Mau parau niu o te ’evanelia

Tāvinira’a i roto i te mau pi’ira’a o te ’Ēkālesia

E ani te feiā fa’atere o te ’Ēkālesia i te mau melo ’ia tāvini i roto i te mau ’ohipa ta’a ’ē tei pi’ihia « te mau pi’ira’a ». E hōro’a te mau pi’ira’a i te mau melo i te mau rāve’a nō te tāvini ia vetahi ’ē ’e ’ia ha’afātata atu i te Atua.

Hōho’a nā David Bowen Newton

’Ia tāvini ana’e tātou i roto i tō tātou mau pi’ira’a, tē tauturu ra ïa tātou ’ia rave fa’aoti i te ’ohipa a te Atua. Tē ha’api’i nei tātou ia vetahi ’ē nō ni’a i te Metua i te ao ra ’e ia Iesu Mesia ’e tē tauturu nei ia rātou ’ia ha’afātata atu ā ia rāua. E fāri’i ato’a tātou i te mau ha’amaita’ira’a ’a tāvini ai tātou ma te ha’apa’o maita’i.

Fāri’ira’a i te mau pi’ira’a

’O rātou ’o tē tāvini nei i roto i te ’Ēkālesia, ’ua pi’ihia ïa e te Atua. Tē pure nei te feiā fa’atere o te ’Ēkālesia ’ia fa’auruhia rātou ’ia ’ite ’o vai tē ani ’ia tāvini i roto i te pi’ira’a tāta’itahi. I muri iho, e ani te hō’ē ti’a fa’atere i te hō’ē melo ’ia tāvini ’e e fa’ata’a mai i te mau hōpoi’a o te pi’ira’a. Nō te rahira’a o te mau pi’ira’a, e pāturuhia te mau melo i roto i te purera’a a te ’Ēkālesia. E hōro’a te mau melo o te pāroita ’e ’aore rā o te ’āma’a i te hō’ē mā’itira’a pāturu. Te aura’a, e hina’aro rātou e pāturu i te ta’ata e pi’ihia ra. I reira te melo e hōro’ahia ai te hō’ē ha’amaita’ira’a nā te hō’ē ti’a fa’atere o te autahu’ara’a. E parauhia te reira ’ia fa’ata’ahia. E hōro’ahia i te melo te mana nō te rave i te ’ohipa i roto i te pi’ira’a ’e i te tahi atu mau ha’amaita’ira’a nō te tauturu iāna ’ia tāvini.

’Episekōpo

Te ’episekōpo ’o te ti’a fa’atere ïa o te hō’ē pāroita. (I roto i te hō’ē ’āma’a, ’ua tū’ati te hō’ē peresideni ’āma’a i te hō’ē ’episekōpo.) E ani te peresideni titi i te hō’ē taea’e ti’amā tei mau i te autahu’ara’a ’ia pi’ihia ’ei ’episekōpo. E fa’ati’a te Peresidenira’a Mātāmua i te pi’ira’a. I reira te ’episekōpo e pāturuhia ai ’e e fa’ata’ahia ai nō te tāvini. E fāri’i ato’a ’oia i te mau tāviri o te autahu’ara’a, ’oia ho’i e mana tōna nō te fa’atere i te pāroita. ’Ei ’episekōpo, e tāvini ’e e arata’i ’oia i te mau melo ato’a o te pāroita.

Te mau peresidenira’a

E arata’ihia te mau pupu autahu’ara’a ’e te Sōtaiete Tauturu, te Feiā Āpī Tamāhine, te Paraimere ’e te Ha’api’ira’a Sābati nā te mau peresidenira’a, te peresideni ’e e piti tauturu. E pi’ihia ’e e fa’ata’ahia te mau peresidenira’a pupu peresibutero nā te peresidenira’a titi. E ani te ’episekōpora’a i te mau melo ’ia tāvini i roto i te tahi atu mau peresidenira’a i roto i te pāroita ’e e fa’ata’ahia rātou. E tāvini te feiā fa’atere ato’a i te mau melo i roto i tā rātou mau pupu autahu’ara’a ’e ’aore rā mau fa’anahora’a. E pāhono rātou i te mau hina’aro o te mau melo ’e e tauturu ia rātou ’ia ’ite i te here o te Atua.

