Ko e hā e Meʻa ʻOku Moʻoní?
Ko e ʻOtuá ʻa e tupuʻanga ʻo e moʻoni kotoa pē. ʻOku tali ʻe he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻa e moʻoni kotoa pē ʻoku fakahā mai ʻe he ʻOtuá ki Heʻene fānaú.
Siʻoku kāinga ʻofeina, fakamālō atu ki he taha kotoa pē koeʻuhí ko e fakatahaʻanga fakalaumālie ko ʻení! Talu mei heʻetau konifelenisi ʻi ʻEpelelí, mo e lahi ha ngaahi meʻa kuo hoko ʻi he māmaní, mei he meʻa fakamamahí ki he meʻa fakafiefiá.
ʻOku mau fiefia ʻi hono lipooti mai ha ngaahi konifelensi lalahi ʻa e toʻu tupú ʻi he funga ʻo e māmaní.1 ʻOku ako ʻe hotau toʻu tupu fakaʻeiʻeikí mei he ngaahi konifelenisí ni, ʻoku maʻu honau mālohi lahi tahá mei he ʻEikí, ʻo tatau ai pē pe ko e hā e meʻa ʻoku hoko ʻi heʻenau moʻuí.2
ʻOku tau fiefia ʻi he lahi ange ʻa e ngaahi temipale ʻoku langa ʻi he funga ʻo e māmaní. ʻOku ʻi ai ha mālohi faka-ʻOtua lahi ange ʻoku haʻu ki he māmaní ʻi hono fakatapui e temipale takitaha, ke fakamālohia ai kitautolu ke tau matuʻuaki e fakalalahi e ngaahi ngāue ʻa e filí.
ʻOku fakahaaʻi mai ʻe he ngaohikoviá e ivi tākiekina ʻo e filí. Ko ha angahala mamafa ia.3 ʻI heʻeku hoko ko e Palesiteni ʻo e Siasí, ʻoku ou toe fakamahinoʻi atu e ngaahi akonaki ʻa e ʻEiki ko Sīsū Kalaisí ʻo kau ki he meʻá ni. Tuku ke u fakamahinoʻi lelei atu: ko ha faʻahinga ngaohikovia pē ʻo ha kakai fefine, fānau, pe ko ha taha pē ko ha angahala fakalielia ia ki he ʻEikí. ʻOkú Ne mamahi pea ʻoku ou mamahi ʻi ha faʻahinga taimi pē ʻoku fakamamahiʻi ai ha faʻahinga taha pē. ʻOkú Ne tangi, pea ʻoku tau tangi kotoa ʻi ha faʻahinga taha kuo siʻi fakamamahiʻi mei ha faʻahinga ngaohikovia pē. Ko kinautolu ʻoku nau hokohoko atu e ngaahi ngāue fakalilifu ko ʻení ʻoku ʻikai ngata pē ʻi heʻenau moʻua ʻi he lao ʻa e tangatá ka te nau fehangahangai mo e houhau ʻo e ʻOtuá.
Kuo taʻu lahi ʻeni hono fakahoko ʻe he Siasí ha ngāue lahi ke fakapapauʻi ʻoku maluʻi—tautefito ki he—fānaú mei hono ngaohikoviá. ʻOku lahi ha ngaahi maʻuʻanga tokoni ʻi he uepisaiti ʻa e Siasí. ʻOku ou fakaafeʻi kimoutolu ke mou ako kinautolu.4 ʻOku fokotuʻu e ngaahi fakahinohino ko ʻení ke ne maluʻi e tonuhiá. ʻOku ou kole atu ke tau mātuʻaki tokanga ki ha taha pē ʻoku ngalingali ʻi ha tuʻunga fakatuʻutāmaki ke ngaohikovia pea tau ngāue he taimi pē ko iá ke maluʻi kinautolu. ʻE ʻikai makātakiʻi ʻe he Fakamoʻuí ʻa e ngaohikoviá, pea ʻi heʻetau hoko ko ʻEne kau ākongá, ʻoku ʻikai foki ke tau tali ia.
ʻOku ʻi ai ha ngaahi founga fakatupu hohaʻa kehe ia ʻa e filí. ʻOku kau ai ʻene feinga ke ʻai ke faingataʻa hono ʻiloʻi e meʻa ʻoku moʻoní mo e meʻa ʻoku ʻikai ke moʻoní. Ko hono moʻoní, ʻoku hanga ʻe he lahi ʻo e ngaahi fakamatala ʻoku lava ke tau maʻú ʻo ʻai ke toe faingataʻa ange hono fakapapauʻi ʻa e meʻa ʻoku moʻoní.
ʻOku fakamanatu mai ʻe he pole ko ʻení haʻama aʻusia mo Sisitā Nalesoni ʻi haʻama ʻaʻahi ki ha tangata mahuʻinga ʻi ha fonua ʻoku fuʻu tokosiʻi ai e kakai kuo nau ʻilo ʻo kau kia Sīsū Kalaisí. Ne toki puke lahi ʻaupito e kaungāmeʻa ʻofeina toulekeleka ko ʻení. Naʻá ne talamai ʻi he ngaahi ʻaho lahi ʻene tokotó, naʻá ne faʻa sio ki he ʻató mo fehuʻi, “Ko e hā e meʻa ʻoku moʻoní?”
ʻOku ʻi ai ha tokolahi he māmaní he ʻahó ni “ʻoku kei taʻofi ʻa kinautolu mei he moʻoní koeʻuhí he ʻoku ʻikai pē te nau ʻilo ʻa e feituʻu ke ʻiloʻi ai iá.”5 Kuo ʻi ai ha niʻihi kuo nau ʻai ke tau tui ʻoku ʻikai ko ha meʻa pau e moʻoní ia—pea ʻoku totonu ke toki takitaha fili ʻiate ia pē e meʻa ʻokú ne pehē ʻoku moʻoní. Ko e faʻahinga tui peheé ko ha fakaʻamu pē ia kiate kinautolu ʻoku nau maʻuhala ʻo pehē he ʻikai ke nau haʻisia foki ki he ʻOtuá.
Siʻi kāinga ʻofeina, ko e ʻOtuá ʻa e tupuʻanga ʻo e moʻoni kotoa pē. ʻOku tali ʻe he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ni ʻa e moʻoni kotoa pē ʻoku fakahā mai ʻe he ʻOtuá ki Heʻene fānaú, ʻo tatau ai pē pe naʻe ʻilo ia ʻi ha loki saienisi pe maʻu mei ha fakahā fakahangatonu meiate Ia.
ʻE hokohoko atu hoʻomou fanongo ki he moʻoní ʻi he ʻahó ni mo ʻapongipongi mei he tuʻunga malangá ni. Kātaki ʻo hiki ha fanga kiʻi fakamatala ʻo e ngaahi fakakaukau ʻokú ne tohoakiʻi hoʻo tokangá mo e ngaahi meʻa ʻe haʻu ki ho ʻatamaí pea nofo maʻu ʻi ho lotó. Kole ʻi he faʻa lotu ki he ʻEikí ke Ne fakapapauʻi mai ʻoku moʻoni ʻa e meʻa kuó ke fanongo ki aí.
ʻOku ou ʻofa atu, siʻoku kāinga ʻofeina. ʻOku ou lotua ʻe hanga ʻe he konifelenisí ni ʻo ʻoatu e keinanga fakalaumālie ʻoku mou fekumi ki aí. ʻI he huafa toputapu ʻo Sīsū Kalaisí, ʻēmeni.