Lako Mai, Mo Muri Au

“Au Na Liutaki Iko Tiko”

Mai vei Milton Camargo

Matai ni Daunivakasala ena Mataveiliutaki Raraba ni Matawilivola ni Sigatabu

E dina beka ni wili vaka gonelalai vakayalo, ena dusimaki keda na Turaga kevaka eda nuitaki Koya.

mission president meeting with missionary — A kaya na daukaulotu ni vakasolokakana na Yalotabu niu na vukei koya me kunea e dua na isaunitaro.

Ena Vunau kei na Veiyalayalati 78:17–18, e kaya kina na iVakabula:

“E dina, e dina, au sa kaya vei kemudou, oi kemudou na gonelalai, ka dou sa sega ni kila na cecere ni veivakalougatataki sa koto ena ligana na Tamada ka sa vakarautaka me baleti kemudou;

“Ka dou sa sega ni kila na ka kecega; ia, dou marau ga, niu na liutaki kemudou tiko. Sa nomudou na matanitu kei na veivakalougatataki sa koto kina, ka sa nomudou na iyau ni gauna tawamudu.

Ni da vakasamataka yadua na veika eda sotava ena noda bula, eda na nanuma vakaidina na gauna sa liutaki keda kina na Turaga.

Na Nona Vakabauta o Daukaulotu

Au nanuma e dua na gauna a dusimaka kina na Turaga e vica na tamata. Au a veiqaravi tiko vaka-peresitedi ni kaulotu ena tabana ni kaulotu mai Brazil Porto Alegre South. E dua vei ira na neitou daukaulotu e tauvi koya tiko na coci, ka se bera vakadua ni bau wali. Ni vosa o koya, ena curuma na cagi na dela ni gusuna ka lako mai ucuna. E dredre vei ira eso me ra kila na ka e kaya.

A tukuna vei au o cauravou italatala qase oqo ni sa masulaka tiko na nona leqa. A kaya ni vakasolokakana mai na Yalotabu niu na vukei koya me kunei e dua na isau. E vakauqeti au na nona vakabauta rawarawa, ka yalodina. Au vuki vua na Kalou me veivuke ena kena kunei e dua na iwali.

E rawa ni vakavinakataka na leqa e dua na veisele rawarawa, ia na veisele oqo e sega ni cakacaka rawarawa. Kevaka me a caka vakatikitiki, ena rairai sau levu ki na vuvale nei daukaulotu oqo. Ena dua tale na yasana, na kena vakayagataki na valenibula raraba ena gadrevi e vica na kena veisiko ka na rairai taura na vo ni vica na vula ni nona kaulotu.

Na Vakabauta nei Watiqu

Ena veigauna kece e dau dredre na ilesilesi meu cakava, au dau rai toka ki na vakabauta kei na veivuke nei watiqu. Au a vakamacalataka vua na digidigi nei daukaulotu oqo ka kerei koya me veivosaki kei ira na vakailesilesi ni valenibula e kea. E tiko beka e dua na sala e rawa ni vakayacori na veisele e sega ni saumi ena loma ni gauna vakarautaki?

Ni oti na nona masu me vukei, a gole yani ki valenibula o watiqu. A laki laini sara ena iyatu balavu ni tamata era wawa tu me ra vosa vei koya na dauveiqaravi. Ni toso tiko na laini, sa rawa ni rogoca na watiqu na veivosaki e liu ni leqa sa vakamatatataki tiko. Na ka a yaco, a tukuni vei ira na tamata mera lesu tale mai ena ono na vula mai qo, so na gauna e dede sara.

Sa kila tu o watiqu ni sa rui balavu oqo vei neitou daukaulotu. A vakauqeti me biuta na laini ka curuma e dua tale na katuba. E kea a raica kina e dua tale na tamata cakacaka ni valenibula. A vakatakilai koya o watiqu ka vakamacalataka na gagadre nei neitou daukaulotu.

A vakasalataki koya o tamata cakacaka me vosa vakadodonu vei vuniwai dauveisele, a veisele tiko e valenibula ena siga o ya ena tabavale e cake. A vakamacalataka vei vuniwai na cava era dau cakava na daukaulotu kei na sala ena vakalougatataki kina na daukaulotu oqo kevaka me sele me vakavinakataka na nona coci.

A qai taroga o vuniwai eso na ka. A qai kaya o vuniwai, “Ena rawa beka me caka na veisele ena macawa rua mai oqo?” A vakalewena o vuniwai e dua na fomu ni valenibula e vakamacalataka na veisele oqo ena vuku ni itikotiko raraba ka sa taleitaka sara o koya. A solia na fomu vei nona ivukevuke ka kerei koya me tuvanaka na tikinisiga.

Ni oti e tini na siga, a seleti neitou daukaulotu o vuniwai. Sega ni dede sa kaulotu tale o italatala qase, ena marau kei na vosa ena domo matata. Ena mamaqusa vou, a kila kina o koya ni sa liutaki koya tiko na Turaga.

Na veika e sotava na daukaulotu oqo sa ivakadinadina ni sa dau rogoca na Tamada na noda masu ka na liutaki keda ena ligana.

