“Noda Rarama ena Lekutu,” Liaona, Janu. 2024.
Noda Rarama ena Lekutu
O ira era wilika ena yalodina na iVola i Momani, bulataka na kena ivakavuvuli, ka masulaka na kena dina era na vakila na Yalo Tabu ka na vakalevutaki na nodra vakabauta, kei na ivakadinadina, me baleta na iVakabula.
iYaloyalo kei tuakai Jereti kei na vatu serau mai vei Normandy Poulter
Ni‘u se gonetagane lailai, a sa tiko e dua na noqu ivakadinadina me baleta na iVola i Momani. E a vakaibalebale vakalevu vei au na italanoa kei tuakai Jereti kei ira na nona tamata ena nodra ilakolako ki na “dua na vanua yalataki” (Ica 2:9).
Ni vakila ni na vakarau sotavi e dua na ilakolako butobuto e loma ni waqa, a taroga na tuakai Jereti, “Oi kemuni na Turaga, ko ni na laiva li me keimami soko kosova na wasawasa levu oqo ena butobuto?” Ni sauma, a kaya na Turaga, “A cava ko vinakata me’u kitaka me ra rarama kina na nomudou waqa?” (Ica 2:22, 23).
A kila tu na tuakai Jereti ni sa tu vua na Turaga na kaukauwa kecega. A kila o koya ni sa ivurevure ni rarama kecega na Turaga. A kila o koya ni Turaga a vakaroti ira na nona tamata me ra kacivi Koya ena gauna era gadreva kina e dua na ka. O koya gona, ena nona vakabauta na Turaga, e a vakarautaka kina na tuakai Jereti e 16 na vatu lalai. O ni nanuma tiko ni a qai kerea vua na Turaga me tara na vatu ena iqaqalo ni Ligana, “me serau yani ena butobuto” (Ica 3:4).
Na iyaloyalo ni Turaga ni tara na veivatu oqori sa dau lewe tu ni noqu vakasama mai na imatai ni gauna au a wilika kina na italanoa o ya. Au rawa ni raica na veika a yaco o ya me vaka sara ga ni yaco tiko ga e mataqu. E rairai beka baleta ni iyaloyalo ni kena vakayalia na butobuto na rarama e ka dina vei au.
Ni‘u sega ni vakila na Yalo Tabu, ni‘u sega ni dau sema vakavinaka tiko ki na Yalo ni Turaga, au dau vakila na butobuto. Ia ni‘u wilika na iVola i Momani, e lesu tale mai na rarama. Na iVola i Momani, vei au e sa vaka e dua na vatu serau e tarai mai vua na Turaga. E sa vakararamataka na noqu ilakolako ena bula oqo.
E Dua Na Rarama Tawamudu
Me vakataki ira na kau mai ena liga ni Turaga ki na vanua vaka-Amerika makawa, eda sotava taucoko na cava kei na siga butobuto ena noda ilakolako ki na vanua yalataki ni bula vakacerecerei. Ia na Turaga ena vakayacora vei keda na veika a cakava o Koya vei ira na Jeretaiti kei ira na Nifaiti. E na tuberi keda o Koya ka vakararamataka na noda sala—kevaka eda talairawarawa Vua, cakacakataka na noda vakabauti Koya, ka kerea na Nona veivuke.
Na Turaga a tukuna vei Nifai, “Ka’u na nomudou rarama talega ena lekutu; ka’u na vakarautaka na sala vei kemudou kevaka dou na muria na noqu ivakaro; ia kevaka dou na muria na noqu ivakaro dou na tuberi ki na vanua yalataki, ka dou na kila ni sa i au sa tuberi kemudou” (1 Nifai 17:13).
Na Turaga a kaya vei Jekope na taci Nifai, “Ka’u na rarama ki vei ira era sa rogoca na noqu vosa me sega ni mudu” (2 Nifai 10:14).
Me baleta na iVakabula, a vakadinadina kina vakaoqo o Apinatai na parofita, “Sa ikoya na rarama kei na bula kei vuravura, io na rarama sa tawacava, ka sega ni vakabutobutotaki rawa” (Mosaia 16:9).
