Feiā ʼāpī paʼari
Te rirora’a ’ei ta’ata ōteo fa’ahou ā i te pae ’āehuehu
Tē ora nei te ta’ata pāpa’i i Séville, Pāniora
’Aitā vau i fārerei a’enei i te hepohepo e tae roa i tō’u ho’ira’a mai nā tā’u misiōni, nō reira ’aita roa vau i pāpū e nāhea ’ia haere i mua.
Mau hōho’a ta’ata i patahia
Tē tere nei te orara’a mai te au i te ’ōpuara’a.
’Ua fātata roa vau i te fa’aoti i tā’u misiōni. I roto i nā 18 ’āva’e, ’ua pūai atu ā tō’u ’itera’a pāpū, ’e ’ua ’ā’ano atu tō’u hi’ora’a i te fa’anahora’a nō te fa’aorara’a. ’Aita roa atu vau i ’ite a’e nei i tō’u fātatara’a i tō’u Fa’aora ’e i tō’u Metua i te Ao ra. E au ra e mea ’oa’oa roa a’e te orara’a.
’Oia mau, ’ua ora tō’u ’utuāfare ’e o vau i tō mātou mau tāmatara’a, terā rā i roto i te tā’āto’ara’a, e ’oa’oa rahi tō’u, ’e e rave rahi tā’u mau ’ōpuara’a nō te mau mea e tae mai i muri mai. I muri iho rā, ’ua ho’i au i te fare. ’E e mea huru pūai te hitimahutara’a. ’Ua tāfifi au i te fa’atanotanora’a i ni’a i te orara’a o te mau mahana ato’a. ’Ua ha’ape’ape’a tāmau vau nō ni’a i te ravera’a i te mau mā’itira’a maita’i ’e ’ia maita’i roa i roto i tō’u ha’apa’ora’a. ’Ua tu’u vau i te fa’ateimahara’a rahi i ni’a iā’u iho nō te fa’aea noa i te fāito vārua teitei tā’u i fāri’i i roto i tā’u misiōni nō te mea ’ua ri’ari’a vau ē, mai te mea ’aita vau e nā reira e paruparu vau i te pae vārua.
’A rahi noa ai au i te tu’u i te fa’ateimahara’a i ni’a iā’u, ’ua ha’amata vau i te fāri’i i te hepohepo ’e te ri’ari’a. ’Ua haere noa te reira i te pinepinera’a, ’e ’ua mana’o roa vau ē, tē paremo ra vau.
Te vāhi ’ino rā, ’ua huna vau i tō’u mau mana’o i tō’u ‘utuāfare ’e i tō’u mau hoa. ’Ua ’ite au ē, ’aita e faufa’a ’ia ha’amā i te ahoaho ’e te hepohepo tera rā, ’aita tā’u e nehenehe fa’ahou e ha’avī iā’u ’e ’aita vau i ta’a fa’ahou ē nāhea rā, nō reira, ’aita vau i ’ite e nāhea ’ia fa’a’ite e aha tā’u e fa’aruru nei nō te ani i te tauturu.
Aua’e rā, tei reira noa te Fatu nō te arata’i ia tātou ’ia fāriu ana’e tātou i ni’a iāna. I muri a’e i te tahi ferurira’a hōhonu ’e te pure, ’ua fa’auruhia vau ’ia parauparau i tō’u taea’e ’e tāna vahine. ’Ua tauturu mai rāua iā’u ’ia ’ite ē, ’aita vau i « ma’ama’ahia » mai tā’u i mana’o, ’e e nehenehe te reira ’arora’a i te pae mānava e tupu i ni’a i te mau huru ta’ata ato’a.
