Yaco Mo iVakadinadina

iVakatakilakila

Vakaraitaka tiko o Moronai vei Meri Witima na peleti koula

Mary Whitmer and Moroni [Meri Witima kei Moronai], mai vei Robert Pack

Ena vula itubutubu ni 1829, e rau a kidavaki Josefa kei Ema Simici kei Oliva Kaudari o Meri kei Pita Witima ki na nodrau vale me rawa ni vakacavari kina na vakadewataki ni peleti koula. Na gadrevi ni gauna nei Meri e a vinakati vakalevu sara. E a qaravi iratou tiko na vulagi ena nona vale ka veivuke tiko vei iratou na luvena vakawati ka ratou tiko voleka.

O iratou na luvei Meri tagane e lewe lima kei rau na vugona tagane (e muri) e ratou a qai yaco me ivakadinadina vakadonui ni peleti koula ena 1829. Ena vula vata oya, a ciqoma kina o Meri e dua na nona ivakadinadina vakai koya.

Ena tautuba ni nona vale, e dua na turaga ulusikoa ka dreketa voli e dua na kato tuberi e daku, a gole yani vei Meri ka kaya vua, “Na yacaqu o Moronai. O sa oca sara vakalevu ena vuku ni cakacaka levu e tu mo qarava.” Ni luvata mai tabana na kato tuberi, a tomana o Moronai, “Ko sa rui yalodina ka gugumatua ena nomu cakacaka. Sa dodonu gona kina, mo na ciqoma e dua na ivakadinadina me vaqaqacotaki kina na nomu vakabauta.” A qai vakatakila na lewe ni nona kato tuberi—na peleti koula.¹

A yaco o Meri me dua na ivakadinadina ni peleti koula, me vakataki iratou na Tolu kei na lewe Walu na iVakadinadina, ka tiko na nodratou ivakadinadina ena draunipepa ni ivakamacala taumada ni iVola i Momani. Na yalomalumalumu kei na gugumatua nei Meri a vakarautaki koya me dua na ivakadinadina. E sega ni volai na nona ivakadinadina ena draunipepa ni ivakamacala taumada ni iVola i Momani, ka sega ni tiko na yacana ena ivakananumi, se ena nodra vakasama e vuqa na Yalododonu era a qai muri mai vua. E dina ga ni a sega ni kunei votu mai vei ira ena nona vale kei na matavuvale na nona cau e veisiga, ia era a kilai mai vua na Kalou.

O Elder Dieter F. Uchtdorf ena Kuoramu ni iApositolo Le Tinikarua a vakavulica:

“E duidui sara na Nona vakatulewa na Turaga mai na noda o keda. Sa dau taleitaka o Koya na tamata-cakacaka yalodina, ka sega na tamata-cakacaka dau nanumi koya ga vakai koya.

O ira era sa yalomalua ena bula oqo era na dara na isala vakatui lagilagi ena bula ka tarava.”²

Na ivolatukutuku i Moronai e sa vakadewataki me iVola i Momani, ka da rawa ni ciqoma e dua na ivakadinadina ni kena dina me vaka na yalayala i Moronai ena vei iotioti ni drauna: “Ia ni dou sa ciqoma na veika oqo, au gadreva me’u vakamasuti kemudou, mo dou kerea vua na Kalou, na Tamada Tawamudu, ena yaca i Karisito, kevaka era sega ni dina na veika oqo; ia kevaka dou sa kerea ena yalodina, ena lomamudou taucoko, ka vakabauta na Karisito, ena vakatakila vei kemudou ko koya ena kaukauwa ni Yalo Tabu ni sa dina” (Moronai 10:4).

O dau vakila beka ni vaka e levu na nomu icolacola ia na nomu sasaga e sega ni vakavinavinakataki? E kilai iko na Tamada Vakalomalagi, ka kila o Koya na vinaka o dau cakava. Ni o veilakoyaki voli ka caka vinaka (raica na Cakacaka 10:38), ka sega ni veiqaravi vakarairai, ka vakasaqaqara ena ivolanikalou, na Yalo Tabu ena rawa ni vakadeitaka na dina ni kosipeli vei iko.

Luvei Meri kei Pita Witima Levu.

Kirisitiani Witima	Jekope Witima	Joni Witima	Tevita Witima	Katarina Witima (Peji)	Pita Witima	Ilisapeci Ana Witima (Kaudari)
E Dua vei iratou na Lewe Walu na iVakadinadina	E Dua vei iratou na Lewe Walu na iVakadinadina	E Dua vei iratou na Lewe Walu na iVakadinadina	E Dua vei iratou na Tolu na iVakadinadina	Vakamautaki Airame Peji, e dua vei iratou na Lewe Walu na iVakadinadina	E Dua vei iratou na Lewe Walu na iVakadinadina	Vakamautaki Oliva Kaudari, e dua vei iratou na Tolu na iVakadinadina