Mai, pe’e mai

Te mau ha’amaita’ira’a nō te tuatāpapara’a i te Faufa’a Tahito

Nā te peresideni Mark L. Pace

Peresideni rahi nō te Ha’api’ira’a Sābati

’A tai’o ai tātou i te mau pene ’e te mau ’īrava o teie buka pāpa’ira’a mo’a tahito, e ha’apūaihia tātou i te pae vārua.

Jesus Christ with stars in background — E mea hōhonu te mau parau fafau a te peresideni Nelson, ’e e parau mau te reira.

Mānava i te tuatāpapara’a i te Faufa’a Tahito nō 2022, ma te rāve’a tauturu Mai,pe’e mai ’ei arata’i ! Te Faufa’a Tahito ’o te hō’ē ïa pu’e parau mo’a o te pāpa’ira’a mo’a tei fa’ahereherehia e te rima o te Atua ’ia tai’o tātou ’e ’ia feruri hōhonu. E nehenehe te reira e riro ’ei ha’amaita’ira’a ’e ’ei arata’ira’a nō tātou i teie mau mahana hope’a nei.

E hōro’a mai te Faufa’a Tahito ia tātou i te hō’ē hōho’a e 3 500 matahiti nō te fa’aro’o ’e te ha’apa’o maita’i fātata e 4 000 HM e tae atu e 500 HM. E 39 buka i roto i te Faufa’a Tahito. E tāpo’i te Genese i nā tau tu’ura’a ’evanelia e maha a Adamu, Enoha, Noa ’e Aberahama. Nā 38 buka e toe ra, Exodo e tae atu i te Malaki, tei ha’apa’ohia nō te tau tuura’a ’evanelia a Mose.

’A tai’o ai tātou i te Faufa’a Tahito, e mātau maita’i tātou i tōna mau peropheta ’e tā rātou mau ha’api’ira’a. ’Ua ha’api’i rātou i te ’evanelia a Iesu Mesia. ’Ua tohu rātou ’e ’ua tīa’i rātou i te taera’a mai o te Mesia. ’Ua fa’ahereherehia tā rātou mau ha’api’ira’a fa’auruhia nō tō tātou nei ’anotau.

’A tai’o ai tātou i te mau pene ’e te mau ’īrava o te Faufa’a Tahito, e ha’apūaihia tātou i te pae vārua. E fa’atae mai te Vārua Maita’i i tō tātou ferurira’a te mau ’īrava pāpa’ira’a mo’a ta’a ’ē, ’o tē riro mai ’ei pūai nō tātou ’a tīa’i ai tātou i te ho’ira’a mai o te Fa’aora.

E uira’a fa’auruhia

Tē hina’aro nei au e fa’a’ite atu i te hō’ē ā’amu e nāhea te hō’ē noa ’īrava o te Faufa’a Tahito i te fa’aurura’a iā’u i te roara’a o tō’u orara’a.

I te matahiti 1974,17 matahiti tō’u. ’Ua au roa vau i te orara’a ’ei taure’are’a i te fare ha’api’ira’a tuarua. Tē tīa’i ra vau i tā’u misiōni ma te ieie. I roto i te ve’a Ensign nō te ’āva’e ’Ātopa 1974, ’ua tai’o vau i te hō’ē a’ora’a pūai a te peresideni Spencer W. Kimball (1895–1985) te upo’o parau « ’Ia fa’afāriuhia mai te ao nei ».¹ ’Ua tai’o vau i te reira e rave rahi taime. Tē fa’auru nei ā te reira iā’u i teie mahana.

’Ua vauvau mai te peresideni Kimball i te hō’ē hi’ora’a ātea nā te ao ato’a nei nō te tupura’a i te rahi o Te ’Ēkālesia a Iesu Mesia i te Feiā Mo’a i te mau Mahana Hope’a Nei i roto i teie tau tu’ura’a ’evanelia. ’Ua ha’api’i mai ’oia i tā tātou rāve’a ’e tā tātou hōpoi’a ’ia ’āfa’i i te ’evanelia nā te ao ato’a nei. ’Ua fa’ahiti te peresideni Kimball i te hō’ē ’īrava nō te buka a Genese. ’Ua fa’auru te reira iā’u i taua taime ra ’e ’ua tāmau noa te reira i te fa’auru iā’u i te roara’a o tō’u orara’a : « Tē vai atu rā ānei te hō’ē mea e ’ore e ti’a ia Iehova ’ia rave » ? (Genese 18:14, tei fa’ata’ahia e tuatāpapa i te ’āva’e Fepuare).

