Te reo o te feiā mo’a i te mau mahana hope’a nei
E Buka a Moromona tā rātou i’ō nei !
’A tāpe’a noa ai au i te Buka a Moromona i roto i tō’u nā rima, ’ua ’ite au i tā’u mau hopoi’a i te mo’e-’ē-ra’a i roto i te māhanahana o te here o te Fa’aora.
Hōho’a nā Jacob A. Brown
I te hō’ē mahana mā’a i te ’āfara’a o te pu’e tau to’eto’e, ’ua fana’o māua tā’u vahine i te hō’ē mahana maita’i ’e te to’eto’e rā nō te ha’amātau maita’i i tō māua vāhi nohora’a. ’Aita i maoro a’enei, ’ua fa’aru’e atu māua i tō māua fare nō te tere e rave rahi tauatini maile i te pae hiti’a o te rā o te fenua Marite nō te fa’ananea i tō māua ’ite i te pae ha’api’ira’a ’e i te pae nō te tōro’a.
’Ua fa’aoti māua e haere ’āva’e i te hō’ē fare ha’api’ira’a tuatoru fātata mai, ’o tā māua i ’ore i haere a’e nei i reira. I muri mai, ’ua ’itehia ia māua te fare vaira’a buka tumu o te fare ha’api’ira’a tuatoru. E mea au nā māua te tai’o, ’e tā’u vahine fa’aipoipo, e pīahi parau tū’ite tāna, ’ua hina’aro roa ’oia e hi’o e aha te mau rāve’a tauturu tāna e ’ite mai nō tāna ha’api’ira’a. Nō te mea tē tuatāpapa nei ’oia i te ’ā’ai pae fa’aro’o, ’ua hi’ohi’o a’era māua i te mau ’āpapara’a buka i roto i te tuha’a pae fa’aro’o o te fare vaira’a buka. ’A hi’o ai māua i te tahi mau upo’o parau maita’i, ’ua haru a’era tō’u mata i ni’a i te hō’ē buka na’ina’i ’e tōna tāpo’i nīnamu mātarohia.
« E Buka a Moromona tā rātou i’ō nei ! » ’Ua muhumuhu atu vau ma te oa’oa.
’Ua rave mai au i te buka mai ni’a mai i te pa’epa’e. E nene’ira’a tahito, ’e ’ua uiui au ē, e aha te maorora’a tōna vaira’a i reira. Te mea tei haru mai i tō’u ferurira’a, ’o te hō’ē ïa pāpa’ira’a tei tāpirihia i te rotora’a o te tāpo’i mua.
Taua pāpa’ira’a ra, ’o te hō’ē ïa fa’a’itera’a pāpū nā te hō’ē o nā ta’ata fa’aipoipo nō Blackfoot, Idaho, i Marite. I roto i tō rāua ’itera’a pāpū, ’ua fa’ata’a rāua e aha te Buka a Moromona ’e nō te aha e mea faufa’a te reira. ’Ua fa’a’ite rāua i te hō’ē ’itera’a pāpū poto ’e te pūai rā o te buka, e ’ua ani rāua i te ta’ata tai’o ’ia pure nō te ’ite ē, e parau mau ānei te reira.
E mea ’ōhie roa tā rāua mau parau, ’ua putapū roa rā tā rāua poro’i i roto i tō’u ā’au. Penei a’e ’ua hina’aro teie nā ta’ata fa’aipoipo ’ia tai’ohia tō rāua ’itera’a pāpū e te feiā e ’ere nō tā tātou ha’apa’ora’a fa’aro’o. Penei a’e ’ua hōro’a rāua i teie buka i te hō’ē ta’ata tā rāua i mātau. ’O vai tei ’ite e hia taime tōna tauira’a i te rima e ’aore rā e hea maile tāna i rātere ’a tae mai ai i te fare vaira’a buka a teie fare ha’api’ira’a teitei ?
’A tāpe’a noa ai au i te buka i roto i tō’u nā rima, ’ua fa’a’ī te Vārua i tō’u ’ā’au. Nō te hō’ē taime, ’ua ’ite au i tā’u mau hōpoi’a i te mo’e-’ē-ra’a i roto i te māhanahana o te here o te Fa’aora.
Tē tāmau noa nei te reira mahana i roto i te fare vaira’a buka i te fa’aha’amana’o iā’u i te mau ha’amaita’ira’a tā’u i fāri’i i te tai’ora’a i te Buka a Moromona ’e te faufa’a rahi ’ia fa’a’ite i tō’u ’itera’a pāpū. E nehenehe tō tātou ’itera’a pāpū e topa « i te vāhi pāpā » e ’aore rā « i te vāhi repo maita’i » (hi’o Mataio 13:3–9), e mea faufa’a rā ’ia fa’a’ite tātou i te reira. E ’ara te Atua ē ’ia fa’ataehia te reira i te taime tano, i te vāhi tano, ’e i te mau ta’ata ti’a.