Mānava ia ’oe i roto i teie ve’a

Tauira’a i te mārō nā roto i te here

Joseph of Egypt (Iosepha nō Aiphiti), nā Michael T. Malm

I te tahi taime, tē fa’aruru nei tātou i te pe’ape’a i roto i tō tātou mau autā’atira’a. Te ’itera’a e nāhea ’ia taui i te pe’ape’a ’ino nā roto i te pe’ape’a maita’i, e mea faufa’a roa ïa nō tō tātou orara’a maita’i. Teie rā, e ’aro mau tātou i te reira.

E mea teimaha mau te pe’ape’a ’ino. Tē ’ū’ana nei te mārōra’a. E mea iti roa tā tātou mau mā’itira’a. E tupu mai te mana’o paruparu ia tātou ’e te pe’ape’a. E vaiihohia te mau autā’atira’a tei mutu ’e te mau huira’atira ’āmahamaha i roto i te vaira’a pehu.

E nehenehe ato’a rā tātou e tomo i roto i te pe’ape’a maita’i, i reira e ’itehia ai ia tātou te ti’amāra’a o te ’ino o te mārōra’a. E nehenehe tātou e fa’atupu i te parauti’a ’e te aroha, e ha’apūai i tō tātou mau aura’a, ’e e fa’a’āfaro i te mau fifi hōhonu. E nehenehe e fa’atupu i te hau—i roto i tō tātou mau autā’atira’a ’e tō tātou mau huira’atira.

’Ei ārai pe’ape’a, ’ei tāne fa’aipoipo ’e ’ei metua tāne, ’ua ’itehia iā’u ē, e nehenehe te ’evanelia a Iesu Mesia e hōro’a mai ia tātou i te māramarama ’e te pūai e tītauhia nō te taui i te mārōra’a nā roto i te here.

I roto i teie ve’a, e tai’o ’outou e mea nāhea i ti’a ai ia Iakoba, ia Esau ’e ia Iosepha ’ia fa’afaite i te mau pe’ape’a i roto i tō rātou ’utuāfare ’e nāhea e nehenehe ai ia tātou ’ia nā reira ato’a i roto i tō tātou mau ’utuafare ’e te mau huira’atira (hi’o ’api 20). E tai’o ato’a ’outou i te parau pāpa’i ’oto a Elder D. Todd Christofferson, ’oia ho’i, e nāhea te ’ati e nehenehe ai e ha’amaita’i ia tātou mai te mea e fāriu tātou i ni’a i te Fatu nō te ani i te tauturu (hi’o ’api 6).).

E rave rahi o tātou e amo nei i te māuiui rahi nō ni’a i te mau aura’a tei mutu i te fare ’e i te ao nei. Maita’i ē, e hōro’a mai teie ve’a i te ti’aturira’a i te feiā e mana’o nei ē, ’aita e rāve’a fa’ahou nō te fa’afaite, e fa’auru te reira i te fa’aro’o ē, ’aita tātou i vai ’ōtahi noa, ’e te mea faufa’a roa atu, e ’ite tātou i te here o Iesu Mesia nā roto i te hō’ē rāve’a ’o tē taui ’eiaha noa i tō tātou ’ā’au, i te ’ā’au ato’a rā o te feiā tā tātou e ’aro nei.

Ma te māhanahana,

Chad Ford

’Orometua ha’api’i nō Intercultural Peacebuilding, Brigham Young University–Hawaii