’Ua hi’o fa’ahou te peresideni Kimball i te ’ā’amu o Aberahama ’e o Sara. ’Ua ’ata o Sara i te fafaura’a a te Fatu ē e fānau ’oia ’e o Aberahama i te hō’ē tamaiti. ’Aita rāua i ha’amaita’ihia i te mau tamari’i. I teienei, e 90 ’e e 100 matahiti tō rāua. Tei ni’a roa atu tō rāua matahiti nō te fānaura’a i te tamari’i.

« ’Ua parau mai ra te Fatu ia Aberahama, nō reira, ’ua ’ata o Sara… ? »

« Tē vai atu ra ānei te hō’ē mea e ’ore e ti’a ia Iehova ’ia rave ? » I te taime ’a fa’ata’ahia ai, e ho’i au ia ’oe ra, mai te au i te tau o te orara’a, ’e e fānau o Sara i te hō’ē tamaiti » (Genese 18:13–14).

’Ua fa’a’ohipa Aberahama ’e o Sara i te fa’aro’o. ’Ua tāpe’a te Fatu i tāna fafaura’a. ’Ua fānauhia mai Isaaka. ’Ua riro mai Aberahama ’ei metua nō te mau nūna’a.

Te pūai nō te fa’aruru i te mau tāmatara’a

« Tē vai atu ra ānei te hō’ē mea e ’ore e ti’a ia Iehova ’ia rave ? » ’Ua ha’apūai teie pāpa’ira’a mo’a nō te Faufa’a Tahito iā’u ’a fa’aruru ai au i te mau tāmatara’a ’e ’aore rā te mau ha’ape’ape’ara’a o te orara’a :

’Ei misiōnare ’āpī i te taime ’a hepohepo ai au. « Tē vai atu ra ānei te hō’ē mea e ’ore e ti’a ia Iehova ’ia rave ? »
I muri a’e i tā’u misiōni, i te fa’aotira’a māua Anne Marie e fa’aipoipo ’e ’ua ha’ape’ape’a māua i te hi’ora’a e nāhea i te ’aufau i te mā’a, te tārahu fare ’e te mau ha’amāu’ara’a nō te ha’api’ira’a. « Tē vai atu ra ānei te hō’ē mea e ’ore e ti’a ia Iehova ’ia rave ? »
’Ei nā ta’ata fa’aipoipo ’āpī, te fāri’ira’a i te mau tamari’i ’e te ’itera’a i te mau tītaura’a pae faufa’a o te orara’a. « Tē vai atu ra ānei te hō’ē mea e ’ore e ti’a ia Iehova ’ia rave ? »
Te fa’arurura’a i te mau tāmatara’a nō te ha’api’ira’a teitei, te ’utuāfare e tupu ra i te rahi ’e te ha’amatara’a i te hō’ē tōro’a ’ohipa. « Tē vai atu ra ānei te hō’ē mea e ’ore e ti’a ia Iehova ’ia rave ? »
I tō’u rirora’a ’ei peresideni nō te misiōni i Barcelone, Paniora, ’ua fa’ahiti pinepine māua Anne Marie i teie pāpa’ira’a mo’a ’a ha’api’i ai māua i te mau misiōnare. « Tē vai atu ra ānei te hō’ē mea e ’ore e ti’a ia Iehova ’ia rave ? » I roto i te mau rata a tā māua mau misiōnare e vai pinepine iho ā te hō’ē fa’ahitira’a parau « Tē vai atu ra ānei te hō’ē mea e ’ore e ti’a ia Iehova ’ia rave ? »

E pāpa’ira’a mo’a niu

reproduction of stone tablets with Ten Commandments

’Ua riro teie ’īrava o te mau pāpa’ira’a mo’a ei ’ōta’i hō’ē o te mau hi’ora’a e rave rahi nō te mau ’īrava fa’auru e ’itehia i roto i te Faufa’a Tahito. ’Ua pāpū iā’u ē, e rave rahi tei fa’auru a’ena ia ’outou. Mai te mea e tai’o tātou ma te ’ā’au tae ’e ma te pure i te Faufa’a Tahito i teie matahiti, e ’ume te Vārua Maita’i i te tahi atu mau ’īrava ta’a ’ē o te ha’apūai i tō tātou fa’afāriura’a ia Iesu Mesia ’e i tāna ’evanelia.

