Te mau reo o te feiā mo’a i te mau mahana hope’a nei : Mau vahine fa’aro’o

E haere ana’e e māta’ita’i i te hiero

Nā Luz Stella de Berrio Arenas, Bogotá, Toromepia

I tō’u purera’a nō te ’ite e nāhea e ti’a ai iā’u ’ia tauturu i tō’u metua ho’ovai vahine, ’ua feruri au i te hiero.

Hōho’a nō te hiero nō Bogotá Colombia nā Ivan Ortiz Ponce

I te tau nō te ma’i pe’e COVID-19, ’ua ’ōpani te hiero nō Bogotá Toromepia. Nō te mea ’aita vau e nehenehe fa’ahou e haere i te hiero, i te tahi taime e ori haere au nā roto i te hiero, nā roto i tō’u ferurira’a, ma te ha’amana’o i tā’u tāvinira’a ’ei rave ’ohipa nō te hiero.

’Ua ’ū’ana roa te ma’i o tō’u metua ho’ovai i muri noa a’e i te ha’amatara’a te hō’ē ’ōpanipanira’a nō te ma’i COVID-19 i Toromepia. I tō’u purera’a nō te ’ite e nāhea e ti’a ai iā’u ’ia tauturu iāna, ’ua feruri au i te hiero.

’A feruri ai au i te hiero, ’ua fa’auruhia vau e te Vārua Maita’i ’ia ani i tō’u metua ho’ovai e hina’aro ānei ’oia e haere nā muri iho iā’u i te hiero, nā roto noa ra i te ferurira’a, « hō’ē o te mau vāhi nehenehe roa a’e i ni’a i te fenua nei ».

Ma te hō’ē reo paruparu, ’ua pāhono mai ’oia, « ’Ē ».

’Ua feruri māua e ha’amata mai nā tōna fare i Medellín, e rāterera’a mai i tō’u fare i Bogotá, ’e tae atu ai i te hiero. ’Ua feruri māua, tē tomo ra ’e tē tāvini ra i roto i te hiero. ’Ua feruri māua, tē pārahi ’āmui ra māua i roto i te piha tiretiera, ma te fa’ahiti i te hō’ē pure ha’amāuruuru i te Fatu.

I muri a’e, ’ua tāparu māua i te Metua i te ao ra, ’ia ti’a i tōna hina’aro, ’ia fāri’i fa’ahou tō’u metua ho’ovai i tōna tino maita’i, ’e i te pae hope’a, ’ia ti’a iāna ’ia ho’i tino roa i te hiero. ’Ua riro mau te reira ’ei ’ite ’aravihi hanahana ta’a ’ē mau, tei ha’apūai ’e tei fa’aitoito iāna.

Hō’ē o te mau ’ā’amu nō ni’a i te Fa’aora tei ha’aputapū roa a’e iā’u, ’ua tupu ïa i roto i te ’oire nō Kaperenaumi. Tē ha’api’i nei teie ’ā’amu ia tātou ē, e nehenehe te Fatu e ha’amaita’i ’e e fa’aora ia vetahi ’ē nā roto i te tauturu a te mau melo o te ’utuāfare ’e te mau hoa.

I tō te mau ta’ata nō Kaperenaumi ’itera’a ē, tei roto Iesu i te hō’ē fare, ’ua hōpoi mai ra rātou i te hō’ē ta’ata iāna ra tei ro’ohia i te ma’i hāpepa.

« ’E ’aore a’era rātou i fātata mai i pīha’i iho iāna i te rahi o te ta’ata, ’ua ’īriti a’era rātou i te tāpo’i i te vāhi tei reira ’o Iesu, ’e oti a’era i te ’īritihia, tu’u atu ra i raro i taua hāpepa ra ma te ro’i ato’a tāna e ta’oto ra ».

I tō Iesu ’itera’a i tō rātou fa’aro’o, ’ua parau atu ra ’oia i te ta’ata, « ’a ti’a i ni’a, ’a rave i tō ro’i, ’a haere i tō ’utuāfare ». (Hi’o Mareko 2:1–11.)

Mai teie ta’ata ma’i hāpepa, ’ua fa’aorahia tō’u metua ho’ovai nā roto i te mana o te Fa’aora ’e nā roto i te hō’ē ha’amaita’ira’a autahu’ara’a ’e nā roto i tōna fa’aro’o ’e te fa’aro’o o te ’utuāfare ’e te mau hoa.

I roto i teie mau taime pāpū ’ore, ’ua ’ite au ē, e nehenehe tātou e fāri’i i te arata’ira’a nō te ha’apūai ’e nō te fa’aitoito i te feiā nava’i ’ore. Mai te mea e fāriu tātou i ni’a i te Metua i te ao ra ’e e ha’amana’o noa iāna ’e i tāna Tamaiti, e nehenehe tātou e fāri’i i te hau, te tīa’ira’a ’e te fa’aorara’a.