Liliu Fakamuimuitaha ʻo e Fakahinohino Ki Hono Fakamālohia ʻo e Toʻu Tupú

Kuo toe vakaiʻi ʻe he Siasí ʻene fakahinohino maʻá e toʻu tupu ʻo e Kau Māʻoniʻoni ʻi he Ngaahi ʻAho Kimui Ní. ʻOku fakaafeʻi ʻe he Ki Hono Fakamālohia ʻo e Toʻu Tupú: Ko ha Fakahinohino ki Hono Fakahoko ha Ngaahi Filí ʻa e toʻu tupú ke nau fakaʻaongaʻi ʻenau tauʻatāina ke filí pea fekumi ki ha ueʻi fakalaumālie ke moʻui ʻaki e ngaahi tuʻunga moʻui ʻo e ongoongoleleí.

“Ko e fakahinohino lelei taha te ke lava ʻo maʻu ki hono fai ha ngaahi filí ko Sīsū Kalaisi. Ko Sīsū Kalaisi ʻa e mālohinga ʻo e toʻu tupú,” ko e akonaki ia ʻa ʻEletā Tieta F. ʻUkitofa ʻo e Kōlomu ʻo e Kau ʻAposetolo ʻe Toko Hongofulu Mā Uá ʻi he fakataha ʻo e konifelenisi lahi ʻo e pongipongi Tokonakí. “Ko e taumuʻa ʻo e Ki Hono Fakamālohia ʻo e Toʻu Tupú ke tataki koe kiate Ia. ʻOkú ne akoʻi kiate koe ʻa e ngaahi moʻoni taʻengata ʻo ʻEne ongoongolelei kuo fakafoki maí—ngaahi moʻoni fekauʻaki mo koe, mo Ia, mo e meʻa te ke malava ke fakahoko ʻaki Hono mālohí” (“Ko Sīsū Kalaisi ʻa e Mālohinga ʻo e Toʻu Tupú,” Liahona, Nōvema 2022, 10–11).

ʻOku poupouʻi ʻa e toʻu tupú ke nau fakaʻaongaʻi e ngaahi tefitoʻi moʻoni ʻi he fakahinohinó ke fai ha ngaahi fili māʻoniʻoni ʻi he tapa kotoa pē ʻo ʻenau moʻuí. ʻE ala fie ako mo vahevahe ʻe he ngaahi mātuʻá, kau takí, mo e toʻu tupú ʻa e fakahinohinó ʻi ʻapi, ʻi he ngaahi fakatahaʻanga ʻo e Sāpaté, pea ʻi he ngaahi ʻekitivitií, kau ai e ngaahi nofo kemí mo e ngaahi konifelenisi ʻa e toʻu tupú. Mahalo naʻa fiemaʻu ʻe he kau taki ʻo e Kau Talavoú mo e Kau Finemuí ke fakamamafaʻi maʻu pē ʻa e ngaahi tefitoʻi moʻoni ʻoku maʻu ʻi he fakahinohinó. ʻE lava foki ke hoko e ngaahi tefitoʻi moʻoni ko iá ko e taumuʻa ʻo e pō ki he tuʻunga ʻulungaanga (standards night) maʻá e toʻu tupú mo ʻenau mātuʻá.

ʻOku maʻu fakaʻilekitulōnika ʻa e fakahinohino foʻoú ʻi ha lea fakafonua ʻe 50 ʻi he konga ki he Toʻu Tupú ʻi he Gospel Library pea ʻi he youth.ChurchofJesusChrist.org. ʻE vavé ni pē hano tuku atu e ngaahi tatau kuo pākí ki he ngaahi uooti mo e ngaahi kolo ʻo e Siasí ʻi he funga ʻo e māmaní.