Ni Sega na Kalou, Eda Sa Sega ni Dua na Ka

Ena vosa vakayalo, eda sa vakataka na gonelalai. Eda sega ni kila na veivakalougatataki cecere sa vakarautaka tu na Tamada Vakalomalagi vei keda. Ni da tubu cake tiko vakayago, eda sa tekivu kila vakavinaka cake na lawa vakavuravura e liutaka tiko na noda bula. Ia meda kakua ni vakatara na kila vakavuravura me ka bibi cake mai na noda kila na veivakalougatataki cecere sa vakarautaka tu na Tamada mai Lomalagi me baleti keda.

O Mosese, e dua na parofita qaqa ni Veiyalayalati Makawa, a sotava e dua na ka ka vakaraitaka na lailai ni ka e kila dina. Ni oti na nona “raica na vuravura kei na kena iyalayala, kei ira kecega na luve ni tamata era sa tiko kina, kei ira era a buli kina; a sa kurabui ka qoroqoro vakalevu kina ko koya.” A sa qai vakasuka na Kalou. Sa tu ga kina vakataki koya ko Mosese, ka sa bale sobu ki na qele.

“Ka sa yaco ni sa oti mada e vica na auwa sa qai kilai yalona ka kaukauwa tale ko Mosese me vaka e dua na tamata; a sa kaya vakataki koya: Ia ena vuku ni ka oqo au kila kina ni sa ka wale ga na tamata, oqo na ka au a sega sara tu ga ni kila” (Mosese 1:8–10).

Kevaka e vakaraitaka vei keda na Turaga na veika kece eda rawa ni cakava ena Nona kaukauwa, eda na rairai vakadrukai sara. Me vakataki Mosese, eda na raica ni sega na Kalou, eda sa ka wale.

Ena Veikalawa Yadua

Ia ni sega ni via vakadrukai keda, sa liutaki keda tiko na Turaga ena veikalawa yadua. Oqo e vakatara vei keda meda rawata vakalevu cake mai na veika eda rawata vakataki keda.

“Ni sa duatani na noqu vakanananu ka duatani na nomudou vakanananu, ka sa duatani na noqu ivalavala ka duatani na nomudou ivalavala, sa kaya ko Jiova.

“Me vaka na kena cecere cake na lomalagi ki vuravura, sa cecere cake vakakina na noqu ivalavala ki na nomudou ivalavala, kei na noqu vakanananu ki na nomudou vakanananu” (Aisea 55:8–9).

Me vaka e kaya na Turaga ena Vunau kei na Veiyalayalati 78:18, eda “sa sega ni kila na ka kecega.” Eda se bera mada ni kila rawa na veika kece e kila tu o Koya. Na cava beka, me da sa qai cakava? E sauma kina na Turaga, “Mo dou vakacegu!”

Na lakovi ni sala ni veiyalayalati ena marau qaqa e oka kina na yalomalumalumu, me vaka e dua na gone lailai. E dodonu me da tu vakarau me da vakavulici ka liutaki mai vei Tamada (raica na Vunau kei na Veiyalayalati 112:10). Sa rui vakaitamera na bula ka sega ni rawa ni da lewa na veika matailalai ni noda ilakolako. Ka da sega ni rawa ni kila na veika yadua eda lako curuma, oi keda se noda daulomani, ena vuravura oqo.

Ia ni da nuitaka tiko na Turaga ka vakatarai Koya me liutaki keda ena ligana, eda na rawa-ka vakalevu cake ena Nona matanitu mai na kena eda rawa ni vakasamataka. Eda na rawa ni vakalougatataka vakalevu cake na nodra bula na luvena na Tamada Vakalomalagi. Eda na rawa ni kila na liga ni iVakabula ena noda bula. Eda na rawa ni vakavinavinakataka vakalevu cake na Nona loloma veivueti kei na loloma tawayalani.

Na Veivakalougatataki e Nomu

Kena itinitini, sa dau liutaki keda na Turaga ena nona vakananuma vei keda ni “sa nomudou na matanitu kei na kena veivakalougatataki sa koto kina, ka sa nomudou na iyau ni gauna tawamudu” (Vunau kei na Veiyalayalati 78:18).

Au lesu tale ki na ivakaraitaki ni noqu daukaulotu. A tuberi o koya me kere veivuke ka vakalougatataki ena dua na veisele sa rawa kina vua me vosa vakamatata sara. A sa qai dusimaki kivei ira era sa vakarau tu mera ciqoma na kosipeli kei na kena veivakalougatataki, oka kina na papitaiso. Au raica talega kina na ivakaraitaki nei watiqu. A kaukauwa cake na nona ivakadinadina ni dusimaki koya na Turaga. A qai dolava o Koya na katuba ni lomalagi ka sovaraka mai na veivakalougatataki.

Au vakavinavinaka niu rawa ni cakacaka vata kei na daukaulotu gone oqo, ka sinai tu ena vakabauta rawarawa, ka kaukauwa. Kau vakavinavinaka niu na bula tawamudu vata kei na watiqu, a vakotora e dua na ivakaraitaki ni nona vakatara na Turaga me liutaki koya yani.

Sa dina sara ni sa noda na matanitu kei na veivakalougatataki.