Tei roto i te Faufa’a Tahito te ha’api’ira’a tumu ’e te mau parau tumu o te faufa’a mure ’ore. Tei roto te mau parau tohu e tīa’ihia i tōna tupura’a. Tē ha’api’i nei te reira ia tātou nō hea mai tātou. ’E tē ha’api’i nei te reira ia tātou nō ni’a i te fafaura’a a Aberahama, ’o tē tupu noa nei ā i teie mahana.

E hōro’a mai te Faufa’a Tahito i te tahi niu nō tā tātou mau pāpa’ira’a mo’a ’ē atu. Rahi noa atu ā tō tātou hāro’aro’a i te Faufa’a Tahito, rahi noa atoa atu ā tō tātou ’ite nō te tahi atu mau buka pāpa’iraa mo’a, nō te mea e ’itehia tāna mau ha’api’ira’a i roto i te tahi atu ā mau buka pāpa’iraa mo’a :

I roto i tāna tau tāvinira’a, ’ua ha’api’i te Fa’aora ma te fa’a’ohipa i te mau pāpa’ira’a mo’a nō roto mai i te Faufa’a Tahito.
’Ua ’āfa’i Lehi ’e tōna ’utuāfare i te mau ’api veo, tei roto te mau pāpa’ira’a mo’a nō te Faufa’a Tahito.
’Ua ha’api’i Nephi ia Iakoba nā roto i te fa’ahitira’a a Isaia i roto i te Faufa’a Tahito.
I roto i tōna fārereira’a i te mau ’āti Nephi i muri a’e i tōna ti’afa’ahoura’a, ’ua fa’ahiti Iesu Mesia i te Isaia ’e te Malaki i roto i te Faufa’a Tahito.

beings appearing to Joseph Smith and Oliver Cowdery in Kirtland Temple

’Ua riro ato’a te mau peropheta ’e te mau ha’api’ira’a i roto i te Faufa’a Tahito ’ei niu nō te poro’i o te fa’aho’i-fa’ahou-ra’a-hia mai o te ’evanelia i tō tātou nei ’anotau :

I roto i tōna mau fārereira’a mātāmua i te peropheta Iosepha Semita, ’ua fa’ahiti Moroni i te Malaki.
Tei roto i te Poe Tao’a Rahi te mau buka a Aberahama ’e a Mose.
’Ua hōro’a Mose, Elia ’e o Eliaha i tā rātou mau tāviri autahu’ara’a i te peropheta Iosepha Semita i roto i te hiero nō Ketelani.

E aha te fā ?

’A tai’o ai tātou i te mau buka i roto i te Faufa’a Tahito, e ti’a ia tātou ’ia feruri ē ’ua mā’itihia te mau buka, ’ua ha’apāpūhia, ’e ’ua fa’anahohia mai te hō’ē huru ta’a ’ē nō te hō’ē parau tumu hanahana. E nehenehe tā tātou e ui tano ia tātou iho ē : « Nō te aha teie ha’amāramaramara’a i tu’uhia mai ai i roto ’e e aha te ’ōpuara’a tāna e hōro’a mai » ?

Noa atu ē e mea fifi ri’i te tahi mau tuha’a o te Faufa’a Tahito ’ia māramarama, e ti’a ia tātou ’ia ha’amana’o ē tē vai ra i roto te hō’ē tao’a faufa’a rahi e’ita e ti’a ’ia ha’apa’o-’ore-hia. Mai tā Iosepha Semita i ha’api’i, « Tē ti’aturi nei mātou ē o te Bibilia ra o te parau ïa a te Atua, ’ia ti’a te ’īritira’ahia » (Te mau Hīro’a Fa’aro’o 1:8). E mea pāpū roa e ha’amaita’ihia tātou nā roto i te tuatāpapara’a i te parau a te Atua !