Ena Vukuna, e a tusanaka kina vakaoqo na iVakabula, “Koi Au na rarama kei na vu-ni-bula kei vuravura.” Ka kuria, “Raica koi Au na rarama; Au sa biuta vei kemudou e dua na ivakarau mo dou muria” (3 Nifai 9:18; 18:16).
Vakila Tiko na Rarama
Au lomana na noda parofita, o Peresitedi Russell M. Nelson. Au kalougata ni‘u veiqaravi e yasana. Ni curu yani ki na dua na rumu, e ramase cake na rumu ena gauna sara ga o ya. E kauta voli vata kei koya na Rarama i Karisito.
Na Rarama i Karisito e ka dina. Sa ikoya sara ga “na igu vakalou, kaukauwa, se veivakayarayarataki e lako mai vua na Kalou ena vukui Karisito ka solia na bula kei na rarama ki na veika kecega.” Oqo e dua na isolisoli vakamareqeti vakayalo ka na rawa ni tuberi ira na luve ni Kalou ki vua na Yalo Tabu kei na kosipeli i Jisu Karisito.1 Na wiliki ni iVola i Momani e vakaqaqacotaka na Rarama oya.
Ena so na gauna ena gadrevi me da raica lesu na noda bula me da nanuma kina na sala eda a vukei kina ena noda ilakolako. Ni da railesu, e rawa ni da vakila tale na veivakayarayarataki ni iVakabula. Ni kaya na ivolanikalou, “Mo drau nanuma, mo drau nanuma” (Ilamani 5:12), au nanuma ni ra tukuna tiko vei keda, “Kakua walega ni nanuma na veika o a kila se vakila ena dua na gauna; ia, mo vakila tale na rarama o ya.”
Vei ira eso, e dau yaco mai vaka rawarawa vei ira na vakilai ni rarama vakayalo. Vei ira eso tale, na rarama vakayalo e rawa ni dau dredre me vakilai baleta na vei dredre e dau sotavi yadua se na veivagolei tani vakavuravura. Ia kevaka eda yalodina tiko, ena yaco mai na rarama—ka so na gauna ena sala eda sega ni namaka.
O Peresitedi Nelson, o koya ka sa vakasalataki keda oti me da “vulica ena masumasu na iVola i Momani e veisiga,”,2 e sa wasea oti e vica na sala e rawa ni kauti keda vakavoleka kina na iVola i Momani ki vua na iVakabula ka vukei keda me da vakila na rarama ni kosipeli, kila vakamatata na dina ni kosipeli, ka bulataka na ivakavuvuli ni kosipeli.
E kaya o Peresitedi Nelson, ni da wilika na iVola i Momani, ena tubu na noda kila vakamatata, kei na noda vakavinavinakataka, na Veisorovaki i Jisu Karisito.
Eda na vakila na gagadre me da “sucu tale” (Mosaia 27:25) ni sa vukei keda na ivola oya me da vakila e dua na veisau e lomada (raica na Mosaia 5:2).
Ni da wilika ka vulica na ivakavuvuli ni iVola i Momani me baleta na vakasoqoni vata nei Isireli, eda na vakila na vakalevutaki ni gagadre me da vakasaqarai ira na noda era sa mate ka vakayacora na cakacaka vakalotu ni veivakabulai kei na bula vakacerecerei me baleti ira ena valetabu.
Eda na vakila na rarama ni da ciqoma na isau ni noda taro, dusimaki ena vakatulewa, kei na kaukauwa me da veivutuni ka vorata na ca.
Ni da wilika na dina era kunei ena iVola i Momani, eda na vakila na veivakabulai, veivakacegui, veivakalesui mai, veivakaukauwataki, kaukauwa, yalololoma, kei na marau ki yaloda.3
Ia e dina li na ka oqo?” A taroga o Alama na ka e baleta na tubu, kei na buroro ni sore ni dina, kilaka, kei na ivakadinadina. “ Au sa kaya vei kemuni, Io, baleta ni sa rarama; a ka kecega sa rarama sa ka vinaka, baleta ni rawa me kilai, o koya mo ni kila ni sa ka vinaka oqo” (Alama 32:35).
