“Ko Jisu Karisito ena iVola i Momani,” Liaona, Janu. 2024.
Ko Jisu Karisito ena iVola i Momani
E cavuti vakavica na Turaga ena iVola i Momani?
O cei beka o na kaya ni sa iusutu ni iVola i Momani? E so beka ena rairai vakatura me o Nifai, Alama, se Momani, ia o koya e bibi duadua sai Jisu Karisito. A vola o Nifai:
“Ni da sa cakacaka vagumatua me da volavola, me da vakauqeti ira kina na noda kawa … me ra vakabauti Karisito. …
“Ia eda veivosakitaki Karisito, eda reki ena vukui Karisito, eda vunautaki Karisito, eda parofisaitaki Karisito” (2 Nifai 25:23, 26).
Ena 1978, a tabaka kina o Susan Ward Easton e dua na itukutuku ka wiliki vakalevu, ka vakaraitaka kina vakafika ni o Jisu Karisito sa ikoya na tamata ka iusutu ni iVola i Momani. A vakatakila o koya na itutu duidui eso i Jisu Karisito ka vakaraitaka ni a cavuti na yacana se na Nona itutu vaka 3,925 ena iVola i Momani, ka kena ivakatautauvata me vakadua ena veiya 1.7 na tikina.1
Na vuli yaga oqo e vakatakila ni iVakabula e uto tiko ni iVola i Momani; ia, na iwiliwili oqo e sega ni ivakaraitaki dina ni levu ni gauna e cavuti kina na Karisito baleta ni sega ni vakawili kina na veivosa eso ka vakacacavutaki Vua.
Kena itinitini, na iwiliwili ni vakacacavu vei Jisu Karisito e sega ni ka e bibi duadua me vulici mai na iVola i Momani; ia, na vakacacavu yadua baleti Koya e rawa ni vakavulica vei keda na veika me baleta na Nona ituvaki kei na ilesilesi vakalou. Keirau vakadikeva sara vakavinaka na iVola i Momani, ka vakasaqara na veigauna e cavuti kina o Jisu Karisito, ka oka kina na itutu kei na vosa eso ka vakacacavutaki Vua. Keirau raica rawa e 7,452 taucoko na vakacacavu—ka tautauvata ni sivia e dua na vakacacavu ena dua tikina.2 Na itutu i Karisito e kovuta e rauta ni 50 na pasede ni vakacacavu baleti Karisito ena iVola i Momani, kei na kena vo mai na vosa eso ka vakacacavu Vua.
Na vakasaqarai Jisu Karisito e vakarautaka e dua na sala matalia me vulici kina na veika me baleti Koya. Vakasamataka mada na sala era vakabibitaki Koya kina na veitikina oqo: “Ka tekivu vakabauta na Luve ni Kalou, ni na lako mai o koya me mai me sereki ira na nona tamata, ka ni na mai kune rara o koya ka mate talega me sorovaka kina na nodra ivalavala ca; ka na tucake tale mai o koya mai na mate, ka sa na yaco rawa kina na tucake tale mai na mate, ia era na qai tu e matana na tamata kecega, me lewai ira ko koya ena iotioti ni siga ni veilewai, me vaka na nodra ivalavala.” (Alama 33:22; vakabibitaki na ikuri).
Ena vakadidike taumada nei Sister Easton, na tikina oqo sa na rawa me wili me dua na vakacacavu me baleti Karisito, mai na icavuti na “Luve ni Kalou.” Ia, na iVakabula e cavuti tale vaka lima. Na tikina oqo e sega walega ni vakabibitaka ni o Jisu Karisito e Luve ni Kalou ia sa iKoya talega ena vueti keda ena vuku ni Nona Veisorovaki kei na Tucaketale tawamudu ka na noda turaganilewa talega.
Ia na ka e rairai kaukauwa duadua beka, sa ikoya na Nona cavuti Koya vakaikoya na Karisito ena iVola i Momani. Me ivakaraitaki, eda wilika ni kaya na iVakabula, “Ka kevaka era na lako mai vei au ko ira na tamata, au na vakaraitaka vei ira na nodra malumalumu. Au sa solia vei ira na tamata na malumalumu me ra vakayalomalumalumutaki ira kina; ia sa rauti ira vinaka na tamata kecega era sa vakayalomalumalumutaki ira vei au na noqu loloma soli wale; ni kevaka era sa vakayalomalumalumutaki ira vei au, ka vakabauti au au na qai vakayacora me vu ni nodra kaukauwa na veika malumalumu” (Ica 12:27; vakabibitaki na ikuri). E dina ga ni sega ni basika ena tikina oqo na yaca i Karisito, ia na iVakabula e cavuti Koya vakaikoya vakawalu. Sa vakabibitaki na Nona itavi ni da vakasaqara na iVakabula ena veitikina oqo.
Na veitikina ka tarava e vakaraitaka na veiwekani ki na tamata yadua e vakila na iVakabula kei na veika era vakila me baleti Koya:
“Mo ni tucake ka lako mai vei au, mo ni daramaka kina na ligamuni ki na sarisariqu, ka tara tale ga na we ni ivako ena ligaqu kei na yavaqu mo ni kila kina ni sai Au na Kalou ni Isireli kei na Kalou ni vuravura taucoko, ka’u a vakamatei ena vuku ni ivalavala ca ni vuravura.
“… Ni ra sa lako yani na lewevuqa ka daramaka na ligadra ki na sarisarina, ka tara na we ni ivako ena ligana kei na yavana” (3 Nifai 11:14–15; vakamatatataki).
E dina ga ni da na sega ni rawa ni tara e ligada na we ni ivako, ia mai na iVola i Momani e rawa ni da na vakatitobutaka kina na noda vakadinadinataki Jisu Karisito.
Na cavuti vakawasoma ni Turaga ena iVola i Momani e vukei keda me da raica ni o Koya e sa usutu ni cakacaka tabu oqo. Na kilai ni iVakabula ena iVola i Momani: E Dua Tale na iVakadinadina kei Jisu Karisito e sa dua na sala mana me da toro voleka yani kina Vua.