E mea maita’i paha i roto i tā tātou tuatāpapara’a i te Faufa’a Tahito ’ia ’imi i te mau tumu parau ’e te mau mana’o. E ti’a ia tātou ’ia ’imi i te mau rāve’a nō te māramarama maita’i a’e ē te Atua o te Faufa’a Tahito ’o te Atua ato’a ïa nō te Faufa’a ’Āpī. Iehova ’o Iesu Mesia ïa. Nāhea te tuatāpapara’a i te Faufa’a Tahito e tauturu ai ia tātou ’ia ’ite maita’i i tō tātou Fa’aora ?

Te tahi atu mau tumu parau rarahi tā’u i ’ite mai i roto i te Faufa’a Tahito ’oia ho’i te mau fafaura’a, te mo’ara’a, te mau peropheta ora, te tusia ’e te ha’apa’ora’a, te fa’aro’o ’e te tātarahapara’a, te ’āruera’a i te Fatu ’e te teitei o te Atua.

’A tuatāpapa ai tātou, e ha’amana’o tātou ē e hōro’a mai te heheura’a nō te mau mahana hope’a nei ia tātou i te tahi māramarama rahi atu ā nō te Faufa’a Tahito. ’Ei hi’ora’a, māuruuru nō te heheura’a nō teie ’anotau, ’ua ’ite tātou ē ’ua mau te mau peropheta o te Faufa’a Tahito i te autahu’ara’a a Melehizedeka ’e ’ua ’ite ’e ’ua ha’api’i te mau peropheta nā mua atu i te ’evanelia a Iesu Mesia.

Te mau fafaura’a a te hō’ē peropheta

I roto i teie tau tu’ura’a ’evanelia, ’ua ha’amaita’i-fa’ahou-hia tātou i te ’itera’a ē e hōro’a mai te mau peropheta ’e te mau ’āpōsetolo i te mau ha’api’ira’a ’e te mau a’o fa’auruhia.

’Ua vauvau mātāmua mai Elder Quentin L. Cook nō te pupu nō te Tino ’Ahuru ma Piti ’āpōsetolo te Mai, pe’e mai—nō te ta’ata hō’ē e te ’utuāfare i roto i te ’āmuira’a rahi nō ’Ātopa 2018.² ’Ua riro teie mātēria tauturu ’ei ha’amaita’ira’a rahi nō tātou pā’āto’a. ’Ua hōro’a mai nā matahiti e toru i ma’iri, iā’u i te tahi mau ’itera’a rau hōhonu ’e te faufa’a i roto i tō’u orara’a, nō te tūatapapara’a i te pāpa’ira’a mo’a. ’Ua pāpū iā’u ē tē tīa’i mai ra te mau ha’amaita’ira’a ’aifāito ia tātou tāta’itahi i te matahiti 2022.

’Ua parau te peresideni Russell M. Nelson ē mai te mea e taui tātou i tō tātou mau ’utuāfare ’ei mau vāhi mo’a nō te fa’aro’o ’e ei mau pū nō te ha’api’ira’a ’evanelia, e fāri’i tātou e maha ha’amaita’ira’a ta’a ’ē :

« E riro mau tā ’outou mau mahana sābati ’ei mahana hina’arohia ».
« E ’ana’anatae roa mai tā ’outou mau tamari’i i te ha’api’i mai ’e i te ora i te mau ha’api’ira’a a te Fa’aora ».
« E iti noa mai te mana o te ’enemi i roto i tō ’outou orara’a ’e i roto i tō ’outou ’utuāfare ».
« E taui roa mai tō ’outou ’utuāfare ’e e vai noa te reira maita’i ».³

E mea hōhonu te mau parau fafau a te peresideni Nelson, ’e e parau mau te reira. ’Ua riro mai teie mau ha’amaita’ira’a ’ei mea pāpū ’e e tāmau noa te reira i te matahiti 2022 ’a tuatāpapa ai ’e ’a ha’api’i mai ai tātou nā roto mai i te Faufa’a Tahito.