Te tahi atu ā mau pi’ira’a

I roto i te tahi atu ā mau pi’ira’a o te ’Ēkālesia, tē vai ra te ha’api’ira’a, te tauturura’a nō te pehe, te ha’apa’ora’a i te mau pāpa’a parau, te fa’anahora’a i te mau ātivite nā te feiā āpī ’e ’aore rā nā te mau tamari’i, ’e te tāvinira’a nā roto i te tahi atu mau rāve’a. E mea faufa’a te pi’ira’a tāta’itahi i roto i te ’Ēkālesia ’e e hōro’a te reira i te mau melo i te rāve’a nō te tāvini ia vetahi ’ē ’e nō te tāvini i te Atua. ’Ia ’ohipa ’āmui ana’e tātou pā’āto’a nō te rave i tō tātou mau pi’ira’a, tē ha’apūai ra ïa tātou ia vetahi ’ē ’e tē tauturu ra tātou i te ’Ēkālesia ’ia tupu i te rahi.

Nō roto mai i te mau pāpa’ira’a mo’a

Nō ’ō mai i te Atua ra te mau pi’ira’a nō te tāvini i roto i te ’Ēkālesia (hi’o Te mau Hīro’a Fa’aro’o 1:5).

E pi’ihia tātou ’e e fa’ata’ahia hou tātou ’a tāvini ai i roto i te hō’ē pi’ira’a (hi’o Te Ha’api’ira’a Tumu ’e te mau Fafaura’a 42:11).

’A tāvini ai tātou i roto i tō tātou mau pi’ira’a, tē tauturu ra ïa tātou i te patura’a i te ’Ēkālesia (hi’o Te Ha’api’ira’a Tumu ’e te mau Fafaura’a 84:109–10).

Ha’api’i nāhea ’ia ’ohipa i tō ’outou pi’ira’a

Te fāri’ira’a i te hō’ē pi’ira’a e rāve’a maita’i roa ïa nō te tāvini ia vetahi ’ē. I roto i te pi’ira’a tāta’itahi tē vai ra tāna iho tāpura hōpoi’a, nō reira e mea faufa’a ’ia ha’api’i mai i te reira ’a ha’amata ai ’outou i te tāvini. Teie te tahi mau rāve’a nō te tauturu ia ’outou :

• Parauparau i te ta’ata fa’atere tei pi’i ia ’outou. ’A ui e aha te ha’api’ipi’ira’a tā ’outou e nehenehe e fāri’i.

• ’A hi’o i tō ’outou pi’ira’a i roto i te Buka arata’i rahi a te ’Ēkālesia, e roa’a i ni’a ChurchofJesusChrist.org. Tē vai ra i roto te mau pene nō ni’a i te Sōtaiete Tauturu, te pupu peresibutero, te Paraimere, ’e tē vai atu ra.

• I ni’a i te ChurchofJesusChrist.org ’a pata « Mau pi’ira’a » i raro a’e i te Tāvinira’a i roto i te tāpura ’ohipa tumu. E hōro’a mai te reira i te mau ha’amāramaramara’a nō ni’a i tō ’outou pi’ira’a.

• ’A pure nō te fa’aurura’a ’e ’a tuatāpapa i te mau pāpa’ira’a mo’a ’e te mau a’ora’a o te ’āmuira’a rahi ma tō ’outou pi’ira’a i roto i te ferurira’a. E ha’amaita’i mai te Metua i te ao ra ia ’outou nō te tāvini maita’i i tāna mau tamari’i.