rau gole ka vunau me sagai me vakamaravutaki kina na yalo vakatani ka sa tubu cake tiko mai me saqati kina na Lotu ena vuku ni nodra veivakacacani na lewenilotu era sa vakanadakuya na nodra vakabauta. Ni oti e 100 na yabaki, a sotava talega o Elder Spencer W. Kimball ena Kuoramu ni iApositolo Le Tinikarua na veika a yaco o ya ena nona vunau yani me taqomaka na Lotu.
Na Veisiko nei Elder Kimball ki Ecuador
Ena dua na veisiko ki Otavalo, Ecuador, ena 1965, a kaya o Elder Kimball vei ira na daukaulotu me ra vakaraitaka na iVola i Momani vei ira na itaukei mai Otavalo. Ia, era a sotava na daukaulotu na veivorati ena gauna era sa tekivutaka kina na kai Otavalo me ra vakadewa na italanoa lasu me baleti ira na daukaulotu ena vei koro voleka, ka ra a sasaga na daukaulotu me ravuti na veika lasu oqo.
Ni oti e rua na yabaki, a soqoni vata o Elder Kimball kei na vica na lewenilotu kei ira na daukaulotu ena dua na bose volekata e dua na ikelekele ni basi. Ni ra sa sobu mai na basi na lewenivanua e kea, era a sureti ira na daukaulotu me ra mai rogoca e dua na iApositolo bula i Jisu Karisito. Sega ni dede, e rauta ni 20 na tamata era sa soqoni mai. Ni ra sa tekivutaka nodra soqoni na daukaulotu, sa sivia na 100 na wiliwili ni tamata.
Oti sa qai vosa o Elder Kimball. A talanoataka o koya na Nona a lako mai o Jisu Karisito ki Amerika. A dusi ki lomalagi ka tukuna me baleta na domo malua, lailai mai lomalagi ka a kacivaka na nona rairai mai na luve ni Kalou, me vaka e tiko ena iVola i Momani. E nanuma lesu o Elder Kimball, “Na mata yadua era sa vakamuria cake na ligaqu ki lomalagi me vaka ga ni sa tiko dina kina na iVakabula ka sa lako tiko mai ena o mamare.”1
Ni oti oqo, era a tovolea tikoga na daukaulotu me ra vakavulici ira na kai Otavalo. Era a vakavulica na daukaulotu goneyalewa e dua na turaga na yacana o Rafael Tabango, ka a qai papitaiso ena 14 ni Julai, 1968—na isevu ni Yalododonu Edaidai ka kai Otavalo. Na marama watina, o Teresa, a qai lewena talega na Lotu. Ni toka e 15 na yabaki, a tauyavutaki e dua na iteki mai Otavalo, ka kacivi o Baraca Tabango me imatai ni kena peteriaki.