Hoko ʻa Palesiteni Nalesoni ko e Palesiteni Motuʻa Taha ʻo e Siasí

Naʻe fāʻeleʻi ʻa Palesiteni Lāsolo M. Nalesoni ʻi he ʻaho 9 ʻo Sepitema 1924, naʻe toki fakafiefiaʻi kimuí ni ʻa hono taʻu 98. ʻI he ʻaho 14 ʻo ʻEpeleli 2022, naʻá ne hoko ai ko e Palesiteni motuʻa taha ʻi he hisitōlia ʻo e Siasí.

ʻI he fakakaukau ki he ngāue tokoni mo e moʻui ʻa Palesiteni Nalesoní, naʻe pehē ʻe Palesiteni Tāleni H. ʻOakesi, ko e Tokoni ʻUluaki ʻi he Kau Palesitenisī ʻUluakí, “Ko ha taki fakalaumālie mo fakapotopoto ia pea ko e tokotaha angaʻofa mo lelei taha ia te ke lava ʻo ʻamanaki ke feohi mo iá.”

Naʻe fakahaaʻi ʻe Palesiteni Henelī B. ʻAealingi, ko e Tokoni Uá, ʻa ʻene ngaahi fakakaukau fekauʻaki mo e fatongia ʻo Palesiteni Nalesoni ko e palōfita ʻa e ʻEikí: “Ko e taimi kotoa pē ʻoku mau hū ai ki tuʻa mei he ʻōfisí, ʻoku ou pehē mo Palesiteni ʻOakesi, ʻNaʻe toe hoko ia.’ ʻOkú te vakai ki he hoko mai ʻa e fakahaá. Te te sio ki heʻene fiemaʻu ha fealēleaʻakí, pea ʻe fakahoko ʻa e tuʻutuʻuní pea ʻiloʻi ʻe he taha kotoa ʻi he lokí ʻoku totonu ia pea mei he ʻOtuá. ʻOkú ne pehē leʻo siʻi mai pē, ʻʻOku ou tui ko e meʻa ʻeni ʻoku finangalo e ʻEikí ke tau faí.’ ʻOku hoko ia ʻi he taimi ki he taimi.”