« ’A pi’i mai iā’u nā mua roa », Liahona, Māti./’Ēperēra 2022.
Te reo o te feiā mo’a i te mau mahana hope’a nei : Mau vahine fa’aro’o
’A pi’i mai iā’u nā mua roa
Tē ’oa’oa nei au i te mea ē, ’aita vau i ’ere i te rāve’a nō te tauturu i te hō’ē tuahine tei hina’aro iā’u ’e ’o tā’u i hina’aro.
I te tau e metua vahine ’āpī au ’e tā’u ’aiū mātāmua, tei te fare ha’api’ira’a tuatoru noa ā tā’u tāne. E ’ohipa ’āfa mahana tā māua nō te fa’arava’i te orara’a.
Ma te tīa’i i te hō’ē mahana ’ohipa ’ore, ’ua ’ōpua vau e māta’ita’i i te hō’ē hōho’a tahito i te ’āfata teata. I te reira tau hou te mau DVD ’e ’aore rā, te mau pū ha’apūrorora’a ’ītenati.
’Ua ha’amata te hōho’a teata i te taime tano mau—hora 10:00 i te po’ipo’i—i te taime e tā’oto ai tā māua tamaiti. Tē fa’atuiro’o rahi ra te reira ia Cary Grant, te hō’ē o tā’u mau ta’ata au roa nō te hōho’a teata marite.
I te pō hou tā’u mahana fa’afa’aeara’a, ’ua pi’i mai te peresideni o te Sōtaiete Tauturu o te pāroita. ’Ua ro’ohia te hō’ē tuahine nō te pāroita i te ma’i uaua roro māmā ’e tē hina’aro nei ’ia aupuruhia ’oia i te mahana i muri iho ē tae roa i te taime e ho’i mai ai tāna tamaiti nā te ’ohipa.
« E nehenehe au e rave i te reira, terā rā, tē vai nei te ta’ata i tō’u fare », ’ua parau mai te peresideni nō te Sōtaiete Tauturu. ’Ua fa’ata’a mai ’oia ē, ’aita e tuahine ’ē tāna e nehenehe e ani ’e ’ua parau mai ē nāna e ha’apa’o i tā māua tamaiti, ’a ha’apa’o ai au i te tuahine. ’Ua fāri’i au ma te au ’ore.
I te po’ipo’i a’e, ’ua ’āfa’i atu vau i tā māua tamaiti ’e ’ua haere au e fārerei i te tuahine. ’O Louise tōna i’oa ’e ’ua tupu ’oi’oi mai tō’u here rahi iāna. E ruhiruhiā ’oia mai tōu māmā rū’au tei pohe a’enei.
’Ua tauturu vau ia Louise ’ia ’ō’omo i tōna ’ahu ’e i muri iho ’ua fa’aineine i tāna inura’a tī. ’Ua pārahi atu ra ’oia i roto i te pārahira’a tura’i ’e ’ua tū’ama i te ’āfata teata. ’Aita i maoro, ’ua hora 10:00. ’A patapata noa ai ’oia i te ’āfata teata, ’ua parau a’era ’oia, « ’aita e ’ohipa maita’i tā teie ’āfata teata e hōro’a mai ».
’Ua ’ōti’ati’a ri’i au ’e ’ua parau atu ra, « tē vai ra hō’ē hōho’a teata nō Cary Grant i ni’a i te rēni 11 ».
« Ā ’ē ? » ’ua parau mai ’oia. « Mea au nā’u ia Cary Grant ! »
’Ua māta’ita’i māua i te hōho’a teata ’e ’ua ’oa’oa roa māua i te reira. I muri iho, ’ua fa’a’ite mai ’oia i te huru o tōna orara’a i ti’ahia ai tōna fāito matahiti mai tō’u. ’Ua fa’ati’a mai ’oia nō tāna tamaiti, ’e ’ua parau atu vau iāna nō tā’u. ’Ua parauparau mai ’oia nō te ’Ēkālesia ’e tōna huru mihira’a i te reira.
I te ho’ira’a mai tāna tamaiti, ’ua fafau atu vau e ho’i mai ā vau. ’Ua parau atu vau i te peresideni o te Sōtaiete Tauturu ’ia pi’i mai iā’u nā mua roa mai te mea e hina’aro Louise i te hō’ē ta’ata.
I nā hepetoma e piti i muri mai, ’ua ro’ohia o Louise i te tahi atu ma’i uaua roro, ’e ’ua fa’aru’e mai hou vau ’a ’ite fa’ahou ai iāna. E iva hora noa tō māua fārereira’a ’e hō’ē hōho’a teata, ’ua riro mai rā ’oia ’ei hoa rahi nō’u. Tē mana’ona’o pinepine nei au iāna.
Tē māuruuru nei au e ’aita vau i ’ere i te rāve’a nō te tauturu i te hō’ē tuahine tei hina’aro iā’u—’e ’o tā’u i hina’aro, noa atu ē ’aita vau i ’ite i te reira.