Nodra na iTubutubu

Kunea na Rarama ni iVakabula ena iVola i Momani

Kemuni na iTubutubu Lomani,

Na ilavelave ni vula oqo e vakarautaka na veivakararamataki me baleta na iVola i Momani me lewenivuli ni Lako Mai, Mo Muri Au ni 2024. Na itukutuku e ra e veitalanoataka na idola ni kena kunei na rarama kei na dina ena dua na vuravura e vakasinaiti tu ena butobuto kei na veilecayaki.

Veitalanoataki ni Kosipeli

Vakasaqarai ni Rarama ni iVakabula

Sa rawa mo wasea vata kei na nomu matavuvale eso na vakasama mai na itukutuku nei Peresitedi Eyring ena tabana e 4, ka veitalanoataka na itavi ni rarama ena noda bula. Railesuva na italanoa nei Kamryn me baleta na kunei ni iVakabula ena butobuto. Ena rawa vakacava ki na nomu vuvale me kunea na rarama ni iVakabula mai na vulici ni iVola i Momani ena yabaki oqo?

Evei me Vakasaqarai kina na Dina

Na Kalou sa ivurevure ni dina kecega, ka sa rawa me da vulica na Nona dina ena noda vakasaqara vakagumatua. Rau a gadreva o Elder kei Sisita Silva me rau digitaka na vanua me rau vakaitikotiko kina ni rau lesu mai na kaulotu, rau sa mani vakasaqara kina na veidusimaki ni Turaga (raica na tabana e 20). Na gauna cava beka a solia kina vei iko na Turaga na veidusimaki o gadreva?

Raica e Vuqa Tale ena Nomu Vulica na Kosipeli

Ni sikovi e dua na vale ni maroroi cakacaka ni liga, era dau vakusakusa ena sarasara na tamata, ka vakavuna me ra calata kina na totoka ni cakacaka ni liga. Sa vakakina, o ira na wilika na iVola i Momani era na calata na dina bibi kevaka era vakusakusataka na wiliwili. Na iwalewale cava e rawa ni vukei keda me da na raica vakavinaka kina na ivolanikalou oqo? Raica na tabana e 12 me baleta eso na vakasama.

Lako Mai, Mo Muri Au Lasa Vakamatavuvale

Na Sala Qiqo ka Rabalailai

1 Nifai 8; 11; 15

Na vakaivotavota ena vua ni vunikau ni bula sa ivakatakarakara ni digitaki ni bula tawamudu ena vukui Jisu Karisito (raica na 1 Nifai 15:36; Vunau kei na Veiyalayalati 14:7). Tovolea na itaviqaravi oqo mo vulica kina na ivakarau e muataki keda kina na ititoko kaukamea (na vosa ni Kalou) ki na isolisoli cecere duadua ni Kalou.

1. Vakabira e dua na iyaloyalo ni vunikau ni bula e lalaga.

2. Vakabira e dua na wa (matataka na ititoko kaukamea) ena ruku ni iyaloyalo, me qai dua e tucake tu mai na tai kadua ni rumu vata kei na mua ni wa kadua.

3. Raica se cava na balavu ni gauna e taura e dua na gone e ubi tiko na matana me lako mai na tai kadua ni rumu ki na vunikau ni bula ka sega ni tautauri tiko ena wa.

4. Qai raica se cava na balavu ni gauna e taura e dua na gone me yacova kina na vunikau ni bula ni taura toka na wa.

Veitalanoa: Na cava eda rawa ni cakava me da taura matua toka kina na ititoko kaukamea ka kakua ni vakalaiva?

Mai na Mekasini na iSakisaki ni Tabagone 

iToko ni iTabagone ni 2024

Mo kila na itoko ni itabagone ni 2024, “O Au e Dua na Tisaipeli i Jisu Karisito,” vata kei na dua na itukutuku mai na Mataveiliutaki Raraba ni Goneyalewa kei na Cauravou kei na dua na sere vou me baleta na itoko.

Na Nomu iVakatakilakila vaka Tisaipeli

Era vulica na itabagone na kedra ivakatakilakila vaka tisaipeli i Jisu Karisito ena nodra raica na veika era dau cakava na tisaipeli kei na sala era cakava kina.

Mo Vakataki Semi

Raica na veika eda rawa ni vulica me baleta na levei ni veivakatauvatani kei ira tale eso, ena vulici ni ivakaraitaki nei tuakai Nifai o Semi.

Mai na Mekasini na iTokani

Veivuke mai na Lako Mai, Mo Muri Au

Raica na ivolakabi ni wilivola, itaviqaravi vakamacawa, italanoa ni ivolanikalou, kei na vuqa tale me vukei ira na luvemu me ra vulica na veika me baleta na iVola i Momani ena yabaki oqo.

Sala me Wiliki kina na iVola i Momani

Na ilavelave ni vula oqo e oka kina na kedra italanoa na gone era kunea na sala matalia eso me ra wilika kina na iVola i Momani. Vakaraica na idusi eso me vukea na vakavinakataki ni nomudou vuli vakamatavuvale.

Muri Jisu Tiko e Thailand

Sota kei Panya ka vulica na sala e dau muri Jisu kina o koya. Qai wiliwili tiko mo vulica kina eso tale na ka me baleti Thailand.

iDusi ni Tuvanaki ni Takete

Vakayagataka na vakatutu ena iwasewase Me Baleti Ira na Gone Qase Cake me vukei ira na luvemu me ra tuvanaka na takete me baleta na parokaramu ni Gonelalai kei na iTabagone.