Christ’s Image [iTaba kei Karisito], mai vei Heinrich Hofmann
Kunea na iVakabula ena Butobuto
Ni se qai yabaki 10 na noqu itokani o Kamryn, a tauvi koya e dua na mate ni mata ka dau yaco vakavudua ia e tudei ka a tauva tu na iubi ni loa ni matana imatau.4 Ena so na gauna, ni dau sega ni cegu se taqei rawa na mosi e salavata kaya mai, sa sega ni rawa vei Kamryn me raica na rarama. Ena nodrau lomaleqa na nona itubutubu de na rawa ni na mataboko sara, e rau dau vakabutotaka na katubaleka ni nona rumu ni moce me rawa ni vakacegu vinaka kina o koya. A vakananuma lesu o Janna na tinai Kamryn:
“Ni oti beka e va na vula mai na kilai ni ituvaki ni mate e tauvi koya, au a curu yani ki na nona rumu butobuto. Ni‘u sa rai rawa ena butobuto, au a raici Kamryn ni lokini no ena nona idavodavo. Ena levu ni mosi a tarai koya tu e a sega ni yavala se tagi mada ga ni rogoca n‘iu sa curu yani. A davo toka ga ni bobo ruarua tu na matana ena kena vuvuce.
“Au a tekiduru ena yasa ni nona idavodavo, taura na ligana, ka boboka vakatolu—na neirau vosa vuni ni ‘Au lomani iko.’ E kena ivakarau me dau boboka lesu mai vaka va ni ‘Au lomani iko vakalevu cake,’ ia a sega ni sauma mai o koya. Sa tarai koya sara ga vakalevu na mosi. Ni kasova tu na wainimataqu, au a vakaraica tu na luvequ yabaki 10 dau waribariba tu ena dua na gauna ni lokini no vaka e dua na polo. E a kavoro na utoqu.”
A cavuta o Janna e dua na masu lo, mai vu ni yalona.
“Au a tukuna vua na Tamada Vakalomalagi ni‘u kila ni o Koya e kila vakavinaka cake, ia au a masuta, ‘Yalovinaka ni vukei koya.’ Ni‘u dabe toka e kea ka masu tiko, au a vakila e dua na katakata kei na veivakacegui. Au vakila na vakacegu ni yaco mai ki na noqu vakasama e dua na vakanananu me baleta na iVakabula ni: ‘O Koya na rarama. Kunei Koya ena butobuto.’”
A tacake o Janna ka vakasolokakanataka e daligai Kamryn: “E dodonu mo kunea na iVakabula ena butobuto.”
Ni oti oya, a moce lutu o Kamryn ena nona vakarogoca voli na serenilotu kei na ivolanikalou eso ena parokaramu ni valenivola ni Lotu.
Ni dau yaco mai na mosi ni matana, e dau kunea o Kamryn na iVakabula ena butobuto.
iTaba ka ratou solia mai na matavuvale nei Kamryn
Na tauvimate nei Kamryn e sega ni dau basika ena vei gauna taucoko, ia ni dau yaco mai, e rau dau biuta o Janna kei watina o Darrin, na itutuvi ena katubaleka ni nona rumu. Ena veigauna ni mosi vaka o ya, e kaya o Kamryn, “Au dau kunea na iVakabula ena butobuto.”5
Ni vaka me “dua na lekutu butobuto ka liwalala” na bula (1 Nifai 8:4), eda na gadreva talega me da kunea na iVakabula ena butobuto. Au vakadinadinataka ni iVola i Momani, kei na kena ivakadinadina “ni o Jisu na Karisito, na Kalou Tawamudu,”6 ena tuberi keda yani vei Koya. Au kila ni o ira era wilika ena yalodina na iVola i Momani, bulataka na kena ivakavuvuli, ka masulaka na kena dina era na vakila na Yalo Tabu ka na vakalevutaki na nodra vakabauta, kei na ivakadinadina, me baleta na iVakabula.
Me da vakaraitaka na noda vakavinavinaka me baleta na ivola “dodonu duadua” oqo7 ena noda wilika, vakamareqeta, ka vakayagataka me vakaqaqacotaka na noda vakabauta kei na nodra vakabauta na tani na Rarama kei Vuravura.