Na Sala Eda Rawa ni Veivosakitaka kina na Veivakatotogani
Oqo eso na vakatutu me baleti ira era vakatotogani, na vakatutu vei ira na nodra iliuliu ni Lotu, kei na nodra matavuvale.
iTaba mai na Getty Images
A vosa vakabibi na iVakabula ena veivakaccani: “Ia ko koya sa vakacala e dua vei ira na lalai oqo era sa vakabauti au, sa vinaka vua kevaka sa vakarubeci e domona e dua na vatu iqaqi levu, ka vakadromuci ena wasaliwa titobu” (Maciu 18:6; raica talega na Marika 9:42; Luke 17:2).
Na veivakatotogani sa ikoya na nodra vakalolomataki se vakawaleni na tani (me vaka e dua na gone se tamata vakawati, o ira na itabaqase, se or ira na vakaleqai tu vakayago) ena sala e vakavuna tu na mavoa vakayago, ni vakasama, se ni kucuvi. Na itutu ni Lotu e sega ni tokona tu na veivakacacani ena ivalavala cava ga.
Sa rawa ni veivuke na vakasama eso oqo, se o dua o iko ka a rawai ena veivakatotogani se o iliuliu ni Lotu se o itubutubu i koya e a rawai.
Kivua e a Vakalolomataki
Me vaka e dua e vakalolomataki1 ena veivakacacani, e sega ni dodonu mo bilitaki ena veivakacacani o a sotava, se mo gadreva na veivosoti mai na nona vakayaco ivakarau ca vei iko e dua na tamata. O na rairai vakananuma na sala e rawa ni veivuke kina na iVakabula me vakabulai iko. O na rairai nanuma ni sa baleti ira ga na valavala ca ka gadreva tu na veivutuni na cabori ni veisorovaki ni iVakabula.
E vukei iko vakacava na iVakabula? Ena vuku ni Nona solibula, sa kila deivaki tu o Koya. Sa tiko vua na iVakabula na kila matua vakalou. E dina ga eda na rairai sega sara ni kila vinaka na sala a vakila kina na iVakabula na noda mosi kecega, sa rawa ni da vakabauta ni sa kila deivaki tu o Koya, ena sala vinaka sara, na turaga, marama, kei na gone vakayadua (raica na 2 Nifai 9:21). Sa rawa ni vakarautaka o Koya na vakacegu kei na kaukauwa mo toso rawa kina ki liu.2
Mai na Nona Veisorovaki, sa vukei ira na mavoa tu na iVakabula. Sa rawa ni veivuke o Koya “me veivakabulai ka vukei keda ena veivakararawataki cava ga eda vosota tu.”3
Se cava ga na gauna se ivakarau ena saumi taro kina o koya ka cakacala, sa rawa ni o “vakadeitaka tu ni o koya na Turaganilewa Uasivi, o Jisu Karisito, ena kilaka maucokona ni veika matailalai, ena sauma lesu vei ira kece na dauveivakacacani ena vuku ni ivalavala tawadodonu kecega.”4 Kila talega ni o ira “ka vakacacani watidra se luvedra … era na saumi taro ena dua na siga kivua na Kalou.”5
Kivei Ira na iLiuliu ni Lotu
Sa gadrevi vei ira kece na iliuliu kei na qasenivuli ka qaravi ira na itabagone kei na gone me ra taura na veituberi ena initaneti “Protecting Children and Youth.”6
Sa sega ni dodonu me vakalaiva na iliuliu ni Lotu e dua na ripote ni veivakacacani se me vakasalataka e dua na lewenilotu me kakua ni ripotetaka na caka cala eso.7 Sa dodonu me ra vakayacora na iliuliu ni Lotu kei na lewenilotu na itavi vakalawa taucoko ni kena ripotetaki na veivakacacani ki na tabana ni lewenivanua eso. Ia, e duidui tu na lawa ni soli ripote ena veiwasewase. Eso na iwasewase e gadreva na italatala me veitaratara vei ira na dau maroroi lawa, ia e so tale na iwasewase e vakatabuya.
