“Ko e Sākalamēnití: Ko ha Founga ke Manatuʻi ai ʻa e Fakamoʻuí,” Liahona, ʻEpeleli 2022.
Ngaahi Tefitoʻi Meʻa Mahuʻinga ʻo e Ongoongoleleí
Ko e Sākalamēnití: Ko ha Founga ke Manatuʻi ai ʻa e Fakamoʻuí
Ko e ʻOhomohe Fakaʻosí, tā fakatātaaʻi ʻe Simon Dewey
ʻI he pō kimuʻa pea tutuki ʻa Kalaisí, naʻá Ne fakataha mo ʻEne kau ʻAposetoló ʻi he ʻOhomohe Fakaʻosí. Naʻá Ne fuofua ʻoange ai ʻa e sākalamēnití kiate kinautolu. Naʻá Ne fakamatalaʻi ko ha founga ia ke nau manatu ai kiate Ia. Ko e sākalamēnití ko ha ouau ia ʻoku tau maʻu ai ʻa e maá mo e vaí ke manatuʻi e Fakalelei ʻa Kalaisí. ʻOku fakafofongaʻi ʻe he maá e sino ʻo Kalaisí, pea fakafofongaʻi ʻe he vaí ʻa Hono taʻataʻá.
ʻOku tau maʻu e sākalamēnití he Sāpate kotoa pē lolotonga e houalotu sākalamēnití. ʻOku tau hivaʻi ha himi kae pakipaki iiki ʻe he kau maʻu lakanga fakataulaʻeikí ʻa e maá.
ʻOku fai ʻe he kau maʻu lakanga fakataulaʻeiki ne nau pakipaki e maá ha lotu makehe. ʻOku maʻu e ongo lotu ko ʻení ʻi he Tokāteline mo e Ngaahi Fuakava 20:77, 79. ʻOku fakamanatu mai ʻe he ngaahi lotú ʻa e meʻa ne tau palōmesi ki he Tamai Hēvaní mo ia kuó Ne talaʻofa mai kiate kitautolú.
ʻE tufa ʻe he kau maʻu lakanga fakataulaʻeiki kehé ʻa e sākalamēnití ki he kāingalotu ʻo e uōtí pe koló. ʻI heʻetau maʻu ʻa e sākalamēnití, ʻoku tau manatu ai ki he Fakamoʻuí mo ʻEne feilaulau maʻatautolú. ʻOku tau toe tukupā foki ke tauhi e ngaahi fuakava (ngaahi talaʻofa) kuo tau fai mo e Tamai Hēvaní.
ʻOku tau ʻapasia lolotonga hono tāpuakiʻi mo tufaki e sākalamēnití. Ko ha taimi ia ke tau fakakaukau ai ki he moʻui, ngaahi akonaki, mo e Fakalelei ʻa Sīsū Kalaisí. Te tau lava foki ʻo fakakaukau ki he founga te tau lava ai ʻo muimui ʻi Heʻene sīpingá.