’Ua fa’a’ite pāpū te tuahine Reyna I. Aburto, tauturu piti i roto i te peresidenira’a rahi o te Sōtaiete Tauturu i teie parau mau : « E a’u mau hoa here, e nehenehe te reira e tupu mai i ni’a ia tātou pā’āto’a—mai te mea iho ā rā ē, tātou te feiā ti’aturi i te fa’anahora’a nō te ’oa’oa, e tu’u tātou i te mau hōpoi’a faufa’a ’ore i ni’a ia tātou iho nā roto i te ferurira’a ē, e mea ti’a ia tātou ’ia maita’i roa i teienei. E nehenehe te reira mau huru mana’o e fa’ateimaha. Te tītaura’a ’ia roa’a te maita’i roa, e ’ohipa te reira nō tō tātou orara’a tāhuti tā’āto’a ’e tae atu i’ō mai—’e nā roto ana’e i te aroha ’o Iesu Mesia ».1
E ha’api’ira’a fa’auruhia
’A pure ai au i te Metua i te Ao ra nō te ani i te arata’ira’a, ’ua ’ite a’era vau e tītauhia iā’u ’ia fa’a’ohipa i te mau rāve’a tāna i hōro’a mai ia tātou, ’e ’ua tītauhia iā’u ’ia ha’api’i mai ’e ’ia taui ’ei ta’ata maita’i a’e. Aua’e rā, i taua taime ra ’ua fana’o vau i te haere i te ha’api’ira’a a te ’Ēkalesia nō ni’a i te ōteo-fa’ahou-ra’a i te pae mānava . Mai te huru ra ē ’ua tae mai te reira ’ohipa i te taime ti’a mau, ’e ’aita vau e mana’o ra e ’ohipa tupu noa te reira ma te mana’o-’ore-hia.
I roto i te buka ha’api’ira’a, tē tātarahia nei te ōteo-fa’ahou-ra’a i te pae ’āehuehu mai teie i muri nei :
-
« Te ti’ara’a ’ia fa’aau i te mau tāmatara’a i te pae ’āehuehu ma te itoito ’e te fa’aro’o tei ha’atumuhia i ni’a ia Iesu Mesia.
-
« Te tauturura’a ia ’outou iho ’e ia vetahi ’ē i te maita’i roa a’e e ti’a ia ’outou.
-
« E ’imi i te tauturu hau atu mai te mea e hina’arohia ».2
E nehenehe e parau ē, te ōteo-fa’ahou-ra’a i te pae ’āehuehu ’o te hō’ē ïa mea tā tātou pā’āto’a e hina’aro.
Nō’u nei, ’ua riro teie ha’api’ira’a fa’auruhia ’ei tāpa’o māramarama ē, ’ua ’ite te Metua i te Ao ra i te mau tāmatara’a tā tātou e fa’aruru nei i teie mahana ’ei mau melo nō te ’Ēkālesia a Iesu Mesia. Tē hina’aro nei ’oia e tauturu ia tātou ’ia tāmau noa i te haere i mua i ni’a i te ’ē’a nō te ho’i iāna ra. Te ’itera’a i te mau huru nehenehe e rave rahi o teie ha’api’ira’a i tauturu iā’u ’ia ’ite i te hōhonura’a o tō te Metua i te Ao ra ’itera’a ia tātou tāta’itahi ’e tō tātou mau hina’aro tāta’itahi, ’e ’ua ’ite ’oi’oi au i te hau ’a ha’amata ai au i te tuatāpapa. Tē ha’api’i nei teie ha’api’ira’a i te mau parau mau mure ’ore māramarama ’e te pūai ’o tē nehenehe e fa’a’ohipahia i roto i tō tātou orara’a ’ia fifi ana’e tātou i te pae o te ea o te ferurira’a, nō tātou ānei ’e ’aore rā nō te hō’ē ta’ata tā tātou i here.
Hō’ē o te mau ha’api’ira’a tei ha’aputapū iā’u, tei roto ïa i te pene 9, « Te hōro’ara’a i te pūai ia vetahi ’ē ». Nā teie pene i tauturu iā’u i te pae hope’a nō te tītau i te tauturu hau atu. Tē ha’api’i nei te reira i te parau tumu nō te tāvinira’a i te tahi ’e te tahi. ’Ua ha’api’i mai au i te faufa’a rahi ’ia tāvini ia vetahi ’ē nā roto i te ha’apāpūra’a i tō rātou mau mana’o, tō rātou pae ’āehuehu, ’e tō rātou ferurira’a ’e te torora’a i te rima ma te au maita’i ’e te hāro’aro’a. ’Ua ’ite ato’a vau ē, e tītauhia iā’u ’ia ti’aturi ia vetahi ’ē nō te tauturu iā’u i roto i tā’u mau ’arora’a.
I te taime ’a ti’a ai iā’u ’ia fa’a’ohipa i teie mau mana’o ’e te ’īritira’a iā’u i tō’u ’utuāfare ’e i tō’u mau hoa nō ni’a i tō’u mau fifi nō te ea o te ferurira’a, ’ua māere au i tō rātou aroha rahi ’e te ha’avā ’ore. ’Ua fāri’i au i te pāturura’a rahi nō roto mai ia rātou.
