O Koya ka Vakaliuci ena iVola i Momani

Ena vuqa na yabaki sa oti, e rau a sureti au o rau na turaga qaravi au tiko me‘u vulica vakatitobu na iVola i Momani. Ena nodrau solia vei au na veisureti oqo, au a qai kila kina, ni dina ga ni‘u a wilika tiko ga vakalalai na iVola i Momani ena veisiga, au a sega ni vulica tiko vakatitobu.

E rau a wasea vei au e dua na yalayala ka yavutaki ena vosa nei Peresitedi Ezra Taft Benson: “E tiko e dua na kaukauwa ena [iVola i Momani] ka na tekivu me drodrova yani na nomu bula ena gauna o tekivu vulica kina vakatitobu na ivola. Ko na kunea na kaukauwa e levu cake mo vorata kina na veitemaki… me levei na veivakacalai … ka tiko ga kina ena sala qiqo ka rabailailai” (Nodra iVakavuvuli na Peresitedi ni Lotu: Ezra Taft Benson [2014], 141).

Au a ciqoma na nodrau veisureti, ka ena veivula ka tarava au raica ni a vakavotukanataki na nodrau yalayala. E sa veisautaka sara ga na noqu bula.

E dua na vuna levu e solia kina vei keda na kaukauwa vakayalo na iVola i Momani sa ikoya ni vakatitobutaka na noda veiwekani kei Jisu Karisito. Ena itukutuku nei Peresitedi Henry B. Eyring ena tabana e 4, e vola kina, “O ira era wilika ena yalodina na iVola i Momani, bulataka na kena ivakavuvuli, ka masulaka na kena dina, era na vakila na Yalo Tabu ka na vakalevutaki na nodra vakabauta, kei na ivakadinadina, me baleta na iVakabula.”

O Jisu Karisito sa iKoya ka vakaliuci ena iVola i Momani. Me vaka keirau wasea kei kequ ikarua o Madison Sinclair, ena neirau itukutuku, “Jisu Karisito ena iVola i Momani” (tabana e 10), e tiko e sivia e 7,000 na idusidusi me baleta na iVakabula ena iVola i Momani.

Au kila ni gauna eda vulica kina na iVola i Momani ena yabaki oqo ena Lako Mai Mo Muri Au, eda na toro voleka yani vei Jisu Karisito.

Loloma yani,

John Hilton III

Parofesa ni Vulici ni Veikavakalotu, Brigham Young Univesity