ʻOku Talitali Lelei Kimoutolu ki he Makasini ko ʻEní
Ngaahi Meʻa Mahuʻinga mei he Konifelenisi Lahi Fakavaeuataʻu Hono 192
Naʻe nonga ʻa e Temipale Sikueá lolotonga e Konifelenisi Lahi Fakavaeuataʻu Hono 192 ʻa e Siasí. Naʻe kiʻi longo fakataimi e ngaahi longoaʻa ʻo e langa he feituʻú mo e fakamālohia e ngaahi langa ʻo e fale fakahisitōlia ʻo e Temipale Salt Lake ki he ngaahi mofuiké.
Ka naʻe fakafonu hotau ngaahi ʻapí mo e lotó ʻe ha faʻahinga nonga kehe ʻi heʻetau taʻofi fakataimi e ngaahi longoaʻa ʻo e māmaní ke fanongo ki he kau palōfita mo e kau ʻaposetolo moʻuí.
Naʻe akonaki ʻa Palesiteni Lāsolo M. Nalesoni ʻo pehē, “ʻE hokohoko atu hoʻomou fanongo ki he moʻoní ʻi he ʻahó ni mo ʻapongipongi mei he tuʻunga malangá ni. Kole ʻi he faʻa lotu ki he ʻEikí ke Ne fakapapauʻi mai ʻoku moʻoni ʻa e meʻa kuó ke fanongo ki aí” (vakai, peesi 29).
Naʻe akoʻi ʻe he kau leá ʻi he konifelenisí ha ngaahi moʻoni fakamālohia ʻo e fakamoʻoní, kau ai hono fakahoko mo tauhi ʻo e ngaahi fuakava toputapú (vakai, peesi 95 mo e 73), ko hono maʻu ʻo e fakahā fakatāutahá (vakai, peesi 16), mo e tuʻunga fakaākongá (vakai, peesi 77).
Naʻe pehē ʻe Palesiteni Nalesoni, “ʻI hoʻo fokotuʻu hono toutou fakaivia hoʻo fakamoʻoni kia Sīsū Kalaisí ko e meʻa mahuʻinga tahá, fakatokangaʻi ʻa e ngaahi mana ʻe hoko ʻi hoʻo moʻuí” (vakai, peesi 95).
Hili e ʻosi ʻa e konifelenisi lahí, naʻe hoko atu leva e ngāue ki he Temipale Salt Lake. Naʻe kamata foki ʻa e ngāue pe teuteu ʻi he ngaahi temipale ʻe 125 ʻi he funga ʻo e māmaní ʻa ia kuo fanongonongo pe lolotonga langá. ʻOku kau heni ha temipale foʻou ʻe 18 naʻe fanongonongo ʻe Palesiteni Nalesoni ʻi he fakataha fakaʻosi ʻo e konifelenisí (vakai, peesi 121).
Naʻe pehē ʻe Palesiteni Nalesoni, “[ʻOku] fakafaingamālieʻi lahi ange [ʻe he ʻEikí] Hono ngaahi temipalé. ʻOkú Ne hiki e tuʻunga vave ʻo ʻetau langa e ngaahi temipalé. ʻOkú Ne fakalahi hotau ivi malava ke tānaki fakataha ʻa ʻIsilelí” (vakai, peesi 121).