’Ua mana’o vau ē, e rahi roa atu ’e e ’ino roa atu tō’u hepohepo ’āhiri ’aita vau i fa’a’ite i tō’u mau tāmatara’a i tei herehia e au. ’E nā teie ’ohipa i tauturu iā’u ’ia fa’atoro i tō’u rima ’e ’ia fa’atupu i te au ia vetahi ’ē nō ni’a i tō rātou mau pe’ape’a ’e tō rātou ho’i mau fifi.
E nehenehe tātou e fa’aruru i te ananahi ma te tīa’iturura’a
I te ho’ira’a mai au nā tā’u misiōni, ’ua ’ārearea ri’i au nō tō’u pe’ape’a rahi nō ni’a i te mo’era’a « te tahua pae vārua » tā’u i fāri’i i roto i tā’u misiōni, nō te mea i teienei, tē ’ite nei au ē, ’ua riro te ho’ira’a i te fare ’ei ha’amatara’a nō te hō’ē pene ’āpī i reira vau e ’ite mai ai i te mau rāve’a ’āpī nō te fa’ahōhonu atu i tō’u fa’aro’o.
’Ua tupu rahi tō’u iho mau aura’a ’e te Metua i te Ao ra ’e Iesu Mesia ’e ’ua hōhonu roa i te taime ’a ho’i mai ai au i te fare, nō te mau parau tumu iho ā rā tā’u i ha’api’i mai i roto i teie ha’api’ira’a nō te ōteo-fa’ahou-ra’a i te pae ’āehuehu ’e nā roto i te ti’aturira’a i ni’a i te Metua i te Ao ra ’e i te Fa’aora nō te tauturu iā’u. Tē vai mau nei rāua ma te pāpū i roto i tō’u orara’a i te mau mahana ato’a.
’Ua ha’api’i mai au ’e ’ua fāri’i au ē ’ei mau tamari’i nā te Atua, e taui tāmau tātou, e ha’api’i tāmau mai tātou ’e e haere tāmau i mua. ’E nō reira, noa atu te mau tauira’a o tō tātou orara’a, e’ita te Metua i te Ao ra e taui. ’Aita ’oia e tītau nei iā’u ’ia maita’i roa i roto i tā’u misiōni, ’e ’aita ’oia e tīa’i nei i te reira i teienei. ’Ua here noa ’oia iā’u ’e tē hina’aro nei ’oia ’ia tāmau noa vau i te tūtava nō te haere iāna ra ’e ’ia rave au i te maita’i a’e e noa’a iā’u i ni’a i tō’u tere ho’ira’a iāna ra.
I teienei, nō te mea noa ’ua rave au i teie ha’api’ira’a nō te ōteo-fa’ahou-ra’a i te pae ’āehuehu, ’aita ïa te reira e parau nei ē, ’aita tō’u e hepohepo fa’ahou ’aore rā, e arora’a ri’ari’a fa’ahou, ’aore rā e mau taime ’ia teimaha ana’e au i te ri’ari’a nō ananahi. Tē tupu noa nei te reira i terā ’e terā taime. I teienei rā, tē ’ite nei au i teie mau hōho’a ’e ’ua ha’api’i mai au i te mau mauha’a nō te tauturu i te fa’atītī’aifarora’a i te reira nā roto i te hō’ē rāve’a maita’i a’e, ma te ha’amaita’i i te huru o tō’u orara’a i te mau mahana ato’a.
I te pae hope’a, ’ua ha’api’i teie ha’api’ira’a iā’u i te mau rāve’a fa’aaura’a nō te mau taime ’a fārerei ai au i te hepohepo ’e te mau tāmatara’a. ’Ua ha’api’i mai te reira iā’u i te fa’a’oroma’i ’e i te aroha iā’u iho ’e i tō’u mau paruparu. ’E ’ua ha’api’i mai au ’ia māramarama e nāhea te Atua i te hi’o mai iā’u ’e ’eiaha e mata’u i te mau mea ’ite-’ore-hia o te ananahi.
Nā roto i te tauturu a te feiā ’aravihi ’e a tō te ra’i, ’ua ’ite au ē tei ia tātou ra te mau mauiha’a e tītauhia nō te ’ite e nāhea ’ia « ’ohipa ’e ’eiaha ’ia fa’aruru i te mau ’ohipa » (2 Nephi 2:26) nā roto i tō tātou mau ’āehuehu ’e tō tātou mau ferurira’a ’a tāmau noa ai tātou i te haere i te Mesia ra.