Sa ka bibi vei ira na iliuliu me ra kila deivaki ni na rairai dredre vei ira na rawai ena veivakacacani me ra vakararavi ki na so tale—vakabibi o ira ena itutu ni vakatulewa. Ena rairai veibolei sara na kena ituvaki vaka yalo; na kena dredre ki vua e rawai me na talanoataka ena rairai sega ni semati vei iko ena sala cava ga. Na nodra sotavi duadua na iliuliu ena rawa ni vakavu ririko ki vei ira na rawai ena veivakacacani. O ira ka rawai sa rawa ni ra sureta e dua na uabula nuitaki me tiko vata kei ira ena gauna era sota vata kina kei ira na iliuliu ni matabete.8
Veitalia na gauna a vakacacani kina e dua, sa rawa ni yaga vua na veitokoni kei na veivuke vakasakiti. E vuqa ka ra rawai era na vakabulai vinaka sara ni sa vakadeitaki na lomadra, era na vakila na yalodei kei na veitaqomaki, era na vakila ni ra sa vakabauti mai vua e dua, ka ra na kila vakavinaka cake na sala e sa rawai ira kina na veivakacacani. Na veitokoni sa rawa ni vukea na nodra kune vakacegu ka sega ni galili ni ra qara veivakabulai.9
Sa dodonu me ivakarau dei tu na vorati ni veivakacacani se o cei ga e vakaitavi kina. Ni ra tiko ena itutu ni vakatulewa kei na veivakabauti na daucaka cala, ia, sa na qai bibi cake sara na veivakacacani ka sa rawa ni ra veivakararawataki sara kivua e rawai. O ira na tiko ena itutu ni veivakabauti ka vakacacani ira tale eso sa dodonu me ra beitaki ki na dua na ivakatagedegede cecere cake baleta ni ra sa voroka na veivakabauti nei koya e rawai. Na lawatu ni Lotu e sega saraga ni tokona na veivakacacani, ka sa dina sara o ya ki vei ira ena itutu ni veivakabauti kei na vakatulewa.
Kivei ira na iTubutubu
E dina ga ni dau vakalevutaki tu ena itukutuku kaburaki na italanoa ni veivakacacani eso mai vua e dua e tu ena itutu ni vakatulewa, era sa dau vakacacani vakawasoma sara na rawai mai vua e dua era kila vinaka. O koya e cakacala sa rawa ni dua na lewe ni matavuvale, wekana, se dua e tiko voleka. O koya e cakacala sa rawa ni yabaki ni bula cava ga. O koya e cakacala e sega sara ni mai vulagi vei koya e rawai.10
Ia sa tiko eso na ivakatakilakila ni sasaga ni veivakacacani eda rawa ni vakatavulica vei ira na luveda me rawa ni vukea na nodra kila ka levea. Vakavulici ira na luvemu ke dua e kerei ira me ra vakayacora e dua na ka era kila ni cala tu, sa rawa ni ra kaya sega. Oqo eso na ivakaraitaki ni sala e rawa kina vei ira na daucaka cala me ra veivakasaurarataki, veivakarerei, se me ra vakalomavinakataki ira kina o ira era via rawa:
-
O ira na dau caka cala era vakayagataka na nodra itutu, vakatulewa, yabaki, ivakarau, se kilaka me ra vakasaurarataki koya me rawai me kitaka na ka era vinakata.
-
Era kaya ni ra sega ni vinakata me ra itokani i koya me rawai vakavo ke kitaka o koya me rawai na ka era tukuna.
-
Era taura e dua na ka ka na sega ni vakasuka lesu vakavo ke kitaka o koya me rawai na ka era tukuna.
-
Era veivakarerei me ra na vakatetea na lasu me baleti ikoya me rawai vakavo ke veivakadonui o koya me rawai.
-
Era soli ka ni loloma, vakayaco ka, se soli cocovi tale eso me rawa kina na ka era vinakata.
-
Era tukuna vei ira na rawai ni sega ni dua ena vakabauti ira ka ra na sotavi leqa kevaka era tukuna ki na dua na veivakacacani e yaco.
-
Era veivakarerei ni veivakamavoataki vei koya e rawai se dua na daulomani nei koya e rawai ke sega ni kitaka o koya e rawai na ka era tukuna.11
Sa ituvaki drakidrakita na veivosakitaki ni veivakacacani. E sega tu na isaunitaro rawarawa, ia eda rawa ni vakacegui vakalevu ena vosa i Elder David A. Bednar ena Kuoramu ni iApositolo Le Tinikarua: “E sega ni dua na mosi vakayago, sega na mavoa vakayalo, sega na yaluma ni yalo se mosi, sega na leqa se malumalumu daru lako curuma tu ena bula oqo e a sega ni sotava taumada na iVakabula. Ena dua na gauna ni bula malumalumu eda rawa ni kacivaka yani, “E sega ni dua e kila se vakacava tu. Sega ni dua e kila vakavinaka.’ Ia na Luve ni Kalou esa kila vakavinaka deivaki tu, ni sa vakila ka a colata o Koya na noda icolacola vakayadua. Ia baleta na ilutua kei na tawamudu ni Nona isoro, (raica na Alama 34:14), sa tiko Vua na kilaka vinaka sara ka sa rawa ni dodoka vei keda na Ligana loloma dau veivueti. E sa rawa ni sudra yani o Koya me, tarai keda, vukei keda, vakabulai keda, ka vakaqaqacotaki keda me da rawaka vakalevu cake mai na kena eda rawata tu ena gauna oqo ka vukei keda me da kitaka na ka eda na sega ni kitaka rawa ena noda nuitaki keda ga vakataki keda kei na noda kaukauwa vakatakikeda.”12
O My Father, mai vei Simon Dewey
Me da sa gole ki vua na Tui ni Sautu ka kune nuinui kei na veivakabulai mai vei Koya.