“ʻI ha Potu Toputapu,” Liahona, ʻEpeleli 2022.
ʻI ha Potu Toputapu
ʻI hono puʻaki māmālie ʻe he talavoú e foʻi lea takitaha ʻo e lotu sākalamēnití, naʻá mau ongoʻi ha fakamoʻoni mālohi ki he ʻofa ʻa e ʻOtuá.
Tā fakatātaaʻi ʻe Dilleen Marsh
Ne ma foʻou atu ki he Uooti Taniuití ʻi heʻema fuofua fetaulaki mo Pilí. ʻI he kamata ʻa e houalotu sākalamēnití, naʻá ku fakatokangaʻi ʻene tangutu ʻi he tēpile sākalamēnití.
Hili hono maʻu ʻe he uōtí ʻa e maá, naʻe kamata leva ʻe Pili ʻa e lotu tāpuakiʻi ʻo e vai sākalamēnití, ka naʻá ne nenu mo fāinga ʻi he foʻi lea takitaha. Naʻe longo hifo mo e ngaahi fakahohaʻa mo e longoaʻa angamaheni ʻa e fānau īkí. Naʻe hangē naʻe tuʻu maʻu e tokotaha kotoa pē, ʻo tatali kia Pilí.
Naʻe ongo māmālie mai e fakalea ʻo e lotu mahino mo nounou ʻo e sākalamēnití, ʻo puʻaki māmālie mo tuai mai e foʻi lea takitaha. ʻI he kamataʻangá, naʻá ku ongoʻi momou maʻá e talavoú. Naʻe fonu hoku lotó ʻi he manavaʻofa kiate ia.
Ka naʻe liliu e meʻa kotoa pē.
ʻI he ʻosi e ʻuluaki kupuʻi lea ʻo e lotú—ko ha lotu kuo tuʻo tahaafe ʻeku fanongo aí—ne u ongoʻi ha ongo foʻou ʻi he lokí. Naʻe nofoʻia kimautolu ʻe ha ongo lōngonoa moʻoni, pea ne mau ʻiloʻi ʻoku mau ʻi ha potu toputapu. Naʻe ʻikai ke lau pē ʻe Pili e ngaahi lea ʻo e lotú ka naʻá ne lotu fakamātoato ki heʻene Tamai Hēvaní, ʻa ia naʻe tali mai ʻaki ha taumalingi hifo ʻa e Laumālié.
Naʻe ongoʻi ʻe he talavoú ni ʻa e ʻofa ʻa e ʻOtuá, pea naʻá ma ongoʻi monūʻia ke kau ʻi he ouau fakalaumālie makehe ko ʻení.
Naʻe hoko atu ʻa Pili pea faifai pē ʻo ne fakakakato ʻa e lotú. Naʻe ʻikai ke u loto ke ʻosi he naʻá ku fie maʻu ke hoko atu ʻa e ongo toputapu ko iá. Ka naʻe hokohoko atu e meʻafoaki mālohi ʻo e Laumālié ʻi he taimi ne tufaki ai e sākalamēnití ki he haʻofangá. Ko ha fakafoʻou moʻoni ia ʻo e ngaahi fuakava ke fakatomalá, hoko ʻo lelei ange, pea tauhi kakato ange ki he ʻEikí.
ʻI he fakaʻosinga ʻo e fakatahaʻangá naʻá ku lue atu ki he tēpile sākalamēnití ke fakamālō ki he talavoú. Naʻá ku fakatokangaʻi naʻá ne faingataʻaʻia fakaesino. Naʻá ne pehē mai, “Mālō,” mo malimali fiefia.
ʻI ha ngaahi taʻu kimui ange ʻi ha uooti kehe, ʻoku ou kei manatuʻi pē ʻa Pili. ʻOku mahuʻingamālie ange ʻa e houalotu sākalamēnití ʻi heʻeku feinga, hangē ko Pilí, ke ui ki he Tamai Hēvaní ʻi he tui mo e lotu fakamātoato.
ʻOku nofo e tokotaha ʻoku ʻaʻana e talanoá ʻi Folōlita, USA.